1 ताहरुउ योसेफ तियाआ आब्हाअ सोबीइ जागे बोहीत कोइत रोड़्यु आन तियाहा गुउं देदू. 2 आन योसेफे तियां डाक्टरहों, जे तियाआ साकर्‍या ओता, हुकुम आप्यु के तियाआ आब्हाआ तोड़ोमेहें मासालो पोअयो. ताहां डाक्टरहों याकोबोअ तोड़ोमेहें मासालो पोई देदो. 3 आन तियाआ सालिही दिही पुरा ओवा, काहाके जिया तोड़ोमेहें मासालो पोअतेहे, तियांहां एताहा दिही पुरा लागताहा: आन मिसरी माअहें तियाआ काजे सत्तर दिही जाआं विखु कोअते रोये.

4 जाहां तियाआ विखाआ दिही वितीत गोया, ताहां योसेफ फारोअ कुटूंबाअ माअहुंहूं कोनु वोल्यू, "जर तुमाआ मेरवानीइ नजर मापोअ ओय ताहां माआ ए विनंती फारोहो उनाड़ा, 5 माआ आब्हे ओं कोत कोइत, ‘पाल, आंय मोअहूं होय,’ माहूं ए शप्पत खावाड़्यी, ‘जो माहोंण आंय माआ काजे कनान देसोम खुंआण्योहों तियाजमेहें माहूं डाटजी.’✝ तियाहा काजे ओमे माहूं तिहीं जात कोइत माआ आब्हाहा डाटीइलाअ आज्ञा आपे, तिहींइं फासाड़ी आंय वोलीत आविहीं."

6 ताहां फारो कोयो, "जात कोइत ताआ आब्हाअ खावाड़ल्यी शप्पतेए पुरमाणे तियाहा डाटीत आव."

7 ताहरुउ योसेफ तियाआ आब्हाहा डाटीइलाअ काजे वाट लागू, आन फारोअ आखा कामकाज्या मोन्ज्ये तियाआ कोओअ डायहां आन मिसर देसोअ आखा डायहां तियाअरी वाट लागा, 8 आन योसेफोअ कुटूंबाअ आखे माअहें आन तियाआ पाही आन तियाआ आब्हाअ कुटूंबाअ आखे माअहें बी आरी गोये; पोन ते तियांआं बोईं-पोर्‍ये, आन मेडे, डोगरेन बोकड़े गोशेन देसोम सोड़ीत गोये. 9 आन तियाअरी गाडे आन कोड़ापोअ बोहनारा बी गोया, एहेंकोइत जाअखीलीही वोडी गोरदी ओत गोयी.

10 जेहेलाम ते आतादोअ खोलाआ जागे जाआं, जो यारदेन नोयीइ एकी तोड़ होय, तिहीं पोत्ये, ताहां तिहीं जाअखीलुहू विलाप कोअयू; आन योसेफ तियाआ आब्हाअ काजे रातेन दिहोअ विखु कोआड़्यु. 11 आतादोअ खोलामेर्‍याआ विखाहा देखीत कोइत तिया देसोम रोनारे कनानी माअहें कोयो, "ओते मिसरीइ एखू वोडु विखु ओय." तिहींज वाअहीं तिया जागाअ नाव आबेलमिस्रेम* पोड्यो, आन तो यारदेनोअ एकी तोड़ होय.

12 याकोबोअ पोर्‍या तोंज काम कोअयो, जियाअ तिये तियांहां आज्ञा आप्यी ते. 13 मोन्ज्ये तियां तियाहा कनान देसोमेहें लेत जात कोइत मकपेलाअ तिया जागामेर्‍याआ माहणोमेहें, जो मम्रेए सामने होय, डाटी देदो; जियाहा अब्राहामे हित्ती एफ्रोनोअ आथे याअकाजे वेसातु लेदुतो के तो माहणोअ काजे तियाआ खाजगी जागु ओत जाय.✝ 14 तियाआ आब्हाहा डाटीत कोइत योसेफ तियाआ पायहोंहों आन तियां आखाअ आरी, जे तियाआ आब्हाहा डाटीइलाअ कोअते तियाअरी गोयेते, मिसरोम वोलीत आयू.

15 जाहां योसेफोअ पायहों पाल्यो के आपाअ आब्हू मोइत गोयुहू, ताहराअ कोना वोल्या, "केहेंनेत योसेफ आपाअ फाट लागे, आन जेतू तारास आपू तियाहा देदूतो आखाअ पुरु बोदलू आपापोअ लेय." 16 तियाहा काजे तियां योसेफोअ जागे जात कोइत एहें कोत कोल्यो, "ताआ आब्हे मोइलाअ पेल आमुहूं ओ हुकुम आप्युतो, 17 ‘तुमू योसेफोहो एहेंकोइत कोजा, के आमू रावणी कोअताहा के तु ताआ पायहोंअ गुनाहां आन पापोहो माफ कोअ; आमू ताहूं तारास देदूतो, पोन ओमे ताआ आब्हाअ देवोअ पावरोअ गुनाहां माफ कोअ’." तियांआं ए गोठ्यी उनाइत कोइत योसेफ रोडी देदो.

18 आन तियाआ पाही बी सोताहा जात कोइत तियाआ सामने पागे पोड़्या, आन कोय, "आमू ताआ पावर होय."

19 योसेफे तियांहां कोयो, "मा बिहा, आंय देवोअ जागापोअ होय? 20 तुमू माआ काजे नुकसानीइ विसार कोअयुतो; पोन देवे तियीज गोठीमेहें हाजलायीइ विसार कोअयू, जियावाअहीं तो एहेलोहो कोए, जेहेलोहो आज्याअ दिहो देखाअहे, के जाअखीला माअहुंउं जिव वासाइत रोय. 21 तियाहा काजे ओमे मा बिहा; आंय तुमुहूं आन तुमाआ बोईं पोर्‍याहा पोहीहीं." एहेंकोइत तिये तियांहां पोटावीत कोइत शांती आप्यी.

22 योसेफ तियाआ आब्हाअ कुटूंबाअरी मिसर देसोम रोयू, आन योसेफ एक होव दोहो वोरह्ये जिवतु रोयू. 23 आन योसेफ एफ्राईमोअ पोर्‍याआ तिसरी पिड़ी जाआं देख्यी; आन मनश्शेए पोर्‍यू मकीरोअ पोर्‍ये बी, जे उबज्या ते, तियांहां बोदाम लेदा. 24 योसेफ तियाआ पायहोहो कोयो, "आंय ते मोअहूं होय; पोन देव तुमाआ खोरीज ओर कोए, आन तुमुहूं या देसोम रोत काडीत कोइत तिया देसोम पोताड़ी देय, जियाआ आपीइलाअ तिये अब्राहाम, इसाहाक, आन याकोबोअरी शप्पत खादीते." 25 ताहरुउ योसेफे इस्राएली माअहुंहूं एहें कोत कोइत के देव हुदाअलीज तुमाआ ओर कोए, तियांहां यी बाप्तिम शप्पत खावाड़्यी, "आमू ताआ आडे इंहीं रोत तिया देसोम लेत जाहूं."✝ 26 एहें कोइत योसेफ एक होवेन दोहो वोरह्योअ ओवीत कोइत मोइत गोयु; आन तियाआ तोड़ोमेहें मासालो पोअयो, आन तो तोड़ मिसर देसोमेहें एकी तोड़पेटीमेहें मिक्यो.