1 यहोवा देवे मोशेहे कोयो, 2 "इस्राएलवालाआ पुरी मोंड्लीही को, के तुमू सोके ओवा; काहाके आंय तुमाआ देव यहोवा सोकू होय.✝ 3 तुमू जिवज्योअ आयहीन आब्हाआ मानपान कोअजा, आन माआं आरामोअ दिहोहो मानजा: आंय तुमाआ देव यहोवा होय.✝ 4 तुमू मुर्तीइहें मा वोलहा, आन सोताआ काजे देवताआ मुर्ती मा बोणावहा; आंय तुमाआ देव यहोवा होय."✝

5 जेहेलाम तुमू यहोवा देवोअ कोअते मिलन गाराहा कोअहा, ताहां एहेलोहो गाराहा कोअजा जिहीं वाअहीं आंय तुमापोअ खुस ओत जांव. 6 तियाआ माहां गाराहा कोए तेदिहीं आन दुसरे दिही खाअहूं जोवे, पोन तिसरे दिही जाआं जो रोत जाय तियाहा आगीम पेटाड़ी देअहूं जोवे. 7 जर तियामेर्‍योअ वाजिहीं बी तिसरे दिही खादो, ताहां ते सोगदाय होय, आन तों मान्य ने ओवे. 8 तियाहा खानारो यहोवा देवोअ सोकी वस्तुहू एठी ठोरवेहे; तिहींइं काजे तियाहा तियाआ गुनाआं वोजू सोताहा आखलुहूं पोड़े; एहेलाहा माहुंहूं तियांआं माअहोंम रोत माइत टाकी देअहूं जोवे.

9 "जेहेलाम तुमू तुमाआ खेतोम ओन वाडहा, ताहां तुमू खेतोहो मेरेकोरे रोते आखोज मा वाडहा, आन वाडल्या खेतोम निसे ओदरीइल्ये कोहें मा विसही. 10 आन तुमाआ दाराक्शाआ वाड़ीम आखे दाराक्शेज मा तोड़ीत लेहा आन निसे ओदरीइल्ये दाराक्शे मा विसहा; तियांहां गरीब आन पारका माअहुंउं कोअते रोअहूं देजा; आंय तुमाआ यहोवा देव होय.✝

11 "तुमू बांडगाय मा कोअहा, आन एकान बिहीराहा दोगु मा देहा, मा ठोगहा.✝ 12 तुमू माआं नावसे ठोगोअ शप्पत खात कोइत देवोअ नाव खाराब मा कोअहा; आंय यहोवा देव होय.✝"

13 "एकान बिहीराहा तारास मा कोआड़हा, आन एकान बिहीराहा मा लुटहा. मोजर्‍याआ मोजरी ताआ जागे रात पोइत वेगीइ जाआं ने रोअहूं जोवे.✝ 14 बोयराहा हाराप मा आपहा, आन आंद्लाआ आगाड़ी ठोकाय एहलीही वस्तु मा मिकहा; पोन तुमाआ देवोहो बित सालजा; आंय यहोवा देव होय."✝

15 न्यायनिवाड़ू कोइलोअ वेले अन्याय मा कोअहा; आन तुमू गोरब्योअ गोरीबी देखीत कोइत आडवारी मा पोड़हा आन मात्ला माहुंउं सामने टुंगे मा पोड़हा; पोन एकमेकाआ न्याय वारुहूं निती वाअहीं कोअजा.✝ 16 तुमाआ माअहूंमेहें एहें-तेहें साड़ी कोअते मा फिरहा, आन तुमांआं जागेवालाहा माइलोअ काजे बोणावटी गोठी मा कोअहा; आंय यहोवा देव होय.

17 "तुमाआ मोनोम पायहोअ बाप्तिम खोत मा लेत रोहा; तुमाआ जागर्‍याहा नक्की सोमजाड़जा, नेते तियाआ पापोअ वोजू तुमुहूं आखलुहूं पोड़े.✝ 18 खोर मा काडहा, आन तुमाआ माअहुंउरी मा खोतात रोहा, पोन जागेवालापोअ सोताआ होस मेर कोअजा; आंय यहोवा देव होय.✝

19 "तुमू माआ आदेश कायम मानजा. तुमाआ पाल्ल्या जनवारोपोअ आलाग जातीइ जनवारोम पेलाअहूं मा देहा; तुमाआ खेतोमेहें बेन बातीइ मिंजे पेलीत मा ओअहा; आन हुत आन रुंगहे सान्बीत बोणावल्ये आंगड़े मा पोवहा.✝

20 "जे बोयोंअ गुलाम ओय पोन एखा माट्योअरी पात पिवाअयो ओय, पोन दाम पोइत नेजी सुटी ओय, आन एखे तियीही राखीत लेदी, ताहां तियां बेनुहूं डोंड आपुहूं जोवे; पोन तियीइ सुटका नाहां ओवी कोत ने माइत टाकुहूं जोवे. 21 पोन तो माटी मिलापवाला तोंबाआ बाओअहीं यहोवा देवोअ जागे एक मेडो दोशोअ गाराहा कोअते लेतावुहूं जोवे. 22 आन पुंजारु तियाआ कोअल्या पापोअ वोतीइ दोशोअ गाराहा मेडावाअहीं तियाआ काजे यहोवा देवोअ सामने पाप टापुहूं जोवे; ताहांजात तियाआ कोअल्यू पाप माफ ओवे.

23 "जाहां तुमू कनान देसोमेहें पोतीत कोइत तिहीं आखी जातीइ फलवाआ साड़े ठाअहां, ताहां तियांआं फलवे तिन वोरह्ये जाआं तुमाआ कोअते विण खतनावाले जेहें ठरुहूं जोवे; तियाहा काजे तुमू तियांमेहें रोत किज मा खाहा. 24 आन शोवथा वोरह्योम तियांआं आखे फलवे यहोवा देवोअ स्तुतीइ भेटोअ कोअते पवित्र ठरुहूं जोवे. 25 ताहरेए पासवा वोरह्योअरी तुमू तियांआं फलवे खाजा, याअकाजे के तियांप रोत तुमुहूं जाअखीलेहे फलवे जोड़ुहूं जोवे; आंय तुमाआ यहोवा देव होय.

26 "तुमू कोड्लोज माहां रक्ताल्लोज मा खाहा. तुमू किज जादुमोंतर मा कोअहा, आन आथ मा पालाड़हा.✝ 27 तुमाआ मुन्काआ मेरेमेरेए सिंग्ये मा कात्रावहा, आन तुमाआ डाड़ीही मेरेमेरे मा कात्रावहा. 28 एखो मोइत गोयो ताहां तुमाआ डिलोहो मा सिरीत लेहा, आन तुमाआ डिलोपोअ मा गुंदाड़हा; आंय यहोवा देव होय.✝

29 "तुमाआ बेटिह्हींहीं रांडी बोणावीत कोइत एठी मा कोअहा, एहेलोहो ने ओवुहूं जोवे के देस रांडीइ वोजेसे वोडा पापोवाअहीं पोआइत जाय.✝ 30 माआ आरामोअ दिहोहो मानजा, आन माआ सोका जागाआ बिक सादाज मिकजा; आंय यहोवा देव होय.✝

31 "कागल पांड्याआ आन पुते जागाड़नाराआ वाते मा लागहा; तियांआं गोठी लागीत एठे मा ओवहा; आंय यहोवा देव होय.✝

32 "डायहांआं सामने उठीत उबे रोजा, डायाआ मानपान कोअजा, आन तुमाआ देवोअ बिक कायम मिकजा; आंय यहोवा देव होय.

33 "जर एखु पारको तुमाआ देसोम तुमाअरी रोय, ताहां तियाहा तारास मा देहा. 34 जो पारको माअहुंउं तुमाअरी रोये, तो तुमाआ कोअते पारको ने रोअहूं जोवे, आन तियापोअ सोताआज होस मेर कोअजा; काहाके तुमू बी मिसर देसोम पारके ओते; आंय तुमाआ यहोवा देव होय.✝

35 "तुमू न्याय कोअताम, मोजताम, तोलताम, नेताहां मापताम किज सुक मा कोअहा. 36 तुमापोअ खोरु ताराजू, न्यायोअ वोजने, खोरो माप, आन नितीइ लिटर* ओं आखो तुमापोअ रोअहूं जोवे; आंय तुमाआ तो यहोवा देव होय जो तुमुहूं मिसर देसोम रोत काडीत लेत आवयू.✝ 37 तिहींइं काजे तुमू माआं आखा आदेश आन आखा न्यायोअ नियम मानुहूं जोवे; आंय यहोवा देव होय."