लेवी 18

सुकीइ सबंदाआ बाप्तिम नियम

1 फाश्योअ यहोवा देवे मोशेहे कोयो, 2 "इस्राएलवालाहां को के आंय यहोवा तुमाआ देव होय. 3 जिया मिसर देसोमेहें तुमू रोतेते तिहींइं रुड़ीइ परमाणे तुमू मा सालहा; आन जिया कनान देसोम आंय तुमुहूं लेत जाहो तिहींइं रुड़ीइ परमाणे बी मा सालहा; आन तिहींइं नियमोपोअ मा बी सालहा. 4 माआंज नियमोपोअ सालजा, आन माआंज नियमोहो मानित कोइत तियांपोअ सालजा. आंय तुमाआ देव यहोवा होय. 5 तियाहा काजे तुमू माआं रिती आन माआं नियमोहो कायम पालन कोअजा; जों कोडो तियांआं पालन कोए तों जिवतो रोये. आंय यहोवा देव होय."✝18:5 नहे 9:29; यहे 18:9; 20:11-13; लुक 10:28; रोम 10:5; गलाती 3:12

6 तुमामेर्‍योअ कोडोज बी माहुंउं तियाआ आहनेए कोर्‍यीइ बोईंइरी हुवो ने जाअहूं जोवे. आंय यहोवा देव होय. 7 तु सोताआ आयहीइरी मा सुकही. ते ताआ आब्हाआ बोयोंअ होय; ते तोम ताआ आयही होये, तियाहा काजे तु तियीइरी सिनालो मा कोअही. 8 तु ताआ जिजीह्हीइरी बी सिनालो मा कोअही; काहाके ते बी आब्हाआज बोयोंअ होय.✝18:8 लेवी 20:11; कायदा 22:30; 27:20 9 तु सोताआ बोअह्हींइरी सिनालो मा कोअही, ते खाजगी ओय नेताहां जिजीह्हीइ पोऱ्यी ओय, ते कोअमेहें उब्ज्यी ओय नेताहां बारथे उब्ज्यी ओय.✝18:9 लेवी 20:17; कायदा 27:22 10 तु ताआ बेटाह्हाआ पोर्‍यीइरी नेताहां बेटिह्हीइ पोर्‍यीइरी हुवू मा जाही, काहाके ते ताआज पोर्‍यी होय. 11 ताआ जिजीह्हीइ जे ताआ आब्हाप रोत उब्ज्यीही, ते ताआ बोअह्हीं होये, तिहींइं कोअते तियीइरी हुवू मा जाही. 12 तु ताआ फुयीह्हीइरी हुवू मा जाही; काहाके ते ताआ आब्हाआ खाजगी कोर्‍यीइ होय. 13 तु ताआ आजलीह्हीइरी हुवू मा जाही; काहाके ते ताआ आयहीइ खाजगी कोर्‍यीइ होय. 14 तु काकाह्हाआ इज्जत मा जावाड़ही, मोन्ज्ये तियाआ बोईंइरी हुवू मा जाही; काहाके ते ताआ काकीह्ही होये.✝18:14 लेवी 20:19,20 15 तु ताआ वोवड़ीह्हीइरी हुवू मा जाही; काहाके ते ताआ बेटाह्हाआ लाडी होय, तिहींइं काजे तियीइरी सिनालो मा कोअही.✝18:15 लेवी 20:12 16 तु ताआ पाबीह्हीइरी हुवू मा जाही; काहाके ते ताआ पायहोअ डिल होये.✝18:16 लेवी 20:21 17 एखी बोईंइरी आन तियीइ बेटिह्ही बेनुउरी हुवू मा जाही, आन तियीइ बेटाह्हाआ पोर्‍यीही नेताहां बेटिह्हीइ पोर्‍यीही राखीत कोइत तियीइरी हुवू मा जाही; काहाके ते तियीइ खाजगी कोर्‍यीइ होय; एहेलोहो कोइलोअ वोडू पाप होय.✝18:17 लेवी 20:14; कायदा 27:23 18 तु ताआ लाडीइ बोअह्हींहीं सोताआ लाडी बोणावीत कोइत तियीइ होतिह्ही मा बोणावही, आन पेल्लीइ लाडीइ जिवताइज तियीही मा राखही.

19 "बोईंहीं मुन्सोलू आयुय, तेहेलाम तियीही राखीइलोअ कोअते तियीइ जागे मा जाही.✝18:19 लेवी 20:18 20 तु जागेवालाआ बोईंहीं राखीत कोइत एठु मा ओत जाही.✝18:20 लेवी 20:10 21 ताआ कोड्लाज पोर्‍याहा मोलेक देवताआ काजे गाराहा मा कोअही, एहलोहो कोइत तु ताआ यहोवा देवोअ नावोहो डाग मा लागाड़ही; आंय यहोवा देव होय.✝18:21 लेवी 20:1-5 22 बोईंहीं राखतेहे तेहें कोइत माट्योहो मा राखही; ए सोगदाय होय.✝18:22 लेवी 20:13 23 एखा जनवारोहो राखीत कोइत एठु मा बोणहीं, आन बोईं बी राखाइलोअ काजे काअला बी जनवारोअ जागे ने जाअहूं जोवे. ए ते उलटी गोठ होय.✝18:23 निर्ग 22:19; लेवी 20:15,16; कायदा 27:21

24 "एहेलेहे कोड्लेज बी कामे कोइत एठो ने ओवीइलो; काहाके जियां देसोहों आंय तुमाआ सामने रोत काडुहूं कोअहो, तें माअहें एहेलेहे आक्खे कामे कोइत एठे ओत गोयेहे; 25 आन तियांआं देस बी एठु ओत गोयुहू, तिहींइं काजे आंय तियांआं पापोअ डोंड आपोहो, आन तो देस तिहींइं माअहुंहूं उखलीत टाकेहे. 26 तियाहा काजे तुमू माआं गोठी आन माआं नियमोअ पालन कोअहूं जोवे. हारेक इस्राएलवालो ओय नेताहां पारको, तुमामेर्‍योअ कोडोज बी एहेलिही सोगदाय ने कोअहूं जोवे. 27 काहाके जें माअहें तुमारोत पेल रोतेहे तियां एहेले आखे सोगद्ये कामे कोअयेहे, तिहीं वाअहीं ओ देस एठु ओत गोयुहू. 28 जेहें कोइत तियां माअहुंहूं ये देसे उखलीत टाक्ये, तेहेंज कोइत तुमू तियाहा एठु कोअहा ताहां तो तुमुहूं बी ओगालीत टाके एहेलोहो ने ओवुहूं जोवे. 29 जें कोडे बी एहेलेहे सोगद्ये कामे कोए तियां आक्खाहा तियांआं माअहोंम रोत माइत टाकुहूं जोवे. 30 ए आदेश जे आंय तुमुहूं आप्याहा तियांहां तुमू पालन कोअजा; तुमा रोत आगाड़ी जे खाराब रिती सालू ओती, तेहेलेहे तुमू ने सालुहूं जोवे आन तियां वाअहीं एठे ने ओवुहूं जोवे; आंय तुमाआ यहोवा देव होय."