लेवी 14

वोडा दुखोवालाहा सोको ठोरवीइलाआ नियम

1 फाशुउ यहोवा देव मोशेहे कोयो, 2 "वोडा दुखोवालाहा सोको ठोरवीइलोअ नियम ए होय. तियाहा पुंजाराआ जागे लेत जाअहूं जोवे;✝14:2 मत्तय 8:4; मार्क 1:44; लुक 5:14; 17:14 3 पुंजारु पोड़ावाआ बारथे जाअहूं जोवे, आन तो तियाहा तापासुहूं जोवे, आन जर तियाआ वोडा दुखोअ डाग हुदरीत गोयाय, 4 ताहां पुंजारु आदेश आपुहूं जोवे के सोको ठोरवाअनाराआ कोअते बेन सोके जिवते सिड़े, देवदारोअ लाकड़े, आन रात्ला रंगोअ साअको आन रुंग्हाल खोड़, ओं आखो लेत कोइत आवुहूं जोवे; 5 आन पुंजारु आदेश आपुहूं जोवे के एक सिड़ो वोहत्ला पाअयोंपोअ कादवोअ बासनोम गाराहा कोअहूं जोवे. 6 ताहरोअ तों जिवतो सिड़ो, देवदारोअ लाकुड़ आन रात्ला रंगोअ साअको आन रुंग्हाल खोड़ यां आखाहा लेत कोइत एक्ठेज तिया वोहत्ला पाअयोंपोअ गाराहा कोअयोहो सिड़ाआ रक्तामेहें बुलुहूं जोवे; 7 आन तों रक्त वोडा दुखोम रोत सोको ठोरवाअनारा माअहूंपोअ हांत वारी साटारुहूं जोवे, आन तों सोको ओत गोयोहो एहें कोत तिया जिवता सिड़ाहा मोकला रानोम सोड़ी देअहूं जोवे. 8 आन सोको ठोरनारो माअहुंउं सोताआ आंगड़े तुवुहूं जोवे, सोताआ टालगी कोइत पाअयों वाअहीं उंगलीत लेअहूं जोवे, ताहां तों सोको ठोरे; तिहींइं फासाड़ी तो पोड़ावाम आवीत सेके, पोन हांत दिही जाआं तियाआ पोड़ावाआ बारथेज रोअहूं जोवे. 9 आन तों सांतवे दिही मुन्को, डाड़ी, आन खाक्ये आक्खे सिंग्ये बोड़ीत लेअहूं जोवे, आन पुरा डिलोपोर्‍येए आखे सिंग्ये बोड़ीत लेअहूं जोवे, आन तियाआ साअके तुवुहूं जोवे, आन पाअयों वाअहीं उंगलुहूं जोवे, ताहांजात तों सोको ठोरे."

10 आंठवे दिही तो बेन निर्दुस मेडाआ गिद्ला, आन एका वोरह्योअ निर्दुस मेडाआ गिद्ली, आन ओनोअ गाराहाआ कोअते तेलोवाअहीं केलवीइल्यो एपो, मोयदो पास किलो, आन आरदू लिटर तेल लेतावुहूं जोवे. 11 सोको कोअनारु पुंजारु यीं आखी वस्तुउरी तिया सोका ओवनारा माअहुंहूं यहोवा देवोअ सामने मिलापवाला तोंबाआ बाओअ जागे उबो कोअहूं जोवे. 12 ताहरुउ पुंजारु एक मेडाआ गिद्लू लेत कोइत दोशोअ गाराहा कोअते तियाहा आन तियाआ तेलोहो तिन होव गिऱ्याम लगभग लेतावुहूं जोवे, आन यां बेनुहूं उतारीलोअ भेटेए कोअते यहोवा देवोअ सामने फेरवुहूं जोवे; 13 आन तो तियाज जागापोअ जिहीं तो पापोअ गाराहा आन आगीइ गाराहा कोअतेहे तिहीं मेडाआ बासाहा गाराहा कोअहूं जोवे, मोन्ज्ये जाअखा सोका जागाम गाराहा कोअहूं जोवे; काहाके पापोअ गाराहाआ होस दोशोअ गाराहा बी पुंजाराआ खाजगी भाग ठोरुहूं जोवे; तो जाअखू सोकू भाग होय. 14 ताहरुउ पुंजारु दोशोअ गाराहा रक्तामेहें रोत जाराक लेत कोइत सोको ओवनारा हाजाड़्या कानोअ सेकतेज, आन तियाआ हाजाड़्या आथ आन हाजाड़्या गुडाआ वोडा इंगाअठाअरी हारी देअहूं जोवे. 15 पुंजारु तिन होव गिऱ्याम तेलोमेहें रोत जाराक लेत कोइत तियाआ बांगाड़्या आथोअ थोलतेम ओलुहूं जोवे, 16 आन पुंजारु तियाआ हाजाड़्या आथोअ आंगल्यी तियाआ बांगाड़्या आथोअ थोलतेमेर्‍याआ तेलोमेहें पिगवीत तियामेर्‍योअ थोड़ोक तेल यहोवा देवोअ सामने हांत वारी साटारुहूं जोवे. 17 तियाआ थोलतेम जों तेल उगरे तियामेर्‍योअ जाराक लेत कोइत पुंजारु सोको ओवनारा माहुंउं हाजाड़्या कानोअ सेकतेज, आन तियाआ हाजाड़्या आथोअ आन हाजाड़्या गुडाआ इंगाअठापोअ दोशोअ गाराहा रक्ताआ उपोअ लागाड़ुहूं जोवे; 18 आन थोलतेमेहें उगरीइल्यो तेल पुंजारु सोका ओवनारा माहुंउं मुंडोअरी हारी देअहूं जोवे. आन पुंजारु तियाआ कोअते यहोवा देवोअ सामने पास्तावू कोअहूं जोवे. 19 ताहां पुंजारु पापोअ गाराहा इसीत कोइत तियाआ कोअते जों सोताआ एठायीम रोत सोको ओवनारो ओय तियाआ कोअते पास्तावू कोअहूं जोवे; आन तिहींइं फासाड़ी आगीइ गाराहा कोअहूं जोवे: 20 ताहरुउ पुंजारु ओनोअ भेटेएरी देवान्यापोअ सोड़वुहूं जोवे: आन तियाआ कोअते पास्तावू कोअहूं जोवे ताहां तों सोको ठोरे.

21 "पोन जर तो गरीब ओय आन एतोहो तियाहा ने पुरवाअतो ओय, ताहां तो तियाआ पास्तावाआ वोतीइ, उतारीलोअ कोअते मेडाआ गिद्लो दोशोअ गाराहा कोअते, आन तेलोवाअहीं केलवीइल्या एपाआ पास किलो मोयदा ओनोअ भेट कोइत, आन आरदो लिटर तेल लेतावुहूं जोवे; 22 आन तियाहा पुरवाअतोज बेन पेरवे नेताहां बेन ओलाआ पिले तों लेतावुहूं जोवे; तियामेर्‍योअ एक पापोअ गाराहा कोअते आन बिहीरो दोशोअ गाराहा कोअते रोअहूं जोवे. 23 आन आंठवे दिही तो यां आखाहा तियाआ सोको ओवीइलोअ कोअते मिलापवाला तोंबाआ बाओअ जागे, यहोवा देवोअ सामने, पुंजाराआ जागे लेतावुहूं जोवे; 24 ताहरुउ पुंजारु दोशोअ काजे मेडाआ गिद्लो आन आरदो लिटर तेल लेत कोइत फेरवीइलोअ भेट कोत यहोवा देवोअ सामने फेरवुहूं जोवे. 25 तिहींइं फाटी दोशोअ गाराहा मेडाआ गिद्लाआ गाराहा कोअहूं जोवे; आन पुंजारु तियाआ रक्तामेहें रोत जाराक लेत कोइत तिया सोका ओवनाराआ हाजाड़्या कानोअ सेकतेज, आन तियाआ हाजाड़्या आथोअ आन हाजाड़्या गुडाआ वोडा इंगाअठाअरी हारुहूं जोवे. 26 फाशुउ पुंजारु तियामेहें रोत जाराक तियाआ बांगाड़्या आथोअ थोलतेम ओलुहूं जोवे, 27 तियाआ हाजाड़्या आथोअ आंगल्यी वाअहीं तिया थोलतेमेर्‍याआ तेलोम रोत जाराक यहोवा देवोअ सामने हांत वारी साटारुहूं जोवे; 28 ताहरुउ पुंजारु तियाआ थोलतेमेर्‍याआ तेलोम रोत जाराक सोको ओवनाराआ हाजाड़्या कानोअ सेकतेज, आन तियाआ हाजाड़्या आथ आन हाजाड़्या गुडाआ इंगाअठापोअ, दोशोअ कोअते गाराहाआ रक्ताआ जागापोअ हारुहूं जोवे; 29 पुंजारु थोलतेम उगरीइल्यो तेल सोका ओवनारा माहुंउं मुंडोहो यहोवा देवोअ सामने पास्तावू कोत हारुहूं जोवे. 30 ताहांजात तो पेरवाहा नेताहां ओलाआ पिलामेहें रोत एक लेतावीत गाराहा कोअहूं जोवे; 31 मोन्ज्ये जें सिड़े तो लेत आयो, तियांमेर्‍योअ एक पापोअ गाराहा कोअते आन बिहीरो ओनोअ भेटेए कोअते गाराहा कोत आपुहूं जोवे; एहें कोइत पुंजारु सोको ठोरवाअनारा माहुंउं कोअते यहोवा देवोअ सामने पास्तावू कोअहूं जोवे. 32 जियाहा वोडा दुखोअ बिमारी ओत गोयी ओय, आन तियाहा सोको ओवीइलोअ सामान ने पुरवाअतो ओय तियाआ कोअते ओज नियम होय."

कोओअ वोडो दुख

33 फाश्योअ यहोवा देवे मोशेहे आन आरोनोहों कोयो, 34 "जाहां तुमू कनान देसोम पोतहा, जियाहा आंय तुमाआ खाजगी जागु ओवे तेहें काजे आपोहो, तेहेलाम जर आंय वोडा दुखोअ बिमारी तुमाआ खाजगी जागामेहें एखाआ कोअमेहें देखाड़ो, 35 ताहां जियाआ तो कोओ ओय तो माटी आवीत कोइत पुंजाराहा कोत देअहूं जोवे के माहूं एहेलोहो देखाअहे के कोअमेहें एखु बिमारी होय. 36 ताहरुउ पुंजारु वोडो दुख तापासीइलोअ आगोदर तों कोअ खाली कोइलोअ आदेश आपुहूं जोवे; नेत तिया कोअमेहें ओय तेती आखी वस्तु एठी ठोरे; ताहांजात पुंजारु कोअ तापासीइलोअ कोअते मायते जाअहूं जोवे. 37 ताहरुउ पुंजारु तियाहा तापासुहूं जोवे; आन जर ते बिमारी कोओअ पितड़ापोअ निला निला नेताहां लाल-लाल ईरकाआ होस ओय, आन ते पितड़ामेहें उंडे देखाअता ओय, 38 ताहां पुंजारु कोओअ बारथे बाओपोअ जात कोइत तिया कोओहो हांत दिही जाआं बोंद कोइत मिकुहूं जोवे. 39 आन सांतवे दिही पुंजारु आवीत कोइत तों कोअ पालुहूं जोवे; आन ते बिमारी कोओअ पितड़ापोअ पोसरीत गोयीय, 40 ताहां जियां डोणोअरी बिमारी होय तियांहां काडीत कोइत पुंजारु होयरोअ बारथे एखा एठा जागाम काडीत टाकीइलोअ आदेश आपुहूं जोवे. 41 आन तिया कोअमेहें आखी वोल खुरपुहूं जोवे, आन तों खुरपीइल्यू कादुउ होयरोअ बारथे एखा एठा जागाम टाकी देअहूं जोवे; 42 आन तियां डोणोअ जागापोअ बिहीरा डोंण लेतावीत बोहाड़ुहूं जोवे आन कोओहो नोवा गारावाअहीं निपुहूं जोवे.

43 "जर डोण काडीत कोओ खुरपीत नोवील खोस्यो निप्यो तेबी फाश्योअ तों दुख कोअमेहें उबरीत निहे, 44 ताहां पुंजारु आवीत तापासुहूं जोवे; आन जर तों दुख कोअमेहें पोसरीत गोयोय, ताहां जाइंत लेअहूं जोवे के तों कोअमेहें नुकसान कोअनारो वोडो दुख होय; तों एठो होय. 45 आन तों कोओ खोदालीत पाड़ुहूं जोवे; तियाआ डोणे, लाकड़े आन आखु कादुउ तिहीं रोत काडीत कोइत होयरोअ बारथे एखा एठा जागामेहें टाकी देअहूं जोवे. 46 जर एखु तों कोओ बोंद रोय तेहेलाम तिहींम फोटो, ताहां तों हांजेपोअ जाआं एठोज रोअहूं जोवे; 47 आन जों कोडो तिया कोअमेहें हुवयो, ताहां तों तियाआ आंगड़े तुवुहूं जोवे; आन जों कोडो तिया कोअमेहें काविंहीं खाय, तों बी तियाआ आंगड़े तुवुहूं जोवे.

48 "पोन जर पुंजारु आवीत कोइत तापासे आन कोओहो खोस्यो आन निप्यो तिहींइं फासाड़ी तियी बिमारीइ डाग ने उबऱ्यु पोन निहीत गोयु, ताहां तिया कोओहो तो सोको ठोरवुहूं जोवे. 49 आन तिया कोओहो सोको कोइलाआ काजे बेन सिड़े, देवदारोअ लाकुड़, रात्ला रंगोअ साअको आन रुंग्हाल खोड़ लेतावुहूं जोवे; 50 आन एका सिड़ाहा वोहत्ला पाअयोंपोअ कादुउ बासनोम बली कोअहूं जोवे, 51 ताहां तो देवदारोअ लाकुड़, रात्ला रंगोअ साअको आन रुंग्हाल खोड़ आन एक जिवतो सिड़ो यां आखाहा लेत कोइत तिया गाराहा कोअल्या सिड़ाआ रक्तामेहें आन वोहत्ला पाअयोंमेहें बुलीत लेअहूं जोवे, आन तिया कोओपोअ हांत वारी साटारुहूं जोवे. 52 एहें कोइत तिया सिड़ाआ रक्त, आन वोहत्लो पाईं, जिवतो सिड़ो, आन देवदारोअ लाकुड़, रुंग्हाल खोड़ आन रात्ला रंगोअ साअका वाअहीं कोओहो सोको कोअहूं जोवे; 53 ताहरोअ तिया जिवता सिड़ाहा होयरोअ बारथे मोकला रानोम सोड़ी देअहूं जोवे; एहेंज कोइत तो कोओअ सोकायीइ कोअते पास्तावू कोए, ताहां तो कोओ सोको ठोरे." 54 आखी जातीइ वोडा दुखोअ बिमारी, आन दाद,

55 साअकाआ, आन कोओअ वोडी बिमारी, 56 हुज, फुपला, आन पांडा डाग, 57 सोको आन एठो ठोरवीइलोअ काजे सिकाड़ीलोअ ओज नियम होय. आखी जातीइ वोडा दुखोअ काजे ओज नियम होय.