लेवी 27

देवोअ खास भेटेए बाप्तिम नियम

1 यहोवा देवे मोशेहे कोयो, 2 इस्राएलवालाहां ओं कोजी के जर एखू खास पालनी तोए, ताहां पालनी तोअल्ये माअहें ताआ ठोरवीइल्याआ पुरमाणे यहोवाआ रोय; 3 तियाहा काजे जर तो माटी होय आन विही रोत ते साट वोरह्योअ विसमेहें होय, ताहां पवित्र जागाआ तोलाआ परमाणे तियाआ किम्मत पोन्नास शेकेल रोअहूं जोवे. 4 जर ते बोईं ओय, ताहां तिस शेकेल ठोरवीइजा. 5 फाश्योअ जर तियाआ वय पास वोरह्ये रोत ते विही वोरह्यों रोत हानो ओय, ताहां सोआअ काजे विही शेकेल, आन सोईइ काजे किम्मत दोहो शेकेल ठोरवीइजा. 6 जर तियाआ वय एक मोयनु नेताहां तिया रोत वादार पास वोरह्योम रोत कम ओय, ताहां सोआआ काजे पास शेकेल, आन सोईइ काजे तिन शेकेल ठोरवीइजा. 7 जर तियाआ वय साट वोरह्ये नेताहां तियाआ रोत वादार ओय, ताहां माट्योअ किम्मत पोंद्रा शेकेल, आन बायीइ किम्मत दोहो शेकेल ठोरवीइजा. 8 पोन जर एखू एतोहो गरीब ओय के पुंजारे ठोरवीइल्यी किम्मत ने आपीत सेके, ताहां तो माहुंउं पुंजाराआ सामने हुजुर ओवुहूं जोवे, आन पुंजारु तियाआ किम्मत ठोरवुहूं जोवे; जेतोहो तिया पालनी तोअनाराहा पुरवाअतो ओय, पुंजारु तियाआज परमाणे ठोरवुहूं जोवे.

9 "जियां जनवारोमेहें रोत माअहें यहोवा देवोहो गाराहा इसतेहे, जर एहेलाहा मेर्‍याआ एखू पालनी तोए, ताहां जों जनवार यहोवा देवोहो आपे तियाहा सोको सोमजुहूं जोवे. 10 तियाहा ने बोदलुहूं जोवे, आन बाक्ताआ बोदले हाजो आन हाजाआ बदले बाक्तो आपे एहलोहो ओद्ला-बोदल ने कोअहूं जोवे; आन जर तों तिया जनवारोअ बोदले बिहीरो जनवार आपे, ताहां तों जनवार आन तियाआ बोदले बिहीरो बेनु बी सोके होय कोत समजुहूं जोवे. 11 आन जियां जनवारोमेहें रोत माअहें यहोवा देवोअ काजे गाराहा नाहां कोअते, एहेलाहा मेर्‍योअ जर तों ओय, ताहां तो तियाहा पुंजाराआ सामने हुजुर कोअहूं जोवे. 12 ताहरुउ पुंजारु जनवारोअ हाजा-बाक्ता गुण विसारोम लेत कोइत तियाआ किम्मत ठरवे; आन जेतीही किम्मत पुंजारु ठरवे, तेतीहीज मानुहूं पोड़े. 13 पोन जर पालनी मिकनारो माहुंउं तियाहा सोड़वुहूं होदतो ओय, ताहां जे किम्मत पुंजारे ठोरव्यी ओय तियीमेहें तियीइ पासवू भाग फाश्युउ वादाड़ीत कोइत आपुहूं जोवे."

14 "फाश्योअ जर एखू तियाआ कोओ यहोवा देवोअ काजे सोको ठोरवीत कोइत पालनी मिके, ताहां पुंजारु तिया कोओअ हाजा-बाक्ता गुणोहो विसारोम लेत कोइत तियाआ किम्मत ठोरवुहूं जोवे; जेतीही किम्मत पुंजारे ठोरव्यी तियाआ किम्मत तेतीहीज मानुहूं जोवे. 15 आन जर कोओअ सोको कोअनारो तियाहा सोड़वुहूं होदे, ताहां जेतीही किम्मत पुंजारे ठोरव्यी ओय, तियीमेहें तियी किमतेए पासवू भाग वादाड़ीत कोइत आपुहूं जोवे, ताहरोअ कोओ तियाआ ओत जाय."

16 "जर एखू तियाआ खाजगी जागाआ एखू भाग यहोवा देवोअ काजे सोकू ठोरवीइनारो ओय, ताहां तियाआ किम्मत याआ परमाणे ठोरे के तियामेहें केतुहू बियारु पोड़ेहे; जेतीही तिया जागामेहें होमेर*27:16 होमेर एका होमेरोमेहें पन्नास शेकेल दाणा. गोंवें पोड़े तेतीही जागाआ किम्मत ठोरुहूं जोवे. 17 जर तो तियाआ खेत जुबलीइ वोरह्योअरी सोको ठोरव्योय, ताहां तिया खेतोअ किम्मत ताआ ठोरवीइल्याआ परमाणे ठोरे; 18 आन जर तो तियाआ खेत जुबलीइ वोरह्योअ फासाड़ी सोको ठरवे, ताहां जेतेहे वोरह्ये बिहीरा जुबलीइ वोरह्ये बाकी रोयेय तियांआं परमाणे पुंजारु तियाआ काजे पोश्याआ किम्मत कोए, ताहां जेतेहे इसाबोम बोहे तेताहा पोशा पुंजाराआ ठोरवीइल्यामेहें रोत कमी कोअहूं जोवे. 19 आन जर खेतोअ सोको ठोरवीइनारु तिया खेतोहो सोड़वुहूं होदे, ताहां जे किम्मत पुंजारु ठोरव्यी ओय तियीमेहें तो पासवू भाग फाश्यु वादाड़ीत आपुहूं जोवे, ताहां खेत तियाआज ओत जाय. 20 पोन जर तो खेतोहो ने सोड़वीइनारु ओय, नेताहां तिये तों खेत बिहीराहा वेसी देदोय, ताहां तों खेत आगाड़ी कोयोंन्ने सोड़वीइता आवे; 21 पोन जेहेलाम तों खेत जुबलीइ वोरह्योम सुटीत जाय, ताहां एकसोट्योज भेट कोअल्या खेतोअ होस यहोवा देवोअ काजे सोको ठोरे, मोन्ज्ये तो जागू पुंजाराआज खाजगी जागू ओत जाय. 22 जर एखू तियाआ वेसातो लेद्लो खेत, जो तियाआ खाजगी जागामेऱ्योअ ने ओय, तियाहा यहोवा देवोअ काजे सोको ठोरवुहूं होदे, 23 ताहां पुंजारु जुबलीइ वोरह्योअहीं जाआं इसाब कोइत तिया माहुंउं काजे जेतीही किम्मत ठरवे तेतीहीज किम्मत तों माहुंउं यहोवा देवोअ पवित्र जाईंत कोइत तेदिहींज आपीत देअहूं जोवे. 24 जुबलीइ वोरह्योम तों खेत जियापोअ रोत तिये वेसातो लेदो ओय तिया माहुंउं ताबाम फाश्योअ आवतो रोय, मोन्ज्ये जियाआ तो खाजगी जागू ओय तियाआज फाश्युउ ओत जाय. 25 जियी जियी वस्तुउ किम्मत पुंजारु ठरवे तियाआ किम्मत पवित्र जागाआ शेकेलोअ इसाबेज ठोरवुहूं जोवे: शेकेल विही गेराआ*27:25 गेराआ एक गिऱ्याम ताहां बारा गिऱ्याम रोअहूं जोवे."

26 "पोन पाल्ल्या जनवारोअ पेलठो तों यहोवा देवोअ कोत ठोरल्योज होय, तियाहा कोडोज पवित्र ने ठोरवुहूं जोवे; तो वासड़ो ओय, नेताहां पाल्ल्ये जनवारे ओय, तों यहोवा देवोओज होय." 27 पोन जर तों एठा जनवारोअ ओय, ताहां तियाआ सोको कोअनारु तियाहा पुंजाराआ ठोरवीइल्यी किमतेए पुरमाणे तियी किमतेए पासवू भाग फाशुउ वादाड़ीत कोइत सोड़वीत सेकेहे; आन जर तियाआ सोड़वीइलोअ ईश्शा ने ओय, ताहां पुंजारे ठोरवीइल्यी किमतेज वेसी देअहूं जोवे.

28 "पोन तुमाआ आक्खी वस्तुमेहें रोत जों किबी यहोवा देवोअ काजे भेट कोए, तिहींमेहें माहुंउं ओय नेताहां जनवार, नेताहां तों तियाआ खाजगी खेतोअ भाग ओय, एहेलिही जे भेट कोअल्यी वस्तु ओय ते ने वेसुहूं जोवे आन ने सोड़वुहूं जोवे; जों किबी भेट कोआय तों यहोवा देवोअ काजे जाअखो सोको समजुहूं जोवे." 29 माअहूं मेहें रोत जो कोडो मोतोअ डोंडोअ काजे होपी देदोय, तियाहा ने सोड़वीत सेकाय; तियाहा नक्की माइत टाकुहूं जोवे.

30 "खेतोअ कामायीइ पुरु दाहवू भाग, ते खेतोमेर्‍यीइ कामाय ओय नेताहां साड़ोअ फलवे ओय, तें यहोवा देवोअज होय; तो भाग यहोवा देवोअ काजे पवित्र ठोरुहूं जोवे." 31 जर एखू तियाआ दाहवा भागोमेहें रोत काविहीं वापिस लेअलोअ इश्शा कोए, ताहां पासवू भाग वादाड़ीत कोइत तियाहा सोड़वुहूं जोवे. 32 मेडा-बोकड़ाआ आन पाल्ल्ये जनवारे जियांआं गोणती डेंगारीइ थुड़ते रोत ओवेहे, तियां आखा दोहोम रोत एकेक काडीत देवोअ काजे सोको ठोरवुहूं जोवे. 33 कोडोज तियाम हाजा-बाक्ताआ खामी ने पालुहूं जोवे; जर एखु तिहींम रोत बोदलीत बी लेय, ताहां तों जनवार तियाआ बोदले आप्योय तियां बेनुहूं पवित्र सोमजुहूं जोवे; आन किम्मत आपीत तियांहां ने सोड़वीइता आवे. 34 जो आदेश यहोवा देवे इस्राएलवालाआ काजे सिनाय डोगोपोअ मोशेहे आप्युतो तो ओज होय.