लेवी 3

होमजोणोअ कोअते गाराहा आपीइलोअ नियम

1 "जर होमजोणोअ काजे तियाआ गाराहा ओय, आन तो पाल्ल्या जनवारोमेहें रोत गोदू नेत वासड़ी गाराहा ओय, ताहां वाहीं बी खामी ने ओय तियाहाज यहोवा देवोअ काजे गाराहा आपुहूं जोवे. 2 आन तो तियाआ आथ तियाआ गाराहा कोइलोअ जनवारोअ मुन्कापोअ मिके आन तियाहा मिलापवाला तोंबाआ बाओपोअ गाराहा कोअहूं जोवे; आन आरोनोअ पोर्‍या जे पुंजारु होय ते तियाआ रक्ताहा देवान्याआ शारी मेरे साटारुहूं जोवे. 3 आन तो होमजोणोअ कोअते गाराहामेहें रोते यहोवा देवोअ कोअते गाराहा आपुहूं जोवे, मोन्ज्ये जियी सरबी वाअहीं आते टापाइत रोतेहे आन जे सरबी तियांमेहें लोक्ठीत रोहे ते बी, 4 आन बेनु किडनी आन तियांआं उपर्‍यीइ सरबी जे कंबरेए जागे रोहे आन किडनी नेहें कांअजाआ उपर्‍यीइ सरबी यां आखाहा तो आलाग आलाग कोअहूं जोवे. 5 ताहराआ आरोनोअ पोर्‍या यांहां देवान्यापोअ तियी आगीइ गाराहा मिकल्या लाकड़ापोअ पेटाड़े. के ओं यहोवा देवोअ कोअते खुसीइ हाजी गुंदाअनारी गाराहा ठोरे.

6 "जर यहोवाआ कोअते होमजोणोअ गाराहा तियाआ गाराहा पाल्ल्या जनवारोमेहें रोत नर नेत मादा ओय, ताहां तों निर्दुसुज गाराहा सोड़वुहूं जोवे. 7 जर तो मेडाआ बासो गाराहा आपतू ओय, ताहां तियाहा यहोवा देवोअ सामने गाराहा आपुहूं जोवे, 8 आन तो तियाआ इसल्या जनवारोअ मुन्कापोअ आथ मिकुहूं जोवे आन तियाहा मिलापवाला तोंबाआ आगाड़ी गाराहा कोअहूं जोवे; आन आरोनोअ पोर्‍या तियाआ रक्ताहा देवान्याआ मेरेमेरे साटारुहूं जोवे. 9 ताहां होमजोणोअ गाराहामेहें रोत सरबीही यहोवाआ कोअते गाराहा कोअहूं जोवे, मोन्ज्ये तियाआ सरबीवाली सेपटीही तो टुंगोमेर्‍याआ आडोअ जागे रोत आलाग कोअहूं जोवे, आन जियी सरबी वाअहीं आते टापाइत रोतेहे, आन जे सरबी तियांमेहें लोक्ठीत रोतीही, 10 आन बेनु किडनी, आन जे सरबी तियांआं उपोअ कंबरेए जागे रोतीही, आन किडनी नेहें कांअजाआ उपर्‍यीइ सरबी, यां आखाहा तो आलाग कोए. 11 आन पुंजारु याहां देवान्यापोअ पेटाड़े; ओं यहोवा देवोअ कोअते गाराहाआ रुपोम खाणो ठोरे.

12 "जर तों बोकड़ी सोड़वे, ताहां तियीही यहोवा देवोअ सामने गाराहा आपुहूं जोवे. 13 आन तो तियाआ आथ तिया जनवारोअ मुन्कापोअ मिकुहूं जोवे, आन तियाहा मिलापवाला तोंबाआ आगाड़ी गाराहा कोअहूं जोवे; आन आरोनोअ पोर्‍या तियाआ रक्ताहा देवान्याआ शारु मेरे साटारुहूं जोवे. 14 ताहरुउ तो तियामेहें रोत तियाआ गाराहा यहोवा देवोअ कोअते सोड़वीत कोइत इसे, मोन्ज्ये जियी सरबी वाअहीं आते टापाइत रोतेहे, आन जे सरबी तियांमेहें लोक्ठीत रोतीही ते बी, 15 आन बेनु किडनी आन जे सरबी तियांआं उपोअ कंबरेए जागे रोतीही, आन किडनी नेहें कांअजाआ उपर्‍यीइ सरबी, याम आखाहा तो आलाग कोअहूं जोवे. 16 आन पुंजारु याहां देवान्यापोअ पेटाड़े; ओं सोड़वीइल्या रुपोम खाणो ठोरे, जो हाजी गोंदेए कोअते रोहे; काहाके पुरी सरबी यहोवा देवोअ होय. 17 ओं तुमाआ रोअलाआ जागाम तुमाआ पिड़ीन पिड़ीइ कोअते हादाजोलम्यीइ विधी ठोरे के तुमू सरबी आन रक्त केदिहींज ने खाअहूं जोवे."