लेवी 7

दोशोअ गाराहा

1 "फाश्याआ दोशोअ कोअते गाराहा कोइलोअ नियम ए होय. ओं जाअखो हाजो होय; 2 जिया जागापोअ गाराहा आपीइलोअ जनवारे माअतेहे, तियाज जागापोअ दोशोअ कोअते गाराहा जनवारोअ बी गाराहा आपुहूं जोवे, आन तियाआ रक्त पुंजारु देवान्याआ मेरेमेरे साटारुहूं जोवे. 3 आन तो तियामेर्‍यीइ पुरी सरबीही गाराहा आपुहूं जोवे, मोन्ज्ये तियाआ वोडी सेपटीही, आन जियी सरबी वाअहीं आते टापाइत रोतेहे ते बी, 4 आन बेनु किडनी आन जे कंबरेए जागेए सरबी रोहे ते आन किडनी नेहें कांअजाआ उपर्‍यीइ सरबी, यां आखाहा तो आलाग कोअहूं जोवे. 5 आन पुंजारु यांहां देवान्यापोअ यहोवा देवोअ कोअते गाराहा आपुहूं जोवे, ताहांजात ते दोशोअ काजे गाराहा ओवे. 6 पुंजारक्या मेर्‍याआ आक्खा माटी तियामेहें रोत खात सेकताहा; तों एखा सोका जागामेहें खावाअहूं जोवे; काहाके तों जाअखो सोको होय. 7 जेहेलीही पापोअ गाराहाआ कोअते होय तेहेलीज दोशोअ गाराहा बी होय, यीं बेनुउ एकुज नियम होय; जो पुंजारु ए गाराहा कोए तोज यीं वस्तुहू लेय. 8 आन जो पुंजारु एखाआ कोअते आगीइ गाराहा काजे इसे तियी आगीइ गाराहा जनवारोअ सांबड़ाहा तोज पुंजारु लेत लेय. 9 टोसवापोअ, नेताहां कोड़ायीम, नेताहां तोवामेहें रांदल्यी आक्खी ओनोअ भेट तियाज पुंजाराआ रोय जो तियीही इसेहे. 10 आन आक्खी ओनोअ भेट, जे तेल सान्बीत ओय, नेताहां उगाअली ओय, ते आरोनोअ आखा बेटाह्हाहां एक हारकी मिलुहूं जोवे.

होमजोणोअ गाराहा

11 "होमजोणोअ गाराहा, जियीही एखु यहोवा देवोअ कोअते भेट कोइलोअ नियम ए होय: 12 जर तो तियीही खुसीइ कोअते इसे, ताहां खुसीइ गाराहा आरी तेलोवाअहीं केलवीइल्या बिगर खमीरोअ रोटा, आन तेल हारीत रांदल्या बिगर खमीरवाला रोटा, आन तेलोवाअहीं केलवीइल्या मोयदाआ पुरी तेलोमेहें तोलीत काडल्यी इसजा. 13 आन तो तियाआ धन्यवादवाली होमजोण कोइलोअ गाराहा आरी खमीरोवाला रोटा बी सोड़वुहूं जोवे. 14 तो एहेला आखा इसल्या वस्तुमेहें रोत एकेक रोटू यहोवा देवोहो भेट कोइत सोड़वे; ते भेट होमजोण कोइलाआ कोअते गाराहाआ रक्त साटारनारा पुंजाराआ रोये. 15 आन तिया धन्यवादोअ काजे शांतीइ गाराहाआ माहां गाराहा कोइलोअ दिहीज खाअहूं जोवे; तियामेर्‍योअ किज बी वेगीइ जाआं ने रोअहूं जोवे. 16 पोन जर तियाआ गाराहा कोइलाआ आन पालनी कोइलाआ नेताहां सोताआ खुसीइ गाराहा ओय, ताहां ते गाराहा कोए तेदिहींज खावाअहूं जोवे, आन तियामेहें रोत जो उगरीत जाय तियाहा बिहीरे दिही खावाअहूं जोवे. 17 पोन जों किबी गाराहा कोअल्या माहोंमेहें रोत तिसरे दिही जाआं रोत जाय तों आगीमेहें पेटाड़ी देअहूं जोवे. 18 आन जर तियाआ होमजोणोअ गाराहाआ माहां उगऱ्योय तिहींम रोत किबी तिसरे दिही खादो, ताहां तों मान्य ने ओवे, पोन तों एठो काम सोमजाय, आन जों कोडो तियामेहें रोत खाय तियाआ पाप तियाआज बोसी रोय.

19 "जों माहां एखी एठी वस्तुउरी लागीत जाय तियाहा ने खाअहूं जोवे; तों आगीमेहें पेटाड़ी देअहूं जोवे. ताहरोअ गाराहा कोअल्यो माहां जेते सोके ओय तेंज खाअहूं जोवे; 20 पोन जों एठो ओत कोइत यहोवा देवोअ काजे गाराहा कोअल्या माहोंमेर्‍योअ खाय तियाहा तियांआं माअहूंमेहें रोत आरवी देअहूं जोवे. 21 आन जर एखु एखी एठी वस्तुहू आथलीत कोइत यहोवा देवोअ होमजोणोअ गाराहाआ माहां खाय, मोन्ज्ये ते माहुंउं एखु एठी गोठ, नेताहां एठो जनवार, नेताहां किज बी घाण वस्तु ओय, तियाहा बी तियांआं माअहूंमेहें रोत आरवी देवाअहूं जोवे."

22 फाश्योअ यहोवा देवे मोशेहे कोयो, 23 "इस्राएलवालाहां एहें कोइत को: तुमू बोलदोअ सरबी जाराक बी मा खाहा, आन मेडाआ नेताहां बोकड़ीइ सरबी बी मा खाहा. 24 आन जो जनवार तिया तियाआज मोइत जाय, आन जोंगल्या जनवारों वेतरीत टाकल्या जनवारोअ सरबी बिहीरा कामोम लागाड़जा, पोन तों जोलोम मा खाहा. 25 यहोवा देवोअ कोअते गाराहा कोइत इस्या कोअतेहे, तिया जनवारोअ सरबी जों कोडो खाय तियाहा तियाआ माअहूंमेहें रोत काडीत टाकुहूं जोवे. 26 आन तुमू तुमाआ कोअमेहें कोड्लीज बातीइ रक्त मा खाहा, तों सिड़ाआ ओय नेताहां जनवारोअ ओय. 27 हारेक माअहुंउं जो किहाआ बी रक्त खाय तियाहा तियाआ माअहोंमेहें रोत काडी देअहूं जोवे."✝7:27 उत्प 9:4; लेवी 17:10-14; 19:26; कायदा 12:16-23; 15:23

28 फाश्योअ यहोवा देवे मोशेहे कोयो, 29 इस्राएलवालाहां एहें कोइत को: जो यहोवा देवोअ कोअते होमजोणोअ गाराहा आपे, तो तियीज होमजोणोअ गाराहाम रोत यहोवा देवोअ जागे भेट लेतावुहूं जोवे; 30 तो तियाआज आथोवाअहीं यहोवा देवोअ गाराहा, मोन्ज्ये साती नेहें सरबीही लेतावुहूं जोवे, ताहां आलवीइलोअ भेट कोइत यहोवा देवोअ सामने आलवीत सेके. 31 आन पुंजारु सरबीही ते देवान्यापोअ पेटाड़े, पोन साती आरोनोअ आन तियाआ बेटाह्हाआ रोय. 32 फाश्योअ तुमू तुमाआ होमजोणोअ गाराहाम रोत हाजाड़्यी जांगेहे बी आखलीइलोअ भेट कोइत पुंजाराहा आपजा; 33 आरोनोअ बेटाह्हामेर्‍युउ जो होमजोणोअ गाराहाआ रक्त आन सरबीही सोड़वे हाजाड़्यी जांग बी तियाआज वाटु रोय. 34 काहाके इस्राएलवालाआ होमजोणो मेर्‍यीइ आलवीइलोअ भेटेए साती आन आखलीइलोअ भेटेए जांगेहे लेत कोइत आंये पुंजारा आरोनोहो आन तियाआ बेटाह्हाहां आप्यीही, काहाके ओं सादाज इस्राएलवालाआ वोगेहे रोत तियांआं हक्क जोड़ुहूं जोवे.

35 "जेदिहीं आरोन आन तियाआ पोर्‍याहा यहोवा देवोअ जागे पुंजाराआ पदोअ कोअते लेतावाअया, तेदिहींज यहोवा देवोअ गाराहामेहें रोत तियांआं ओज अभिशिक्त वाटु ठरवाअयु; 36 मोन्ज्ये जेदिहीं यहोवा देवे तियांआं अभिशेक कोअयू तेदिहींज तिये आदेश आप्यु के तियांहां इस्राएलवालाआ वोगेहे रोत ए भाग कायम मिलता रोअहूं जोवे; तियांआं पिड़ीन पिड़ीइ कोअते तियांआं ओंज हक्क ठरवाअयो."

37 ओनोअ भेट, पापोअ गाराहा, दोशोअ गाराहा, आगीइ गाराहा, पुंजारहांआं हानेए गाराहा, आन होमजोणोअ नियम एज होय; 38 जेहेलाम यहोवा देवे सिनाय डोगोअ जागर्‍याअ जंगलोम मोशेहे आदेश आप्यु के इस्राएली माआ कोअते की की गाराहा इसुहूं जोवे, ताहां तिये तियांहां एज नियम आप्याते.