1 तियांज दिहोमेहें एहेलोहो ओवो के यहुदा तियाआ पायहोंअ जागे रोत जातु रोयू , आन हीरा नावोअ एका अदुल्लाम रोनारा माट्योअरी रोनु वोल्यू. 2 तिहीं यहुदे शुवा नावोअ एका कनानी माट्योअ पोर्‍यीही देख्यी; यहुदा शुवाआ पोर्‍यीइरी वेहेवाल कोइत लेदो, आन तियीइरी हुतू. 3 ते पोटाअरी ओवी, आन तियीइ एक सोऊ उबज्यु; आन यहुदे तियाआ नाव एर मिक्यो. 4 ते फाशीइ पोटाअरी ओवी, आन तियीइ फाशुउ एक सोऊ उबज्यु, आन तियाआ नाव ओनान मिक्यो. 5 आन तियीइ एक फाशुउ सोऊज उबज्यु, तियाआ नाव शेला मिक्यो; आन जेहेलाम याआ जल्म ओवो, तेहेलाम यहुदा कजीब होयरोम रोतुतो.

6 आन यहुदे तामार नावोअ एकी पोर्‍यीइरी तियाआ डाया पोर्‍या एरोअ वेहेवाल कोइत आप्यो. 7 पोन यहुदाआ तो डायु पोर्‍यू एर यहोवा देवोअ नजरेम खाराब ओतू, तियाहा काजे यहोवा देवे तियाहा माइत टाक्यू. 8 ताहां यहुदे ओनानोहो कोयो, "ताआ पायहोअ लाडीइरी हुवू जा, आन तियीइरी डेआह्हाआ नात्र्यो पुरो कोइत ताआ पायहोअ काजे पोर्‍ये उब्जाड़." 9 पोन ओनानोहो मुंदू ओतू, के तियीप रोत जों पोर्‍यो उब्जे तों तियाआ ने कोवाअनारो; तियाहा कोत जाहां तो तियाआ पाबिह्हीइरी हुवू गोयु, ताहां तियाआ पायहोअ नावे पारवाड़ ने सालुहूं जोवे कोत तिये उमरपाईं पुंयपोअ वेरी देदो. 10 ओं काम जों तिये कोअयो, तिहीं वाअहीं यहोवा देव नाराज ओवू; आन तिये तियाहा बी माइत टाक्यू. 11 ताहरुउ यहुदा तियाआ वोवड़ीह्ही तामारेहे कोयो, "जाअहूं जाआं माआ पोर्‍यू शेलू जुवान ने आवीत जाय, ताअहूं जाआं ताआ डायाआ कोअमेहें रोंडोअ होस रोजी." काहाके यहुदा विसार कोअतुतो के शेलू बी तियाआ पायहोअ होस मोइत-होइत जाय. ताहरीइ तामार तियीइ डायाआ कोअ जात कोइत रोनी वोल्यी.

12 वारुज दिही सेकीत गोया तिहींइं फासाड़ी यहुदाआ लाडी जे शुवाआ पोर्‍यी ओती, ते मोइत गोयी; ताहरुउ यहुदा विखाआ दिही सेकाड़ीत तियाआ दोस्ती अदुल्लामवाला हीराअरी तियाआ मेडान बोकड़ाआ रुंग्हें कात्रीइनाराआ जागे तिम्नाथोम वाट लागू. 13 आन तामारेहे ए खबर मिल्यी, "ताआ होवरुह्हू तियाआ मेडान बोकड़ाआ रुंग्हें कात्रीइलोअ कोअते तिम्नाथोम जाहे." 14 ताहां तियी ओ विसार कोइत के माआ डेउह्हू शेला जुवान आवीत गोयुहू, तेबी माआ वेहेवाल तियाअरी नाहां कोअयो; तियीइ रोंडायीइ पेरवट काडीत मिक्यी आन ते एनायीम गावोंअ गेटोअ जागे जात कोइत, जो तिम्नाथोअ वाटेमेहें होय तिहीं कुप्तू वालीत ठावकीज टापाइत कोइत बोहीत रोयी.

15 जाहां यहुदे तियीही देख्यी, ताहां तियीही रांडी जाअयीं; काहाके ते तियीइ मुख टापित रोयीते. 16 तो वाटेम सालताम तियीइहें वोल्‍यू आन तियीही कोनु वोल्यू, "माहूं ताअरी हुवुहूं दे," काहाके यहुदाहा ने मुंदू ओतू, के ते तियाआ वोवडीह्ही होय. तियी कोयो, "आंय तुमुहूं माअरी हुवुहूं देहीं, पोन तुमू माहूं की आपहा?"

17 यहुदे कोयो, "आंय माआं बोकड़ीमेहें रोत बोकड़ीइ एक हाज्जोहो बासो ताआ जागे लेत मोकली देहीं." ताहां तियी कोयो, "तुमू तियाहा कोयों लेत मोकलाहा, ताअहूं जाआं केहें तुमू माआ जागे काविंहीं निशाणी मिकीत जाहा के?"

18 यहुदे फुश्यो, "आंय ताआ जागे की निशाणी मिकीत जांव?" तियी कोयो, "तुमाआ मुंदी, गोलामेर्‍युउ दोरू, आन तुमाआ आथोमेर्‍यीइ डेंगार." ताहां तिये तियीही ते वस्तु आपी देदी, आन तियीइरी हुवीत लेदो, आन तामार तियाप रोत पोटाअरी ओवी. 19 ताहरीइ ते उठीत कोइत जाती रोयी, आन तियी कुप्तू काडीत कोइत तियीइ रोंडायीइ पेरवट फाशुउ पोवित लेदू.

20 ताहरुउ यहुदे बोकड़ीइ एका बासाहा तियाआ दोस्ती अदुल्लामवाला हीराआ आथे लेत मोकली देदो, के ते निशाणी मिकल्यी वस्तु तियीइ आथोम रोत सोड़वीत लेत आवीत सेके; पोन ते बोईं तियाहा ने मिल्यी. 21 ताहां तिये तिहींइं माअहुंहूं फुश्यो, "इंहीं एनायीम गांवोअ वाटीइ मेरे ओती ते रांडी का होये?"

तियां कोयो, "इंहीं ते कोड्लीज रांडी कायने ओती."

22 ताहरुउ तो यहुदाआ जागे वापिस जात कोइत कोयो, "माहूं ते नाहां मिल्यी आन तिहींइं माअहें कोयो के, ‘इंहीं ते कोड्लीज रांडी कायने ओती.’"

23 ताहां यहुदे कोयो, "जाअहूं दे, ते निशाणीइ वस्तु तियीज पोअ रोअहूं दे, नेते आपाआज इजोत जाये; पाल, आंय बोकड़ीइ बासो मोकली देदोतो, पोन तेज ताहूं ने मिल्यी."

24 एहेलाहा तीनेक मोयनाआ फासाड़ी यहुदाहा ए खबर मिल्यी, "ताआ वोवडीह्ही तामार सिनालो कोअयोहो; फाशीइ ते सिनालावाअहीं पोटाअरी बी ओत गोयीही." ताहां यहुदे कोयो, "तियीही बारथे लेत आवा आन पेटाड़ी द्या."

25 जेहेलाम तियीही बारथे काटतेते, तेहलाम तियी तियाआ होवराह्हाहा एहें कोत मोकल्यो, "जिया माट्योअ ए वस्तु होय, तियाज वाअहीं आंय पोटाअरी ओवीही," फाश्योअ तियी ओं बी कोत मोकल्यो, "वारुहूं ते ओलखा ए मुंदी, गोलामेर्‍युउ दोरू, आन डेंगार कोडाआ होये."

26 यहुदे तियीं वस्तुहू ओलखीत कोइत कोयो, "ते मापरोत कमी सुकीही; काहाके आंय तियीइ वेहेवाल माआ पोर्‍या शेलाअरी नाहां कोअयो." आन तो तामारेएरी फाशुउ फिरीत केदिहींज ने हुतू.

27 जाहां तियीइ ठाल्ली पोड़ीइलोअ वेल आयी, ताहां ओ मुंदू गोयू के तियीइ पोटामेहें एकीज डेडीइ बेन पोर्‍ये होय. 28 आन जेहेलाम ते पोर्‍याहा जल्म आपतीते, ताहां एका पोर्‍याआ आथ बारथे आयू, आन हुंवारकी रात्लो हुत तियाआ आथोअरी एहें कोत कोइत बांदी देदो, "पेल ओज पोर्‍यू उबज्यु." 29 जाहां तिये आथ मायते लेत लेदू, ताहां तियाआ पाही उबज्यु. ताहां ते हुंवारकी कोयो, "तू काहा सोताहाज निहीइलाआ वाट बोणावीत आयू?" तियाहा काजे तियाआ नाव पेरेस मिकाअयो. 30 तिहींइं फासाड़ी जियाआ आथेज रात्लो हुत बांद्योतो तो पाही उबज्यु, आन तियाआ नाव जेरह मिक्यो.