लेवी 22

भेटेए सोकाय

1 यहोवा देवे मोशेहे कोयो, 2 "आरोन आन तियाआ बेटाह्हाहा को, के इस्राएलवालाआ सोकी कोआली वस्तुप रोत, जियींहीं तें माआ काजे सोकी कोअतेहे तियीं रोत आलाग रोअहूं जोवे, आन माआ सोका नावोहो एठो ने कोअहूं जोवे; आंय यहोवा देव होय. 3 तियांहां को, के तुमाआ पिड़ीन पिड़ीमेहें तुमाआ पुरी पारवाड़ीम रोत जों कोडो सोताआ एठो ओय, आन तों तियीं पवित्र कोआली वस्तुउ जागे जाय, जियींहीं इस्राएलवाला माअहूं यहोवा देवोअ काजे सोकी कोअयी ओय, ताहां तिया माहुंहूं माआ सामने रोत आरवी देवाय; आंय यहोवा देव होय. 4 आरोनोअ पारवाड़ी मेर्‍योअ कोडोज बी काहा नाहां रोतो, तों वोडा दुखोवालो ओय, नेताहां तों माअहुंउं जाअहूं जाआं सोको ने ओत जाय ताअहूं जाआं सोकी कोआली वस्तुमेहें रोत किज ने खाअहूं जोवे. जों तोड़ोवाअहीं एठो ओवयो ओय, नेताहां जियाआ उमरपाईं वेराअयो ओय, एहेलाहा माहुंहूं जों कोडो टेके, 5 नेताहां जों कोडो होरतींडनारा जिवतोरोहो आथले जिहींवाअहीं माहुंउं एठो ओवतेहे, नेताहां एखा एहेला माहुंहूं आथले जियामेहें एखी जातीइ एठाय ओय जे तियाहा बी लागीत सेकतीही. 6 ताहां जों माहुंउं यांमेर्‍याआ किहाहा बी आथले, तों हांजेपोअ जाआं एठो रोअहूं जोवे, आन जाअहूं जाआं तो माहुंउं पाअयोंवाअहीं ने उंगलीत लेय, ताअहूं जाआं कोड्लीज सोकी वस्तुहू ने खाअहूं जोवे. 7 ताहरोअ दिही बुडे ताहांज तों सोको ठोरे; आन ताहांजात तो पवित्र वस्तुमेहें रोत खात सेकेहे, काहाके तियाआ रोटू तोज होय. 8 जों जनवार तिया तियाआज मोअयो, नेताहां एखे जनवारे वेतरीइल्यो ओय तियाहा खात कोइत तों एठो ने ओवुहूं जोवे; आंय यहोवा देव होय. 9 तियाहा काजे पुंजारु माअहुंहूं माआ आपल्या नियमोंअ पालन कोअहूं जोवे, एहेलोहो ने ओवुहूं जोवे के ते तियीं वस्तुहू एठी कोए ताहां तियांहां पापोअ वोजू उसलुहूं पोड़े, आन तिहींइं वाखरी ते मोइत बी जाय; आंय तियांआं पवित्र कोअनारु यहोवा देव होय.

10 "बिहीरा ओजाण्यो माहुंउं एखी सोकी वस्तुहू ने खाअहूं जोवे, तों पुंजाराआ होगवाड़्यो ओय नेताहां मोजर्‍यो ओय, तेबी तों तियी सोकी वस्तुहू ने खाअहूं जोवे. 11 जर पुंजारु एखा माहुंहूं पोशा आपीत वेसातो लेदो ओय, ताहां तो माहुंउं तियाम रोत खात सेकेहे; आन जें पुंजाराआ कोअमेहें उब्ज्ये ओय ते बी तियाआ रोटाम रोत खात सेकतेहे. 12 जर पुंजाराआ पोर्‍यी बिहीरा कुलोअ एखा माट्योअरी वेहवाल कोअयो ओय, ताहां ते भेट कोआली सोकी वस्तुहू ने खाअहूं जोवे. 13 जर पुंजाराआ बेटिह्ही रोंडाअली नेताहां टाकाअली ओय, आन ते पोऱ्ये ने ओय आन आब्हाआ कोअमेहें रोती ओय, ताहां ते तियीइ आब्हाआ रोटू खात सेकेहे; पोन बिहीरी पारवाड़ीइ एखु माहुंउं तिहींम रोत ने खाअहूं जोवे. 14 आन जर एखु माहुंउं एखी पवित्र वस्तुमेहें रोत वाजिहीं सुकवात खात लेय, ताहां तों तियाआ पास भाग वादाड़ीत कोइत तियाहा पुंजाराहा पोइ देअहूं जोवे. 15 ते इस्राएलवालाआ सोकी कोअल्यी वस्तुहू, जियींहीं ते यहोवा देवोअ काजे अर्पण कोए, तियीही एठी ने कोअहूं जोवे. 16 ते तियांआं पवित्र वस्तुमेहें रोत खावाड़ीत कोइत तियांहां बी पापोअ वोजू ने उसलाड़ुहूं जोवे; आंय तियांआं पवित्र कोअनारु यहोवा देव होये"

17 फाशुउ यहोवा देव मोशेहे कोयो, 18 "आरोनोहों आन तियाआ बेटाह्हाआ आन इस्राएलवालाहा समजाड़ीत कोइत को, के इस्राएलवालाआ घराणे नेताहां तियांआं विसमेहें रोनारो एखु पारको माहुंउं काहा नाहां रोतो, जों पालनी नेताहां यहोवा देवोहो एखु आगीइ गाराहा सोड़वे, 19 ताहां सोताहा मान्य ओवुहूं जोवे काजे निर्दुस पाल्ल्ये जनवार नेताहां मेडु, नेताहां बोकड़ू गाराहा कोअहूं जोवे. 20 जियामेहें वाजिहीं बी खामी रोय ताहां तियाहा अर्पण मा कोअहा; काहाके तों तुमाआ काजे मान्य ने ओवनारो.✝22:20 कायदा 17:1 21 आन जों एखो माहुंउं पालनीम नेताहां खुसी कोइत यहोवा देवोहो पाल्ल्ये नेताहां मेडा-बोकड़ामेहें रोत गाराहा सोड़वे, ताहां मान्य ओवे एहलोहो निर्दुस जोवे, तियामेहें किज बी वांदो ने रोअहूं जोवे. 22 जो डिल आंदलो, मुड़ाअलो, लुलो, नेताहां डिलोपोअ मोहो, फोड़क्ये नेताहां खोरज्यो ओय, एहेलोहो यहोवा देवोअ काजे अर्पण मा कोअहा, तियांहां देवान्यापोअ यहोवा देवोअ काजे गाराहा ने कोअहूं जोवे. 23 जिया पाल्ल्ये नेताहां मेडाआ, नेताहां बोकड़ाआ एखु डिलोअ भाग वादार नेताहां हानो-वोडो ओय, ताहां तियाहा खुसी कोइत आपनारो गाराहा सोड़वीत सेकेहे, पोन पालनी पुरी कोइलोअ काजे तों ने मान्य ओवे. 24 जियाआ जिला दाबाअला नेताहां टेपरीइल्या, नेताहां टुटला, नेताहां सिराइत गोयाय, ताहां तियाहा यहोवा देवोअ काजे गाराहा ने कोअहूं जोवे, आन तुमाआ देसोमेहें बी एहेलेहे कामे मा कोअहा. 25 यांमेर्‍येए कोडाहा बी तुमू तुमाआ देवोअ रोटू जांइत कोइत एखा पारका माअहूं पोअ रोत लेत कोइत बली मा कोअहा; काहाके तियांम काविहीं वांदो होय, ते दुखाअले होय, तिहींइं काजे ते तुमाआ वाखरी मान्य ने ओवे."

26 फाशुउ यहोवा देव मोशेहे कोयो, 27 "जेहेलाम वासड़ो, मेडाआ गिद्लो नेताहां बोकड़ीइ बासो विआंय, ताहां तों तियाआ आयहीइरी रोअहूं जोवे; ताहरोअ तों आंठवा दिहोअरी रोत आगाड़ी यहोवा देवोअ कोअते गाराहा कोत मान्य ओवे. 28 पाल्ल्या जनवारोमेहें रोत नेत मेडू, नेताहां बोकड़ी ओय, तियीही आन तियीइ गोदाहा एक्काज दिहोम गाराहा मा कोअहा. 29 आन जेहेलाम तुमू यहोवा देवोअ काजे धन्यवादोअ गाराहा आपहा, ताहां तियाहा एहेंज कोइत कोअजा, जियावाअहीं तो मान्य ओवे. 30 तियाहा तेदिहींज खावाअहूं जोवे, तियामेर्‍योअ वाजिहीं बी वेगीइ जाआं ने रोअहूं जोवे; आंय यहोवा देव होय.

31 "तियाहा काजे तुमू माआं आदेश मानजा आन तियाआ पालन कोअजा; आंय यहोवा देव होय. 32 आन माआं सोका नावोहो तुमू खाराब मा कोअहा, काहाके इस्राएलवालाआ विसमेहें आंय खोरीज सोकू मानाअहीं; आंय तुमाआ सोकू कोअनारु यहोवा देव होय. 33 तुमाआ देव ओवीइलोअ काजे आंय तुमुहूं मिसर देसोम रोत काडीत लेतावयू; आंय यहोवा देव होय."