1 यहोवा देवे मोशेहे कोयो, 2 "इस्राएलवालाहा को: जर बोईं पोटाअरी रोत कोइत सोआहा जल्म आपेहे, ताहां ते हांत दिही जाआं एठी रोअहूं जोवे; जेहें कोइत ते मुन्सोलु आवेहे ताहां एठी गोणतेहे तेहेंज कोइत ते एठी गोणाय. 3 आन आंठवे दिही पोर्‍याआ खतना कोअहूं जोवे.✝ 4 ताहरीइ ते बोईं तियीइ रक्त वोहीइलोअ तारासोम सोकी ओवे ताअहूं जाआं तेहेंतीस दिही आलाग रोअहूं जोवे; आन जाअहूं जाआं तियीइ सोकायीइ दिही पुरा ने ओत जाय ताअहूं जाआं कोड्लीज सोकी वस्तुहू ते आथ ने लागाड़ुहूं जोवे, आन ने सोकी जागे जाअहूं जोवे. 5 आन जर तियीइ सोई उब्जे, ताहां मुन्सोलाआ होस ते शोवदा दिही जाआं एठी रोय; आन फाश्यीइ रक्त वोहीइलोअ तारासोम रोत सोकी ओवीइलोअ काजे साहासाट दिही जाआं आलाग रोअहूं जोवे.

6 "जाहां तियीइ सोकायीइ दिही पुरा ओत जाय, ताहां तियीइ सोऊ ओवे नेताहां सोई ओवे, गाराहा कोइलोअ कोअते एका वोरह्योअ मेडाआ बासो, आन पापोअ कोअते पेरवाआ एक पिलो नेताहां ओलाआ एक पिलो मिलापवाला तोंबाआ बाओ पोअ पुंजाराआ जागे लेतावुहूं जोवे. 7 ताहरुउ पुंजारु तियाहा यहोवा देवोअ सामने भेट इसीत कोइत तियीइ कोअते पास्तावू कोए; आन ते तियीइ रक्त वोहीइलाआ एठायीप रोत सुटीत कोइत सोकी ठोरे. जियी बोईंइ सोऊ नेत सोई उब्जे, तियीइ कोअते ओज नियम होय. 8 आन जर तियीही मेडो नेत बोकड़ो ने पुरवाअतो ओय, ताहां पेरवाआ नेताहां ओलाआ बेन पिले, एकाहा ते आगीइ गाराहा आन बिहीराहा पापोअ वोतीइ गाराहा कोइलोअ कोअते आपुहूं जोवे; आन पुंजारु तियीइ कोअते गाराहा कोअहूं जोवे, ताहांजात ते सोकी ठोरे."✝