1 जेहेलाम आरोनोअ बेन पोर्‍या यहोवा देवोअ सामने आहने जात कोइत मोइत गोया, तिहींइं फासाड़ी यहोवा देवे मोशेएरी गोठी कोअयी; 2 आन यहोवा देवे मोशेहे कोयो, "ताआ पायहो आरोनोहों को, के शप्पतोअ पेटीइ उपर्‍याआ गाराहावाला टापणाआ आगाड़ी, विसमेर्‍याआ पोड़दाआ मायते, पवित्र जागामेहें जाहां ताहांज ने फोहे तेहें, ने ते तो मोइत जाय; काहाके आंय गाराहावाला टापणाआ उपोअ वाद्लामेहें देखाअहीं.✝ 3 जेहेलाम आरोन पवित्र जागाम फोहे तेहेलाम एहें कोइत फोहे, मोन्ज्ये पापोअ गाराहा कोअते एका गोदाहा आन आगीइ गाराहा कोअते एका मेडाआ गिद्लाहा लेत कोइत आवुहूं जोवे. 4 तो हुत्राव साअकाहा पवित्र कोट पोवीत, आन तियाआ डिलोपोअ हुत्राव साअकाआ साड्डो पोवीत कोइत फोहुंहूं जोवे; एं सोके साअके होय, आन तो पाअयोंवाअहीं उंगलीत कोइत एं साअके पोवुहूं जोवे. 5 फाशुउ तो इस्राएलवालाआ मोंड्लीइ जागे रोत पापोअ कोअते गाराहा कोत बेन बोकड़ा आन आगीम गाराहा कोइलोअ कोअते एक मेडो लेअहूं जोवे. 6 आन आरोन तिया पापोअ गाराहा गोदाहा जो तियाआज कोअते होय इसीत कोइत तियाआ आन तियाआ घराणाअ कोअते गाराहा कोअहूं जोवे. 7 आन तियां बेनु बोकड़ाहा तोइत कोइत मिलापवाला तोंबाआ बाओअ जागे यहोवा देवोअ सामने उबा कोअहूं जोवे; 8 आरोन बेनु बोकड़ापोअ सिट्टी टाके, एक सिट्टी यहोवा देवोअ कोअते बिहीरी अजाजेलोअ* कोअते रोय. 9 आन जिया बोकड़ापोअ यहोवा देवोअ नावोअ सिट्टी निहे, तियाहा आरोन पापोअ कोअते गाराहा कोत सोड़वुहूं जोवे; 10 पोन जिया बोकड़ापोअ अजाजेलोअ कोअते सिट्टी निहे तो यहोवा देवोअ सामने जिवताहाज उबु राखुहूं जोवे, आन तियाहा इसीत अजाजेलोअ कोअते रानोम सोड़ी देअहूं जोवे."

11 "आरोन तियी पापोअ गाराहाआ गोदाहा जो तियाआज कोअते रोय आहने लेतावुहूं जोवे, आन तियाहा इसीत कोइत सोताआ आन सोताआ घराणाआ कोअते पास्तावू कोअहूं जोवे. 12 आन जो देवान्यो यहोवा देवोअ सामने होय, तियापोअ पेटाअत्ला आरा वाअहीं पोअल्या देवान्यापोऱ्योअ तुम्हावीइलोअ बासन लेतावीत, तिहींम आंजोअ पोइत कुटीत सिणो कोअल्यी हाजी गुंदाअनाइरी वस्तु विसमेर्‍याआ पोड़दाआ मायते लेतावुहूं जोवे. 13 तियी वस्तुहू यहोवा देवोअ सामने आगीमेहें एहें कोइत टाकीइली के तिया तुमाणावाअहीं साक्शीपत्राआ उपोअ पास्तावाआ टापणाआ उपोअ टापात जाअहूं जोवे, ताहां तो ने मोए; 14 ताहरुउ तो बासाआ रक्ताम रोत जाराक लेत कोइत उक्तामाअहें पास्तावाआ टापणाआ उपोअ तियाआ आंगल्यी वाअहीं साटारुहूं जोवे, आन फाश्योअ तिया रक्ताम रोत जाराक आंगल्यी वाअहीं तिया टापणाआ सामने बी हांत वारी साटारुहूं जोवे. 15 फाशुउ तो तिया पापोअ गाराहा बोकड़ाहा जो माअहोंअ कोअते गाराहा कोइलोअ होय तियाआ रक्त विसमेर्‍याआ पोड़दाआ मायते लेतावुहूं जोवे, आन जेहें कोइत तिये बासाआ रक्तावाअहीं कोअयोतो तेहेंज कोइत तो बोकड़ाआ रक्तावाअहीं कोअहूं जोवे, मोन्ज्ये तियाहा पास्तावाआ टापणापोअ आन तियाआ सामने साटारुहूं जोवे.✝ 16 आन तो इस्राएलवाला माअहोंअ एठायीइ आन गुनाआं, आन तियांआं आक्खा पापोअ वाखरी सोका जागाआ कोअते पास्तावू कोअहूं जोवे; आन मिलापवाला तोंबाआ काजे बी तेहेंज कोइत कोअहूं जोवे जो माअहोंमेहें रोतामेहें एठायीमेहें रोहे. 17 जेहेलाम आरोन पास्तावू कोइलाआ कोअते पवित्र जागामेहें फोहे, तोयोंअ रोत जाअहूं जाआं तो सोताआ आन तियाआ घराणाआ आन इस्राएलवालाआ पुरी मोंड्लीइ कोअते पास्तावू कोइत बारथे ने निहे, ताअहूं जाआं कोड्लोज माहुंउं मिलापवाला तोंबाम ने रोअहूं जोवे. 18 फाशुउ तो निहीत कोइत तिया देवान्याआ जागे जात यहोवा देवोअ सामने तियाआ कोअते पास्तावू कोअहूं जोवे, तो बासाआ रक्त आन बोकड़ाआ रक्त बेनुमेर्‍योअ जाराक लेत कोइत तिया देवान्याआ शारु खुणाआ हिंगोअरी लागाड़ुहूं जोवे. 19 आन तिया रक्तामेर्‍योअ जाराक तियाआ आंगल्यी वाअहीं हांत वारी तियापोअ साटारीत कोइत तियाहा इस्राएलवाला माअहोंअ एठायीम रोत सोड़वीत कोइत सोको आन पवित्र कोअहूं जोवे."

20 "जेहेलाम तो पवित्र जागाआ आन मिलापवाला तोंबाआ आन देवान्याआ कोअते पाप टाप्यो, तेहेलाम जिवता बोकड़ाहा आगाड़ी लेतावयू; 21 आरोन तियाआ बेनु आथ तिया जिवता बोकड़ाआ मुन्कापोअ मिकुहूं जोवे, आन इस्राएलवाला माअहोंअ आखे खाराब कामे, तियांआं आखा गुना आन पाप कबलुहूं जोवे, आन तियांहां तो तिया बोकड़ाआ मुन्कापोअ टाकी देत तिये ठरीवल्या माहुंउं आथे, तिया बोकड़ाहा उजाड़ीम सोड़ी देअहूं जोवे. 22 तो बोकड़ू तियां आखाआ पापोअ वोजू सोतापोअ आखलीत एखा हुंड्ला जागामेहें लेत जाये; तो माहुंउं तिया बोकड़ाहा उजाड़ीमेहें सोड़ी देअहूं जोवे."

23 ताहरुउ आरोन मिलापवाला तोंबाम आवुहूं जोवे, आन जें हुत्राव आंगड़े पोवित कोइते तिया पवित्र जागामेहें फोहयुतो तें काडीत कोइत तिहींज मिकी देअहूं जोवे.✝ 24 आन तो एखा सोका जागामेहें पाअयों वाअहीं उंगलीत कोइत तियाआ बिहीरे आंगड़े पोवित लेत बारथे जात कोइते सोताआ काजे आन माअहुंउं आगीइ गाराहा इसीत कोइत पापोहो टापे. 25 आन पापोअ गाराहा सरबीही तो देवान्यापोअ पेटाड़ुहूं जोवे. 26 आन जों माहुंउं अजाजेलोअ कोअते गाराहाआ बोकड़ू रानोमेहें सोड़ो लेत गोयोय तों बी सोताआ आंगड़े तुवुहूं जोवे, आन पाअयोंवाअहीं उंगलुहूं जोवे, ताहांजात तों पोड़ावामेहें फोहुंहूं जोवे. 27 पापोअ गाराहा जिया बासाआ आन बोकड़ाआ रक्त सोका जागाम पास्तावू कोइलाआ कोअते लेत गोयेय, तियां बेनुहूं पोड़ावाआ बारथे लेत जाअहूं जोवे आन तियांआं साम्बड़ोन, माहां, आन साआं आगीमेहें पेटाड़ी देअहूं जोवे.✝ 28 जों तियांहां पेटाड़े तों सोताआ आंगड़े तुवुहूं जोवे, आन पाअयोंवाअहीं उंगलुहूं जोवे, तिहींइं फासाड़ी पोड़ावामेहें फोहुंहूं जोवे.

29 तुमाआ कोअते हादाजोल्म्युउं नियम ओ होय: सांतवा मोयनाआ दाहवा दिहोम तुमू रोटू मा खाहा, जिवज्योअ जिवोहो तारास देजा, आन तेदिहीं तों कोर्‍योअ माहुंउं ओय नेताहां तुमाआ विसमेहें रोनारो पारको माहुंउं ओय, पोन तों कोड्लोज वोतो ने कोअहूं जोवे; 30 काहाके तेदिहीं तुमुहूं सोके कोइलाआ काजे तुमाआ वाखरी पाप टापाय; आन तुमू आखा पापोम रोत यहोवा देवोअ सामने सोके ठोरहा. 31 ओ तुमाआ कोअते वोडू आरामोअ दिही होय, आन तेदिहीं तुमू उपास कोअजा, जिवज्योअ जिवोहो तारास देजा; ओ हादाजोल्म्युउं नियम होय. 32 आन जियाआ सोताआ आब्हाआ जागापोअ पुंजारु कोत निवड़ कोइत अभिशेक आन सोको कोआय तो पुंजारु पाप टाप्या कोअहूं जोवे, मोन्ज्ये तो हुत्राव पवित्र आंगड़े पोवित कोइत पाप टाप्या कोए. 33 तो पवित्र जागाआ, मिलापवाला तोंबाआ आन देवान्याआ कोअते पाप टापुहूं जोवे; आन पुंजारा आन मोंड्लीइ आखा माअहोंअ बी पाप टापुहूं जोवे. 34 इस्राएलवाला माअहोंअ कोअते वोरह्योअ डिठ एकवारी आक्खा पापोअ काजे पास्तावू कोअहूं जोवे कोत ओ तुमाआ कोअते हादाजोल्म्युउं नियम रोय. यहोवा देवोअ कोल्याआ परमाणे मोशे कोअयो.✝