1 यहोवा देव मोशेहे आन आरोनोहो कोयो, 2 "इस्राएलवालाहां कोवा: जेतेहे जनवारे धरतीपोअ होय तियां आखामेहें रोत तुमू यां जिवता जनवारोअ माहां खात सेकतेहे. 3 आखा जनवारोमेहें रोत जेतेहे जनवारे सिराअली नेताहां फाटली खुर्‍यीवाले रोतेहे आन वेएगालतेहे, तियांहां खात सेकतेहे. 4 पोन वेएगालनारे नेताहां सिराअली खुर्‍यीवालामेहें रोत यांआं माहां मा खाहा, मोन्ज्ये उटड़ो, जो वेएगालीइलोअ ते वेएगालेहे पोन खुर्‍यी सिराअली नाहां रोती, तिहींइं काजे तों तुमाआ कोअते एठो ठर्‍योहो. 5 आन खडकाम रोनारु उंदीइ, जो वेएगालेहे खोरु पोन सिराअली खुर्‍यीइ नाहां रोतु, तो बी तुमाआ कोअते एठु होय. 6 होहल्यू, जो वेएगाल ते कोअहे पोन सिराअली खुर्‍यीइ नाहां रोतो, तियाहा काजे तो बी तुमाआ कोअते एठो होय. 7 आन भुंडड़ो, जों सिराअली खुर्‍यीइ ते रोहे पोन वेएगाल नाहां कोअतो, तियाहा काजे तो तुमाआ कोअते एठो होय. 8 तुमू यांआं माहां मा खाहा, आन यांआं तोड़ोहो आथलाहा बी मा; एं ते तुमाआ कोअते एठे होय."

9 पाअयोंमेर्‍येए जिवजन्तुमेहें खाअहूं जोगेहे तें एं होय: दोर्‍याम नेताहां नोयीम नेताहां खाडीमेर्‍येए जिव जेत्ताआ फाके आन पिंगे रोतेहे तियांहां तुमू खात सेकतेहे. 10 आन पाअयोंमेर्‍येए जिवजन्तुमेहें रोत जेते विण फाकावाले आन विण पिंगावाले दोर्‍याम नेताहां नोयीम नेताहां खाडीमेहें रोतेहे, तें आखे तुमाआ कोअते एठे होय. 11 तें तुमाआ काजे एठे रोय; तुमू तियांआं माहां मा खाहा, आन तियांआं तोड़ोहो एठो मानजा. 12 पाअयोंमेएं कोड्लाज बी जिवजन्तुउ फाके आन पिंगे नाहां रोते तें तुमाआ कोअते एठे होय.

13 आन यां सिड़ाहा तुमू एठे मानजा: यांआं माहां मा खाहा. एं तुमाआ कोअते एठे होय: मोराग, डिगरावू, कुवड़ो, 14 हिसाणो, आन आखी जातीइ सोट्के, 15 आन बाती बातीइ कागड़े, 16 राजकुकड़ो*, पांबू, कुयोल, आन बाती बातीइ हिसाणे, 17 टुडू, पाणकुकड़ो, पाम्बल्यु कुवड़ू, 18 पांडू टुडू, पाणकुकड़ी, डिगरावा, 19 जाती जातीइ बोगले, टिटीवड़ी आन वागलो.

20 "जेत्ते फाकावाले किड़े शार गुडा वाअहीं सालतेहे तें आखे तुमाआ कोअते एठे होय. 21 तें बी होरतींडनारे, आन फाकावाले जें शार गुडा वाअहीं सालतेहे, जें गुडाआ सेकती वाअहीं पुयींपोअ उट्टा इंडीइलोअ टोसणे रोतेहे तियांहां खात सेकतेहे. 22 तें एं होय: मोन्ज्ये आखी जातीइ टिडे, नाकतोड़्ये, आन डिबे, टिडे. 23 पोन बिहीरे आक्खे होरतींडनारे आन फाकावाले किड़े जें शार गुडावाले रोतेहे तें तुमाआ कोअते एठे होय.

24 "यांवाअहीं तुमू एठे ठोरहा; जों कोडो यांआं तोड़ोहो आथले तों हांजेपोअ जाआं एठो ठोरे. 25 आन जों कोडो मोअल्या किड़ाहा विसे तों तियाआ आंगड़े तुवुहूं जोवे आन तो हांजेपोअ एठोज रोअहूं जोवे. 26 जेत्ते जनवारे सिराअली खुर्‍यीइ रोतेहे पोन तियांआं ते नाहां पुरी फाटली खुर्‍यी आन नाहां वेएगालते तें तुमाआ कोअते एठे होय; जों कोडो तियांहां आथले तों एठो ठोरे. 27 आन शार गुडा वाअहीं सालनारामेहें रोत जेत्तेहे थोलते वाअहीं सालतेहे तें आखे तुमाआ कोअते एठे होय; जो कोडो तियांआं तोड़ोहो आथले तो हांजेपोअ जांआं एठोज रोय. 28 आन जो कोडो तियां तोड़ोहो विसे तो तियाआ आंगड़े तुवुहूं जोवे आन हांजेपोअ जांआं तो एठो रोय;

29 "जे पुयींपोअ होरतींडतेहे तियांमेर्‍येए एं तुमाआ कोअते एठे होय, मोन्ज्ये नोल, उंदीइ, आन जाती जातीइ हेएड़े, 30 साटहेएड़ी, मोगरावू, गोरफड़ी, किरीवली, आलहेएड़ू. 31 आखा होरतींडनारामेहें रोत एंज तुमाआ कोअते एठे होय; जों कोडो यांआं तोड़ोहो आथले तों हांजेपोअ जाआं एठो रोय. 32 आन यांमेर्‍याआ किहाज बी तोड़ एखी वस्तुपोअ पोड़ीत जाय ते बी एठी ठोरे, तो लाकड़ाआ बासन, आंगड़े, सांबड़ो, पोतू, एखा कामोअ केहेलोज बी बासन काहा नाहां रोतो; तो पाअयोंम टाकुहूं जोवे,आन हांजेपोअ जाआं एठो रोय, ताहांजात सोको सोमजाय. 33 आन जर एखु कादुउ बासन ओय जियामेहें यीं वस्तुमेहें रोत एखु पोड़े, ताहां तिया बासनोमेहें जो किबी ओय तो एठो ठोरे, आन बासनोहों तुमू फोड़ीत टाकजा. 34 तियामेहें जो खाअलाअ हारकु रोटू ओय, आन तियामेहें पाईं पोड़ीत जाय ताहां तो वस्तु एठो ओत जाय; ताहां एहेलाहा बासनोमेहें पीइलाअ कोअते काविहीं ओय ताहां तो बी एठो ओत जाय. 35 आन जर यांआं तोड़ोमेर्‍युउ किज बी भाग बाठीपोअ नेताहां सुलीपोअ पोड़े, ताहां तों बी एठो ठोरे, आन तोड़ीत टाकुहूं जोवे; काहाके तों एठो ओत जाय, तों तुमाआ कोअते बी एठो ठोरे. 36 पोन वोहत्लो पाईं नेताहां तालाव जियामेहें पाईं रुकाइत रोहे तों ते सोकोज रोये; पोन जो तियांमेर्‍याआ मोल्याहा आथले तों एठो ठोरे. 37 आन जर यांआं तोड़ोमेर्‍युउ एखु भाग ओइलोअ बियारापोअ पोड़े, ताहां तो बियारु सोकुज रोय; 38 पोन जर बियारापोअ पाईं टाकाअयो ओय आन फासाड़ी तियापोअ तोड़ोमेर्‍युउ काविंहीं भाग पोड़ीत जाय, ताहां तो तुमाआ कोअते एठो ठोरे.

39 "जियां जनवारोहो खाअलोअ आदेश आपाअयीही जर तियांमेर्‍योअ एखु मोए, ताहां जो कोडो तिया तोड़ोहो आथले तो हांजेपोअ जाआं एठो ठोरे. 40 आन तियाआ तोड़ोमेहें रोत एखु काविंहीं खाय तो तियाआ आंगड़े तुवुहूं जोवे आन तो हांजेपोअ जांआं एठोज रोय; आन जो कोडो तियाआ तोड़ विसे तो बी तियाआ आंगड़े तुवुहूं जोवे आन तो हांजेपोअ जांआं एठोज रोय.

41 "आखी जातीइ धरतीपोर्‍येए होरतींडनारे जिवजन्तु सोगद्ये होय; ते ने खावाअहूं जोवे. 42 धरतीपोर्‍येए आखे होरतींडनारे जिवजन्तुमेहें रोत जेतेहे पोटावाअहीं नेताहां शार गुडावाअहीं सालतेहे, नेताहां वादार गुडावाले रोतेहे, तियांहां तुमू मा खाहा; काहाके तें सोगद्ये होय. 43 तुमू कोड्लाज होरतींडनारा जिवजन्तु वाअहीं सोताहा सोगद्ये मा कोअहा; आन तियांवाअहीं सोताहा एठे ओवीत कोइत सोगद्ये मा ओवहा. 44 काहाके आंय तुमाआ यहोवा देव होय; तियाहा काजे तुमू सोताहा सोके कोइत पवित्र बोणीत रोवा, काहाके आंय पवित्र होय. तियाहाकोत तुमू कोड्लीज जातीइ जिवजन्तु वाअहीं जे धरतीपोअ सालता इंडनारा वाअहीं सोताहा एठे मा ओवहा. 45 काहाके आंय यहोवा देव होय जो तुमुहूं मिसर देसोम रोत याआ कोअते काडीत लेतायुहू के आंय तुमाआ देव ठोरो; तिहींइं काजे पवित्र बोणा, काहाके आंय पवित्र होय."✝

46 जनवारोअ, सिड़ाआ, आन आखा पांअयोमेर्‍याआ जनवारोअ, आन धरतीपोअ आक्खा होरतींडनारा जनवारोअ बाप्तिमेहें ओज नियम होय. 47 या नियमोपोअ रोत एठो आन सोको तेहेंज कोइत खाअलाआ लायक जनवार आन ने खाअलाआ लायक एहेलोहो जनवार यांमेहें तुमुहूं फरक समजाअहूं जोवे.