1 यहोवा देवे मोशेहे हाद्यू आन मिलापवाला तोंबामेहें रोत कोयो, 2 "इस्राएलवालाहां को, के तुमामेहें जों कोडो माहुंउं देवोअ काजे गाराहा आपे, ताहां तियाआ गाराहा पाल्ल्ये जनवारे नेताहां मेडा-बोकड़ाम रोत रोअहूं जोवे.

3 "जर तें पाल्ल्या जनवारोमेहें रोत गाराहा कोए, ताहां निर्दुस बोलोद मिलापवाला तोंबाआ बाओपोअ गाराहा कोअहूं जोवे, ताहां यहोवा देव तियाहा मान्य कोए. 4 तो आगीइ गाराहा जनवारोअ मुन्कापोअ तियाआ आथ मिकुहूं जोवे, ताहां तों तियाआ कोअते गाराहा कोत कबुल कोआय. 5 ताहां तों तिया बासाहा यहोवाआ सामने गाराहा कोअहूं जोवे; आन आरोनोअ पोर्‍या जे पुंजारा होय, मिलापवाला तोंबाआ बाओअ सामनेवाला देवान्याआ शारु वोल ते रक्त आहने लेत जात कोइत साटारुहूं जोवे. 6 ताहरुउ तो गाराहा जनवारोअ सांबड़ो काडीत कोइत तिया जनवारोहो डुन्कान-डुन्का कोए; 7 ताहरुउ आरोन पुंजाराआ पोर्‍या देवान्यापोअ आग मिकुहूं जोवे, आन आगीपोअ लाकड़े हेसीत मिकुहूं जोवे; 8 आन आरोनोअ पोर्‍या जे पुंजारा होय, ते मुन्को, सरबी आन जनवारोअ डुन्का नेहें तियां लाकड़ापोअ जे देवान्यापोअ होय, तिहीं हेसीत कोइत मिकुहूं जोवे; 9 आन ते तियाआ आते आन गुडा पाअयोंवाअहीं तुवे. ताहरुउ पुंजारु तों आक्खो देवान्यापोअ पेटाड़े, काहाके तों गाराहा यहोवा देवोअ कोअते हाजो गुंदाअनारो गाराहा ठोरे.

10 "जर ते मेडाआ नेत बोकड़ाआ गाराहा आपे, ताहां पुरु निर्दुस मेडू नेत बोकड़ू आपुहूं जोवे; 11 आन तो तियाहा यहोवा देवोअ आगाड़ी देवान्याआ पालामाआ वोल गाराहा कोअहूं जोवे; आन तियाआ रक्त आरोनोअ पोर्‍या जे पुंजारा होय, ते देवान्याआ मेरेमेरे साटारुहूं जोवे. 12 आन तो तियाहा डुन्कान डुन्का कोअहूं जोवे, आन मुन्को आन सरबी आलाग कोअहूं जोवे, आन यां आखाहा पुंजारा देवान्यापोऱ्याआ आगीइ लाकड़ापोअ हेसीत मिकुहूं जोवे; 13 आन ते तियाआ आतेन गुडा पाअयोंवाअहीं तुवुहूं जोवे आन पुंजारा आखाहा आहने लेत जात कोइत देवान्यापोअ पेटाड़ुहूं जोवे; काहाके तों यहोवा देवोअ कोअते हाजो गुंदाअनारो गाराहा ओवुहूं जोवे.

14 "जर तों यहोवा देवोअ कोअते सिड़ाआ गाराहा कोए, ताहां पेरवाआ नेत ओलाआ गाराहा आपुहूं जोवे. 15 पुंजारु तियाहा देवान्याआ आहने लेत जात कोइत तियाआ बोस पिल्लीत कोइत मुन्को डिलो रोत आंगे कोअहूं जोवे, आन देवान्यापोअ पेटाड़ुहूं जोवे; आन तियाआ पुरो रक्त देवान्याआ मेरे पाड़ुहूं जोवे; 16 आन तो तियाआ कोहू आन फाके काडीत कोइत देवान्याआ उक्तामाआ वोल खाआं टाकीइलोअ जागामेहें टाकी देअहूं जोवे; 17 आन तो तियाहा फाकाआ विसमेहें रोत काडुहूं जोवे, पोन आलाग आलाग ने कोअहूं जोवे. ताहरुउ पुंजारु तियाहा देवान्यापोअ तियां लाकड़ापोअ मिकीत पेटाड़ुहूं जोवे, काहाके तों यहोवा देवोअ कोअते हाजो गुंदाअनारो गाराहा ओवुहूं जोवे."