1 यहोवा देवे मोशेहे आन आरोनोहों कोयो, 2 "इस्राएलवालाहां कोवा, के जिया जिया माट्योअ डिलोमेहें रोत अमर पाईं वोहतोय, ताहां तिहींइं वाखरी तो एठु ठोरे. 3 तिया माट्योअ डिलोम रोत अमर पाईं वोहतोय नेताहां बोंद ओवोय, तेबी तो एठुज होय. 4 जिया जिया आथरुपोअ तो माटी हुवे तो आथरुउ एठु ठोरे, आन जिया वस्तुपोअ तो बोहे, ते वस्तु बी एठी ठोरे. 5 आन जों कोडो तियाआ आथरुहू आथले, तो तियाआ आंगड़े तुवीत कोइत पाअयों वाअहीं उंगलुहूं जोवे, आन हांजेपोअ जाआं तों एठोज रोअहूं जोवे. 6 जियी सोवकड़ीपोअ अमर पाईंवालो माहुंउं बोठोय, तियाज जागापोअ बोहनारो माहुंउं बी सोताआ आंगड़े तुवुहूं जोवे, पाअयों वाअहीं उंगलुहूं जोवे आन हांजेपोअ जाआं एठोज रोअहूं जोवे. 7 आन जियाहा ए बिमारी ओय, तियाहा जों कोडो टेको तों सोताआ आंगड़े तुवीत कोइत पाअयोंवाअहीं उंगलुहूं जोवे आन हांजेपोअ जाआं एठोज रोअहूं जोवे. 8 आन एहेलिही बिमारीवालो एखा सोका माअहूंपोअ थुपे, ताहां तों सोताआ आंगड़े तुवीत कोइत पाअयोंवाअहीं उंगलुहूं जोवे, आन हांजेपोअ जाआं तो एठोज रोअहूं जोवे. 9 आन जियाहा ए बिमारी ओय तों बोहीत जाअलोअ काजे जियी वस्तुउ वापर कोए ते एठी ठोरे. 10 तियाआ डिलोअ थुड़ी रोयी ओय तियी वस्तुहू जो कोडो टेके तों हांजेपोअ जाआं एठोज रोअहूं जोवे; आन जो कोडो तेहलिही वस्तुहू विसे तों सोताआ आंगड़े तुवुहूं जोवे आन पाअयोंवाअहीं उंगलुहूं जोवे, आन हांजेपोअ जाआं एठो रोअहूं जोवे. 11 जियाहा मुन्सोलू ओय तों माहुंउं विण आथ तुवयेज एखाहा टेको, ताहां तो सोताआ आंगड़े तुवीत कोइत पाअयोंवाअहीं उंगलुहूं जोवे, आन हांजेपोअ जाआं एठो रोअहूं जोवे. 12 अमर पाईंवालो माहुंउं एखा कादुउ बासनोहों आथले ताहां तों बासन फोड़ीत टाकुहूं जोवे, आन लाकड़ुउ बासन पाअयोंवाअहीं तुवुहूं जोवे.

13 "उमरपाईं वालो माहुंउं जाहां बिमारीम रोत हुदरीत जाय, तेदिहीं रोत तों सोका ओवीइलोअ काजे हांत दिही जाआं रुकाअहूं जोवे, आन ते हांत दिही सेके ताहां तों सोताआ आंगड़े तुवीत कोइत वोहता पाअयोंम उंगलुहूं जोवे; ताहांजात तों सोको ठोरे. 14 आंठवे दिही ओलून ओली नेताहां बेन पेरवाआ पिले लेत कोइत मिलापवाला तोंबाआ बाओअ जागे यहोवा देवोअ सामने जात कोइत तें पुंजाराहा आपुहूं जोवे. 15 ताहरुउ पुंजारु तियांमेर्‍याआ एकाहा पापोअ गाराहा कोअते गाराहा, आन बिहीराहा आगीइ गाराहा कोअते गाराहा आपुहूं जोवे; आन पुंजारु तिया अमर पाईंवालो कोअते यहोवा देवोअ सामने पास्तावू कोअहूं जोवे.

16 "जर एखा माट्योअ उमरपाईं जाय, ताहां तों तियाआ पुरो डिल पाअयोंवाअहीं तुवुहूं जोवे, आन हांजेपोअ जाआं एठोज रोअहूं जोवे. 17 जिया साअकाहा नेताहां साम्बड़ाआ वस्तुहू तों उमरपाईं लागीत गोयोय तियाहा बी पाअयोंवाअहीं तुवुहूं जोवे, आन हांजेपोअ जाआं एठोज रोअहूं जोवे. 18 बोईंइरी हुवताम तिया माट्योअ उमरपाईं पोड़ीत गोयो, ताहां तें बेनु उंगलुहूं जोवे, आन हांजेपोअ जाआं एठे रोअहूं जोवे.

19 "जर एखु बोईंहीं मुन्सोलु आयु, ताहां ते हांत दिही जाआं एठी रोअहूं जोवे, आन जों कोडो तियीही टेको तो हांजेपोअ जाआं एठो रोअहूं जोवे. 20 आन मुन्सोलु रोय तेहेलाम ते जियापोअ हुवे, आन जियापोअ बोहे ते आखी वस्तु एठी ठोरे. 21 जों कोडो तियीइ आथरुहू टेको तों सोताआ आंगड़े तुवीत पाअयों वाअहीं उंगलुहूं जोवे, आन हांजेपोअ जाआं एठो रोअहूं जोवे. 22 ते जियी वस्तुपोअ बोठीय तियी वस्तुहू एखो टेको, ताहां तो सोताआ आंगड़े तुवीत कोइत पाअयोंवाअहीं उंगलुहूं जोवे, आन तों हांजेपोअ जाआं एठो रोअहूं जोवे. 23 तियीइ आथरुहू नेताहां एखु बिहीरी वस्तु पोअ जर बोठी ओय ताहां, तियाहा जों कोडो टेको तों हांजेपोअ जाआं एठो रोअहूं जोवे. 24 जर मुन्सोलु सालुज ओय आन माटी तियीइरी हुतू, ताहां तो माटी हांत दिही जाआं एठु रोअहूं जोवे, आन जिया जिया आथरुपोअ तो लोटे तों आखे एठो ठोरे.✝

25 "फाश्योअ जर एखी बोईंइ मुन्सोलाआ दिहोप रोत वादार दिही जाआं रक्त वोहयाज कोए, नेताहां मुन्सोलु वादार दिही जाआं रोय, ताहां ते एहेलिही दशाम एठीज रोअहूं जोवे. 26 तियीइ मुन्सोलाआ दिहोमेहें ते जिया जिया आथरुपोअ लोटे तों आक्खो एठो ठोरे; आन जियी जियी वस्तुपोअ ते बोहे तों बी तियीइ मुन्सोलाआ दिहोअ होस एठो ठोरे. 27 आन जो कोडो तियी वस्तुहू टेके तों एठो होय. तों सोताआ आंगड़े तुवुहूं जोवे, आन पाअयोंवाअहीं उंगलुहूं जोवे, आन हांजेपोअ जाआं एठो रोअहूं जोवे. 28 पोन ते बोईं मुन्सोलाम रोत सोकी ओत गोयी, ते दिही विते तिहीं रोत ते हांत दिही जाआं रुकाअहूं जोवे, तिहीं रोत ते सोकी ठोरे. 29 ताहरीइ आंठवे दिहे ते बेन ओले नेताहां पेरवाआ बेन पिले लेत कोइत मिलापवाला तोंबाआ बाओअहीं पुंजाराआ जागे जाअहूं जोवे. 30 ताहरुउ पुंजारु एकाहा पापोअ गाराहा कोअते गाराहा आन बिहीराहा आगीइ गाराहा कोअते इसुहूं जोवे; आन पुंजारु तियीइ मुन्सोलाआ कोअते यहोवा देवोअ सामने पास्तावू कोअहूं जोवे.

31 "एहें कोइत तुमू इस्राएलवाला माअहुंहूं तियांआं एठायीम रोत आलाग मिकुहूं जोवे, तियांआं विसमेहें यहोवा देवोअ रोअलोअ जागाहा एठु ने कोइत सेके, आन तियांआं एठायीमेहें फोसीत तें ने मोए."

32 मुन्सोलावाअहीं नेताहां उमरपाईं वोहीत जाअलो वाअहीं जो माटी एठु ओवे; 33 नेताहां मुन्सोलावाली बोईं नेत माट्योहो नेताहां बोईंहीं मुन्सोलू ओय, आन जो माटी मुन्सोलावाली बोईंइरी हुवे, तियां आखाआ कोअते ओज नियम होय.