1 "जाहां एखो यहोवा देवोअ कोअते ओनोअ भेट आपनारो ओय, ताहां तों मोयदो आपुहूं जोवे; आन तियापोअ तेल टाकीत कोइत तियापोअ गुगलाआ सिक मिकुहूं जोवे; 2 आन तो तियाहा आरोनोअ पोर्‍याआं जागे जे पुंजारु होय, तियाआ लेतावुहूं जोवे. आन तो तिया ओनोअ भेटेए तेलोमेहें सान्बीइल्या मोयदामेहें रोत एहें कोइत तियाआ मुठ पोइत काडे के पुरु गुगलाआ सिक तियामेहें आवे; आन पुंजारु तियांहां ओर कोइत आपनारा भागोअ कोअते देवान्यापोअ पेटाड़े के ओं यहोवा देवोअ कोअते हाजो गुंदाअनारो गोमे एहलोहो गाराहा ठोरे. 3 आन ओनोअ भेटेमेहें रोत जो उगरे तो आरोनोअ आन तियाआ पोर्‍याआं ठोरे; ओ यहोवाअ गाराहामेहें रोत जाअखू सोकू भाग रोये.

4 "जाहां तु ओनोअ भेट कोइलोअ कोअते टोसवापोअ रांद्ल्यू रोटू भेट आपही, ताहां तो तेलोवाअहीं केलवीइल्या बिगर खमीरोवालू मोयदाआ रोटू, नेते तेलोवाअहीं लाटल्या विण खमीरोअ रोटा रोअहूं जोवे.

5 "आन जर ताआ गाराहा तोवापोअ रांदल्यू रोटाआ भेट ओय, ताहां तो तेलोवाअहीं केलवीइल्या विण खमीरोवाला मोयदाआ रोअहूं जोवे. 6 तियाहा तुकड़ा तुकड़ा कोइत तियापोअ तेल टाकजी, ताहां तो ओनोअ भेट ओत जाय. 7 आन जर ताआ गाराहा कोड़ायीमेहें तोल्ल्यो ओनोअ गाराहा ओय, ताहां तों मोयदा वाअहीं तेलोमेहें बोणावजा. 8 आन जे ओनोअ भेट यां वस्तुमेहें रोत एखाआ बोण्यो ओय, ताहां तियाहा यहोवाअ जागे लेत जाजा; आन जाहां तो पुंजाराआ जागे लेतावे, ताहरुउ पुंजारु तियाहा देवान्याअ आहने लेत जाये. 9 आन पुंजारु ओनोअ भेटेमेहें रोत ओर कोइत आपनारु भाग काडीत कोइत देवान्यापोअ पेटाड़े के तो यहोवा देवोअ कोअते खुसीइ हाजी गुंदाअनारी भेट ठोरे; 10 आन ओनोअ भेटेमेहें रोत जो उगरे तो आरोन आन तियाआ पोर्‍याआं ठोरे; तो यहोवा देवोअ भेटेमेहें जाअखू सोकू भाग रोय.

11 "एखु ओनोअ भेट जियाहा तुमू यहोवा देवोअ कोअते आपहा, खमीर सान्बीत कोइत मा बोणावहा; तुमू भेटेमेहें यहोवा देवोअ कोअते खमीर आन मोद आगीम कोयोंज मा पेटाड़हा. 12 तुमू यांहां पेल्लीइ कामायीइ भेट कोइत यहोवा देवोअ कोअते सोड़वीइजा, पोन ते खुसीइ हाजी गोंदेए कोअते देवान्यापोअ सोड़वुहूं ने जोवे. 13 ताहराआ तुमाआ आक्खी ओनोअ भेटेमेहें खारो सान्बीइजा; आन तुमाआ एक बी ओनोअ भेट तुमाआ देवोअ आथवसनोअ बिगर खारो मा रोअहूं देहा; तुमाआ आखी भेटेएरी खारो बी सोड़वीइजा.

14 "जर तू यहोवा देवोअ काजे पेल्लीइ कामायीइ ओनोअ भेट सोड़वीही, ताहां ताआ पेल्लीइ कामायीइ ओनोअ भेटेए कोअते आगीमेहें पुजल्ये निले निले कोहें, मोन्ज्ये निला कोहांहां सोलीत कोइत दाणा काडीत लेजी, आन तियांहां ओनोअ भेट कोत सोड़वीइजी. 15 आन तियामेहें तेल टाकजी, आन तियापोअ गुगलाआ सिक मिकजी; ताहां तो ओनोअ भेट ओत जाय. 16 आन पुंजारु सोलीत कोइत काडल्या दाणाहां, आन तेलोहो, आन पुरा गुगलाआ सिकोहो ओर कोइत आपनारु भाग कोत पेटाड़ी देअहूं जोवे; तो यहोवा देवोअ कोअते भेट ठोरे."