लेवी 9

आरोने कोअल्यी गाराहा

1 आँठवे दिही मोशे आरोन आन तियाआ बेटाह्हांहां आन इस्राएलवाला डायहांहां हादाड़ीत कोइत आरोनोहो कोयो, 2 "पापोअ गाराहाआ कोअते एक निर्दुस बासू लेताव, आन आगीइ गाराहाआ कोअते एक निर्दुस मेडू लेताव आन यहोवा देवोअ सामने गाराहा कोअ. 3 आन इस्राएलवालाहां एहें को, ‘तुमू पापोअ गाराहाआ कोअते एक बोकड़ू, आन आगीइ गाराहाआ कोअते एक बासू आन एक मेडाआ बासो ल्या, जो एका वोरह्योअ ओय आन निर्दुस ओय, 4 आन होमजोणोअ गाराहा कोअते यहोवा देवोअ सामने इसीइलाआ कोअते एक बोलोद आन एक मेडु, आन तेलोवाअहीं केलवीइल्या मोयदाआ एक ओनोअ भेट बी लेत ल्या; काहाके आज यहोवा देव तुमुहूं दर्शन आपे’." 5 जियी जियी वस्तुउ आदेश मोशे आप्‍युतो तियीं आखीही ते मिलापवाला तोंबाआ आगाड़ी लेतावया; आन पुरी मोंड्ली आहने जात कोइत यहोवा देवोअ सामने उबी रोयी. 6 ताहरोअ मोशे कोयो,"ओं तो काम होय जियाहा कोइलाआ कोअते यहोवा देवे आदेश आप्युहू के तुमू तियाहा कोआ; आन यहोवा देवोअ महिमा तुमुहूं देखाय." 7 ताहरुउ मोशे आरोनोहो कोयो, "यहोवा देवोअ आदेशोअ परमाणे देवान्याआ जागे जात कोइत सोताआ पापोअ गाराहा आन आगीइ गाराहा इसीत कोइत आन आखा माअहुंउं कोअते गाराहा कोओ; आन माअहुंउं गाराहा बी इसीत कोइत तियांआं कोअते पाप टापीइलू होये."✝9:7 इब्री 7:27

8 तियाहा काजे आरोन देवान्याआ जागे जात कोइत तियाआ पापोअ गाराहा गोदाहा गाराहा कोअयो. 9 आन आरोनोअ बेटाह्हां रक्ताहा तियाआ जागे लेत गोया, ताहां तिये तियाआ आंगल्यी रक्तामेहें बुडाड़ीत कोइत देवान्याअ हिंगोअरी रक्ताहा हार्‍यो, आन उगरीइल्या रक्ताहा देवान्याअ थुड़ोम ओली देदो; 10 आन पापोअ गाराहा सरबी आन किडनी आन कांअजापोर्‍यीइ सरबीही तिये देवान्यापोअ पेटाड़्यी, जेहेंकोइत यहोवा देवे मोशेहे आदेश आप्युतो. 11 माहां आन सांबड़ाहा तिये पोड़ावाआ बारथे आगीम पेटाड़्यो.

12 ताहां आगीइ गाराहाआ जनवारोहो गाराहा कोअयो; आन आरोनोअ बेटाह्हां रक्ताहा तियाआ आथोम आप्यो, आन तिये तिया रक्ताहा देवान्याअ मेरेमेरे साटारी देदो. 13 ताहरोअ तियां आगीइ गाराहाआ जनवारोअ डुन्कान डुन्का कोइत मुन्को नेहें तियाआ आथोम आपी देदो आन तिये तियांहां देवान्यापोअ पेटाड़ी देदो. 14 आन तिये आते आन गुडाहा तुवीत कोइत देवान्यापोअ आगीइ गाराहाअरी पेटाड़्यो.

15 ताहां तिये माअहुंउं गाराहा आगाड़ी लेत कोइत पापोअ गाराहा बोकड़ाहा जो तियांआं कोअते ओतु लेत कोइत तियाआ गाराहा कोअयो, आन पेल्लाआ होस तियाहा बी पापोअ गाराहा बोणावीत इश्यो. 16 आन तिये आगीइ गाराहा बी आहने लेत जात कोइत नियमोअ पुरमाणे अर्पण कोअयो. 17 आन ओनोअ गाराहा बी आहने लेत जात कोइत तियामेहें रोत मुठ पोइत दाड़ख्यीइ वेगर्‍यीइ आगीइ गाराहा नेहें ते बी देवान्यापोअ पेटाड़्यी.

18 बोलोद आन मेडू, मोन्ज्ये जे होमजोणोअ गाराहाआ जनवार, माअहोंअ कोअते ओतो ते बी गाराहा कोआये; आन आरोनोअ बेटाह्हां रक्ताहा तियाआ आथोम आप्यो, आन तिये तिया रक्ताहा देवान्याअ मेरेमेरे साटारी देदो;✝9:18 लेवी 3:1-11 19 आन तियां बोलदोअ सरबीही, मेडाअ सरबीवाली सेपटीही, आन जियी सरबी वाअहीं आते टापाइत रोतेहे तियीही, आन किडनी नेहें कांअजापोर्‍यीइ सरबीही बी तियाआ आथोम आप्यी; 20 आन तियां सरबीही सातीपोअ मिक्यी; आन तिये ते सरबी देवान्यापोअ पेटाड़्यी, 21 पोन साती आन हाजाड़्यी जांगेहे आरोने मोशेए आदेशोअ परमाणे आलवीइलोअ भेटेए कोअते यहोवा देवोअ सामने उताऱ्यी.

22 ताहरुउ आरोन माअहोंअ वोल आथ कोइत तियांहां आशिर्वाद आप्यु; आन पापोअ गाराहा, आगीइ गाराहा, आन होमजोणोअ गाराहा इसीत कोइत निसे उतरीत आयु.✝9:22 गणती 6:22-26 23 ताहराआ मोशे आन आरोन मिलापवाला तोंबाम गोया, आन बारथे निहीत कोइत माअहुंहूं आशिर्वाद आप्यु; ताहरोअ यहोवा देवोअ महिमा आखा माअहुंहूं देखाअयी. 24 आन यहोवा देवोअ सामने रोत आग निहींयी आन सरबी नेहें आगीइ गाराहा देवान्यापोअ आरवी देदी; याहा पालीत कोइत आखे माअहें जयजयकार कोए वोल्ये आन उब्डे पोड़ीत कोइत वोंद्य.