1 लाबानोअ पोर्‍याआं ए गोठ्यी याकोबोअ कानोम पोड़्यी, "याकोब आपाअ आब्हाआ आखो बुउसीत लेदोहो, आन आपाआ आब्हाआ मालमिलकते वाअहीं तो एतुहू कुन्बी होय." 2 आन याकोबे लाबानोअ सोबीपोअ नजर टाक्यी आन जाइंत लेदो के तो माअरी पेल होय तेहेलुहू नाहां रोयू. 3 ताहां यहोवा याकोबोहो कोयो, "ताआ डायहां जिया देसोम रोल्या तू तिहीं जातुरो, आन आंय ताअरी रोहीं."

4 ताहरुउ याकोबे राहेल आन लिआहा खेतोमेहें तियाआ मेडा आन बोकड़ाआ जागे हादीत कोइत कोयो, 5 "तुमाआ आब्हाआ जिबानी वाअहीं माहूं फारकात गोयोहो के तो माअरी पेल होय तेहेलुहू नाहां रोयू; पोन माआ आब्हाआ देव माअरी होय. 6 तुमुहूं ते मुंदूज होय के आंय तुमाआ आब्हाआ सेवासाकरी पुरी सेक्तीवाअहीं कोअयीही. 7 तेबी तुमाआ आब्हे माहूं दोगु देदू आन दोह वारी माआ मोजरी बोदली देदी; पोन देवे तियाहा माआ नुकसान ने कोअहूं देदो. 8 जाहां तिये कोयो, ‘काबरे बासे ताआ मोजरी ओवे,’ ताहां आखे मेडे आन बोकड़े काबरेज विआंए वोल्ये; आन जाहां तिये कोयो, ‘पाटावाले बासे ताआ मोजरी ओवे,’ ताहां आखे मेडे आन बोकड़े पाटावालेज विआंएं वोल्ये. 9 एहेंकोइत देवे तुमाआ आब्हाआ जनवारे माहूं आपी देदे."

10 "मेडेन बोकड़े फोलतेहे तियी होमसे आंय होपनामेहें की देख्यो के बोकड़ा बोकड़ीपोअ उड्ताहा, ते पाटावाला, आन काबरा, आन डाबावाला होय. 11 ताहां देवोअ देवदूते होपनामेहें माहूं कोयो, ‘याकोब,’ मी कोयो, ‘आंय इंहीं होंव’* 12 तिये कोयो, ‘नजर टाकीत कोइत तियां आखा बोकड़ाहा पाल, जे बोकड़ीही बेबारताहा, ते पाटावाला, काबरा आन डाबावाला होय; काहाके लाबान ताअरी जों किबी कोअहे तों मी पाल्योहो. 13 आंय तिया बेथेलोअ देव होय, जिहीं तुमे एका डोणोहो उबू राखीत तियाआ सुटीपोअ तेल हार्‍योतो आन माआ पालनी तोअयीते.✝ ओमे साल, या देसोम रोत निहीत कोइत तू जिहीं उबज्युहू तिया देसोम वोलीत जा.’"

14 ताहरीइ राहेल आन लिआ तियाहा कोयो, "आमाआ आब्हाआ कोअमेहें ओमे आपाअ काविहीं वाटू रोयुहू के? 15 आमू तियाआ नजरेम पारकी ने ओवी के? पाल, तिये आमुहूं ते वेसी देद्यी, आन आमाआ पोशा खात बोहीत रोयुहू. 16 तियाहा काजे देवे आमाआ आब्हाआ जेती मालमिलकत लेत लेदीही, ते आपाआ आन आपाआ पोर्‍याआ होय; ओमे जों किबी देवे ताहूं कोयोहो, तोंज कोओ."

17 ताहरुउ याकोबे तियाआ पोर्‍याहा आन बोईंहीं उटड़ापोअ बोहाड़्ये; 18 आन जेते जनवारे तो पद्दन-अरामोमेहें टोलू कोइत कुन्बी बोणित गोयुतो, आखाहा कनानोमेहें तियाआ आब्हा इसाहाकोअ जागे जाअलाअ विसारोवाअहीं, आरी लेत गोयु. 19 लाबान तियाआ मेडाअ रुंगहे कातरीइलोअ काजे जातु रोयू तो, आन राहेल तियीइ आब्हाअ कुलदेवताआ मुर्तीही सोइत लेत गोयी. 20 ताहरुउ याकोब अरामी लाबानोअ जागे रोत नाहीत जातु रोयू, तियाहा नाहां कोयो के आंय जाहो. 21 तो तियाआ आखो लेत कोइत नाहीत गोयु, आन वोडी नोयीइ एकी तोड़ उतरीत कोइत तो गिलादोअ डोगर्‍याआ मुलखोअहें जानु वोल्यू.

22 तिसरे दिही लाबानोह खबर मिल्यी के याकोब नाहीत गोयुहू. 23 तियाहा काजे तिये तियाआ माअहें आरी लेत कोइत तियाआ हांत दिही जाआं फाट लागू, आन गिलादोअ डोगर्‍याआ मुलखोमेहें तियाहा जात मिल्यू. 24 पोन देवे राती होपनाम अरामी लाबानोअ जागे आवीत कोइत कोयो, "सांबाल, तू याकोबोहो हाजो बाक्तो किज मा कोही." 25 आन लाबान याकोबोअ जागे गोयु. याकोब तियाआ तोंबु गिलाद नावोअ डोगर्‍याआ मुलखोम उबू कोअयुतो; आन लाबान बी तियाआ माअहुंउं आरी तियाआ तोंबु तियाज डोगर्‍याआ मुलखोमेहें उबू राख्यू.

26 ताहरुउ लाबान याकोबोहो कोनु वोल्यू, "तुमे माहूं काहा ठोग्युहू? तु ते माआ पोर्‍यीही फोला ते तारवाइ वाअहीं जिकीत गुलाम कोइत लेतावनाराआ होस सोइत लेतायुहू? 27 तू काहा ठावकुज नाहीत आवयू? माहूं ने कोता माआ जागे रोत मोनेज काहा नाहीत आवयू; जर तु माहूं कोतु ताहां आंय ताहूं खुसी वाअहीं वाजे गाजेज मोकलीइतू ना? 28 तुमे ते माहूं माआ पोर्‍या आन पोर्‍यीही गुऊँ बी नाहां लेएहूं देदू? तुमे फोगाय कोअयीही. 29 तुमाआ नुकसान कोइलाआ हिम्मत माआ आथोम ते होय; पोन ताआ आब्हाआ देवे माहूं काल्यीइ रातीम कोयो, ‘सांबाल, याकोबोहो हाजो बाक्तो किज मा कोही.’ 30 ओमे ताआ आब्हाअ कोअ पोतीइलाआ वातड़ीज ईश्शा वाअहीं तू नाहीत आयू, पोन माआ कुलदेवताआ मुरतीही काहा सोइत लेतावल्यू?"

31 याकोबे लाबानोहो उत्तर आप्यो, "तु ताआ बेटिह्हीही मापरोत बुउसीत-हुउसीत लेय ओं इतवीत कोइत आंय बित गोयुतो. 32 जिया कोडापोअ ताहूं ताआ कुलदेवताआ मुर्ती सापड़े, तो जिवतो ने वासाय. माआ जागे ताआ जों किबी सापड़े, तियाहा ताआ माअहुंउं सामने ओलखीत कोइत लेत ले." काहाके राहेल कुलदेवताआ मुर्तीही सोइत लेतायीही ओं याकोबोहो ने मुंदू ओतो.

33 ताहरुउ लाबान, याकोब आन लिआ आन बेनू पावरीइ तोंबाम गोयु; पोन तियाहा मुर्ती ने सापड़्यी. ताहरुउ लिआअ तोंबाम रोत निहीत कोइत राहेलोअ तोंबाम गोयु. 34 राहेल ते कुलदेवताआ मुर्तीही उटड़ाअ जीणेमेहें मिकीत कोइत तियीं पोअ बोहीत ओती. लाबाने तियीइ पुरा तोंबाम सापलीत वोल्यू तेबी मुर्ती ने सापड़्यी. 35 राहेल तियीइ आब्हाहा कोयो, "बा, आंय ताआ सामने रोत नाहां उठ्यी काजे खोत मा मानही; काहाके आंय मासिक पाड़ीइरी होय." एहेंकोइत लाबाने तापास काड्यू, पोन तियाहा कुलदेवताआ मुर्ती ने सापड़्यी.

36 ताहरीइ याकोबोहो खोत लागी आन लाबानोअरी सुलाउ वोल्यू, आन कोयो, "माआ की गुनू होय? माआं की पाप होय के ताहूं एतीही खोत लागी के तू माआं फाट लागू? 37 तुमे जो माआ पुरा सामानोहो खोल्लीत पाल्य, ताहां ताहूं ताआ कोर्‍योअ सामान की सापड़्यो? काविंहीं सापड़्यो ओय ताहां तियाहा इंहीं ताआ आन माआ माअहुंउं सामने मिकी दे, आन तें आपा बेनुउं विसमेहें न्याय कोए. 38 आंय विही वोरह्ये जाआं ताअरी रोयू; यांमेहें नाहां ताआ मेडा आन बोकड़ीइ बासे तुरज्ये, आन नाहां ताआ मेडाआ माहां आंय केदिहीं खादो. 39 जिया मेडान बोकड़ाहा रानठ्ये जनवारे माइत टाक्ये, तियांहां आंय ताआ जागे ने लेतावतुतो, तियाआ नुकसानी आंयुज वेठतुतो; तें दिहे सोआय नेत राती सोआय, तू मापरोतुज तियांआं भरपाई कोइत लेतुतो. 40 माआं एहेलिही दशा ओती के दिहे गोजर आन राती हेलाअरी आंय आखड़ाअतुतो; आन माआ डोआम रोत निंद उडीत जातीते. 41 विही वोरह्ये जाआं आंय ताआ कोअमेहें रोयू; सुहूद वोरह्ये तोम आंय ताआ बेनू बेटिह्हीइ कोअते, आन सोव वोरह्ये ताआ मेडान बोकड़ाआ कोअते सेवा कोअयी; आन तुमे दोहवारी माआ मोजरी बोदली देदी. 42 माआं आब्हाआ देव, मोन्ज्ये अब्राहामोअ देव, जियाआ बीक इसाहाक बी मिकेहे, जर माआ वोगेहे ने रोतु ताहां पाक्कू तू ओमे माहूं ठाल्ले आथेज मोकली देतु. माआ दुख आन माआ मेहनतीही देखीत कोइत देवे काल्यीइ रातीम ताहूं बिवाड़्यू."

43 लाबाने याकोबोहो कोयो, "ए बेटिह्ही तोम माआज होये, आन एं पोर्‍ये बी माआज होये, आन एं मेडे आन बोकड़े बी माआज होये, आन जों किबी देखाअहे, तों आखो माआज होये; पोन ओमे आंय माआं यीं बेटिह्ही आन यींइं पोर्‍याअरी की कोइत सेकोहो? 44 ओमे साल, माआन ताआ विसमेहें शप्पत लेता, आन तो माआन ताआ विसमेहें साक्शीदार ठरे."

45 ताहां याकोबे एक डोण लेत कोइत तियाहा उबू राख्यू. 46 ताहरुउ याकोब तियाआ कुटूंबाहा कोयो, "डोणे टोलू वाला," ओं उनात कोइत तियां डोणे टोलू वालीत कोइत एक टिग बोणायू, आन तिहींज टिगोअ जागे तियां रोटू खादू. 47 तिया टिगोअ नाव लाबाने यगर-सहादुता मिक्यो, पोन याकोबे गिलियाद* मिक्यो. 48 लाबाने कोयो, "ओ टिग आज रोत माआन ताआ विसमेहें साक्शीदार रोय." तिहीं वाअहीं तियाआ नाव गिलियाद मिकाअयो, 49 आन मिजपा* बी नाव मिक्यो; काहाके लाबाने कोयो, "जाहां आपू बेनू सेटे-सेटे रोहूं, ताहां यहोवा माआन ताआ देखबाल कोअतू रोये. 50 जर तू माआ बेटिह्हीही तारास देही, नेत तू फाशुउ बिहीरी बोईंइरी वेहेवाल कोअही, ताहां आपाअरी कोड्लो माहुंउं ते ने रोय; पोन पाल, माआन ताआ विसमेहें देव साक्शीदार रोये." 51 लाबाने याकोबोहो कोयो, "या टिगोहो पाल आन या उबा राखल्या डोणोहो बी पाल, जियांहां आंय माआन ताआ विसमेहें उबा कोअयाहा. 52 ओ टिग आन ओ उबू राखल्यू डोण बेनू यी गोठीइ साक्शीदार रोये, के नुकसान कोइलाआ विसारोवाअहीं ने आंय या टिगोहो उन्कीत ताआ जागे आवो, आन ने तू या टिगोहोन या उबा राखल्या डोणोहो उन्कीत कोइत माआ जागे आवही. 53 अब्राहाम आन नाहोर आन तियांआं आब्हू; तिनू जोओंअ जे देव होये, तोज आपा बेनुउं विसमेहें न्याय कोए." ताहरुउ याकोबे तिया देवोअ शप्पत खादी जियाहा तियाआ आब्हू इसाहाक बितुतो; 54 आन याकोब तिया डोगोपोअ एक जनवार लेत कोइत गाराहा आप्यो, आन तियाआ आखा माअहुंहूं रोटू खायतेहें काजे हाद्ये; ताहराआ तियां रोटू खात कोइत डोगोपोओज रात काड्यी. 55 वेगीइ लाबान उठ्यू, आन तियाआ पोर्‍याहा आन पोर्‍यीही गुऊँ देत कोइत आन आशिर्वाद आपीत कोइत वाट लागू, आन तियाआ गावोंम वोलीत गोयु.