लेवी 10

नादाब आन अबीहुउ पाप

1 ताहराअ नादाब आन अबीहू नावोअ आरोनोअ बेनु पोर्‍या जिवज्योअ धूपदान लेदू, आन तियांमेहें आग पोअयी, आन तियामेहें धुप टाकीत कोइत उपर्‍यीइ आगीही जियी आगीइ आदेश यहोवा देवे ने आप्युतो यहोवा देवोअ सामने अर्पण कोअयी. 2 ताहां यहोवा देवोअ सामने रोत आग निहींयी आन तियां बेनुहूं आरवी देदा, ते यहोवा देवोअ सामने मोइत गोया. 3 ताहां मोशे आरोनोहो कोयो, "ए तेज गोठ होय जे यहोवा देवे कोयीते के जो माआ आहने आवे, गरज होय के तो माहूं पवित्र माने, आन आखा माअहोंअ सामने तो माआ महिमा कोअहूं जोवे." आन आरोन ठावकुज रोयु.

4 ताहरुउ मोशे मिशाएल आन एलसापानोहों जे आरोनोअ काकुह्हू उज्जीएलोअ पोर्‍या ओता हादीत कोइत कोयो, "आहने आवा, आन तुमाआ पांअजुह्हू पवित्र जागाअ सामने रोत आखलीत कोइत तोंबाआ बारथे लेत जावा." 5 मोशेए या आदेशोअ परमाणे ते आहने जात कोइत तियांहां कोटेनहोट आखलीत कोइत तोंबाआ बारथे लेत गोया. 6 ताहरुउ मोशे आरोन आन तियाआ बेटाह्हां एलाजार आन ईतामारोहो कोयो, "तुमू तुमाआ मुन्काआ हेंवाअता मा वेसड़ाहा, आन तुमाआ आंगड़े मा फाड़हा, एहेलोहो ने ओवुहूं जोवे के तुमू बी मोइत जाहा आन पुरी मोंड्लीपोअ तियाआ खोत पोड़कीत उठे; पोन तें इस्राएलवालाआ कुल घराणाआ माअहें जें तुमाआ पाव्हीइले होय, यहोवा देवोअ लागाड़ल्यी आगीपोअ विखु कोए. 7 आन तुमू मिलापवाला तोंबाआ बारथे मा जाहा, एहेलोहो ने ओवुहूं जोवे के मोइत जाहा; यहोवा देवोअ अभिशेकोअ तेल तुमाअरी हारल्यो होय." मोशेए या आदेशोअ परमाणे तियां कोअयो.

पुंजारहांआं कोअते नियम

8 फाश्योअ यहोवा देवे आरोनोहो कोयो, 9 जाहां जाहां तु नेताहां ताआ पोर्‍या मिलापवाला तोंबाम आवहा ताहां ताहां तुमामेर्‍युउ एखु दाराक्शाआ होरु पिद्लू ने जोवे आन ने एखी जातीइ मोद,✝10:9 यहे 44:21 एहेलोहो ने ओवुहूं जोवे के तुमू मोइत जाहा; तुमाआ आवनारी पिड़ीन पिड़ीमेहें ओ नियम टिपाइत रोअहूं जोवे. 10 जियावाअहीं तुमू पवित्र आन सादामेहें, आन सोको आन एठामेहें फरक पालीत सेकहा, 11 आन इस्राएलवालाहा तियां आखा नियम सिकाड़ीत सेकहा जियांहां यहोवा देवे मोशेवाअहीं तियांहां कोत देदाहा.

12 फाशुउ मोशे आरोन आन तियाआ वासाअला पोर्‍या ईतामार आन एलाजारोहो बी कोयो, "यहोवा देवोअ गाराहामेहें रोत जे ओनोअ भेट उगर्‍यीही तियीही लेत कोइत देवान्याआ जागे विण खमीरोअ खावा, काहाके तों जाअखो सोको होय; 13 आन तुमू तियाहा एखा पवित्र जागामेहें खावा, तो यहोवा देवोअ गाराहा मेर्‍योअ ताआ आन ताआ बेटाह्हाआं भाग होय; काहाके माहूं एहेलुज आदेश जोड़्युहू.✝10:13 लेवी 6:14-18 14 पोन उतारल्यी भेटेए साती आन इसल्यी भेटेए जांगेहे तुमू, मोन्ज्ये तु आन ताआ पोर्‍ये आक्खेज एखा सोका जागामेहें खाजा; काहाके ते भेट इस्राएलवालाआ होमजोणोअ गाराहा ताहूं आन ताआ पोर्‍याअ भाग ठरवाअयुहू. 15 सरबीइ गाराहा नेहें जे इसल्यी जांग आन उतारल्यी साती यहोवा देवोअ सामने उतारीलोअ कोअते आया कोए, ओ भाग यहोवा देवोअ आदेशोअ पुरमाणे हादाजोल्म्युउ नियम ताआ आन ताआ पोर्‍याआ कोअते होय."✝10:15 लेवी 7:30-34

16 ताहरुउ मोशे पापोअ गाराहाआ बोकड़ाआ होदफुस कोअयी, ताहां की उनाअयु के तो पेटाड़ी देदुहू. तियाहा काजे एलाजार आन ईतामार जे आरोनोअ वासाअला पोर्‍या ओता तियांहां तो खोतेवाअहीं कोनु वोल्यु, 17 पापोअ गाराहा जे जाअखी सोकी होय आन जियीही यहोवा देवे तुमुहूं याआ कोअते आप्यीही के तुमू मोंड्लीइ पापोअ वोजू सोतापोअ आखलीत कोइत तियांआं कोअते यहोवा देवोअ सामने गाराहा कोआ, तुमू तियाआ माहां पवित्र जागामेहें काहा ने खादो?✝10:17 लेवी 6:24-26 18 पाला, तियाआ रक्त पवित्र जागाआ मायते ते लेतावाअयोज नाहां, ओं खोरीज गरजेए ओतो के तुमू माआ आदेशोअ परमाणे तों माहां सोका जागाम खाअलोअ ओतो.

19 आरोन मोशेहे एहें कोइत उत्तर आप्यो, "पाल, आजुज ते तियांआं पापोअ गाराहा आन आगीइ गाराहा यहोवा देवोअ सामने इश्यी ताहरीइ मापोअ एहेलिही ओड़सन*10:19 ओड़सन यहोवा देवे ने कोइलोअ कोत आदेश आप्युतो तियाहाकोत तियापोअ ओड़सन आयी. आवीत पोड़्यीही! तिहींइं कोअते जर आज आंय पापोअ गाराहाआ माहां खातु ताहां केहें ए गोठ यहोवा देवोअ सामने हाजी रोती के?" 20 जाहां मोशे ओं उनाअयु ताहां तियाहा खुसी ओवी.