लेवी 24

पवित्र दिवाहा होबाड़ीइलो

1 यहोवा देवे मोशेहे कोयो, 2 "इस्राएलवालाहां ओ आदेश आप के माआं जागे उजालो आपीइलो काजे कुटीत कोइत काडल्यो जेयतुनोअ सोको तेल लेत आवजा, काहाके दिवू कायम पेटाअतु रोअहूं जोवे. 3 आरोन तियाहा, मिलापवाला तोंबाम, साक्शीपत्राआ विसमेर्‍याआ पोड़दाआ बारथे, यहोवा देवोअ सामने दाड़ीइ हांजेपोअ रोत्ते वेगीइ जाआं सोजाड़ीत मिकुहूं जोवे; ए तुमाआ पिड़ीन पिड़ीइ कोअते हादाजोल्म्यीइ रिती ठोरे. 4 तो दिवाआ सोका होनाआ खांबोपोअ यहोवा देवोअ सामने दाड़ीइ तियारीम मिकुहूं जोवे.

भेटेए रोटा

5 "तु मोयदाआ बारा रोटा रांदाड़जी, हारेक रोटामेहें एपाआ बेन दाहवा भाग मोयदो रोअहूं जोवे. 6 ताहां तियांआं बेन रांगी कोइत, एकी रांगीइ सोव सोव रोटा, सोका टेबलोपोअ यहोवा देवोअ सामने मिकजा.✝24:6 निर्ग 25:30; 39:36; 40:23 7 आन एकेकी रांगीम सोको गुगलाआ सिक मिकजा ताहां रोटाआ भेट यहोवा देवोअ काजे ओर कोइत आपनारी हाजी गुंदाअनारी वस्तु ओवे. 8 हारेक आरामोअ दिही तो तियाहा यहोवा देवोअ हुंबर ओलीज मिकुहूं जोवे, ए हादाजोल्म्याआ वायदाआ रिती इस्राएलवाला माअहोंअ तरफ से ओवती रोअहूं जोवे. 9 आन ते रोटा आरोनोअ आन तियाआ बेटाह्हाआ रोय, आन ते तियांहां एखा पवित्र जागाम खाअहूं जोवे, काहाके ते यहोवा देवोअ भेटेमेहें रोत हादाजोल्म्यीइ रितीइ परमाणे आरोनोअ कोअते जाअखी सोकी वस्तु ठोर्‍यीही."✝24:9 मत्तय 12:4; मार्क 2:26; लुक 6:4

देवोअ निंदाआ डोंड

10 एकवारी एकी इस्राएलवाली बायीइ बेटुह्हू, जियाआ आब्हू मिसरवालू माटी ओतू, तो इस्राएलवालाआ विसमेहें जातु रोयू; आन तियी बायीइ बेटुह्हू आन एक इस्राएलवालू माटी नेहें बेनू पोड़ावामेहें सुलाआ वोल्या. 11 आन तियी इस्राएलवाली बायीइ बेटुह्हू यहोवा देवोअ नावोअ निंदा कोइत हाराप आपू वोल्यू. ओं उनाइत कोइत माअहें तियाहा मोशेए जागे लेत गोये. तियाआ आयहीइ नाव शलोमीत ओतो, जे दानोअ पारवाड़ीइ दिब्रीइ बेटिह्ही ओती. 12 यहोवा देवोअ कि विसार होय तों मुंदू जाअहूं जोवे काजे तियां तियाहा नजरेमेहें मिक्यो.

13 ताहां यहोवा देवे मोशेहे कोयो, 14 "तुमू तिया हाराप आपनाराहा पोड़ावाआ बारथे लेतावा; आन जेत्ते जोएं ते निंदा उनाअये ओय तें आक्खे जिवज्योअ आथ तियाआ मुन्कापोअ मिकुहूं जोवे, ताहरेए आखी मोंड्लीइ माअहें तियाहा डोणाटुहूं जोवे. 15 आन तु इस्राएलवालाहा कोजी के कोडोज बी काहा नाहां रोतो, जों देवोहो हाराप आपे तियाहा तियाआ पापोअ वोजू आखलुहूं पोड़े. 16 यहोवा देवोअ नावोहो निंदा कोअनाराहा नक्की माइत टाकुहूं जोवे; पुरी मोंड्लीइ माअहें डोणाटुहूं जोवे; तो इस्राएलवालो ओय नेताहां पारको ओय, जर एखू देवोअ नावोअ निंदा कोए, ताहां तियाहा माइत टाकुहूं जोवे.

17 "जो एखा माहुंहूं माइत टाके ताहां तियाहा बी नक्की माइत टाकाअहूं जोवे.✝24:17 निर्ग 21:12 18 जों माहुंउं एखा पाल्ल्या जनवारोहो माइत टाके, ताहां तियाआ भरपाइ कोअहूं जोवे, मोन्ज्ये जिवोअ बोदले जिव आपुहूं जोवे.

19 "जर एखू एखा बिहीराहा दुखाड़े, ताहां जेहेलोहो तिये कोअयो तेहेलोज तियाअरी बी ओवे. 20 आडोअ बोदले आड मुड़ाय, डोआआ बोदले डोऊ, दातोअ बोदले दात, जेहेलोहो तिये बिहीराहा दुखाड़्यो तेहेंज कोइत तियाअरी बी ओवुहूं जोवे.✝24:20 निर्ग 21:23-25; कायदा 19:21; मत्तय 5:38 21 एखा जनवारोहो एखे माइत टाक्यो, ताहां माअनारो भरपाइ पोअहूं जोवे, पोन माहुंहूं माइत टाक्योय ताहां तियाहा बी नक्कीज माइत टाकुहूं जोवे. 22 जेहेलुहू देसोवालाआ कोअते तेहेलुहूज पारका माअहुंउं काजे बी तुमाआ नियम एक्कुज रोअहूं जोवे; आंय तुमाआ यहोवा देव होय."✝24:22 गणती 15:16 23 मोशे इस्राएलवालाहा ओं कोत देखाड़्यो; ताहां तिया हाराप आपनाराहा तें पोड़ावाआ बारथे लेत जात कोइत डोणाट्टीज माइत टाक्यो. आन एहें कोइत यहोवा देवे मोशेहे आदेश आप्यु तेहेंज कोइत इस्राएलवाला माअहूं कोअयो.