1 ताहां देवे याकोबोहो कोयो, "इंहीं रोत निहीत कोइत बेथेलोम जा, आन तिहींज रो; जेहेलाम तू ताआ पाही एसावोअ बिके वाअहीं नाहांतुतो तेहलाम जिये ताहूं तिहीं दर्शन आप्यो आन तिहीं देवोअ काजे देवान्यो बोणाव."✝

2 ताहरुउ याकोब तियाआ कुटुंबाहा, आन तियां आखाहा बी जे तियाअरी ओते कोयो, "तुमापोअ जे पारका देवताआ मुर्ती ओय, ताहां तियांहां काडीत उडाड़ा; आन सोताहा सोके कोआ, आन तुमाआ आंगड़े बोदलीत ल्या; 3 आवा, आपू इंहीं रोत निहीत कोइत बेथेलोम जात्ले; तिहीं आंय देवोअ काजे देवान्यो बोणावीहीं, जिये ओड़सनीइ दिहोम माहूं उत्तर आप्यो, आन जियी वाटे आंय सालतुतो, तियी वाटेमेहें माआ आरी रोयू." 4 तियाहा काजे जेते पारके देवता तियांपोअ ओते, आन जेते बिजल्ये तियांआं कानोम ओते, ते आखे काडीत कोइत याकोबोहो आपी देदे; आन याकोब तियांहां तिया वांज्या साड़ोअ जागे डाटी देदे, जे शकेमोअ जागे ओते.

5 जाहां याकोब आन तियाआ पोर्‍या होयर सोड़्यो, ताहां तियांआं आसे-पासेए गावोंमेर्‍याआ रोनाराआ मोनोमेहें देवोअ बिक पोआयी के ते याकोबोअ पोर्‍याअ फाट नाहां लागे. 6 याकोबे जे तियाअरी ओते तियां आखाहा लेत कोइत, कनान देसोअ लूज गावोंमेहें आवयू. तिया गांवोहों बेथेल बी कोतेहे. 7 तिहीं तिये एक देवान्यो बोणायो, आन तिया जागाअ नाव एलबेथेल* मिक्यो; जेहेलाम तो तियाआ पायहोअ बिकेवाअहीं नाहांतुतो ताहां देव तियाहा तिहींज देखाअयू तो. 8 रिबीकाअ पोर्‍याअ सेवा कोअनारी साकर्‍यी दबोरा मोइत गोयी, आन बेथेलोअ वांज्या साड़ोअ निसे तियीही डाटी देदी, आन तिया वांज्या साड़ोअ नाव अल्लोनबक्कूत* मिकाअयो.

9 फाशुउ याकोबोअ पद्दन-अरामोम रोत आवीइलोअ फासाड़ी देवे दुसरीवारी तियाहा दर्शन आपीत कोइत आशिर्वाद आप्यू. 10 आन देवे तियाहा कोयो, "ओमे जाआं ताआ नाव याकोब रोयो, पोन आगाड़ी ताआ नाव याकोब ने रोय, तू इस्राएल कोवाअही."✝ एहें कोइत तिये तियाआ नाव इस्राएल मिक्यो. 11 देवे तियाहा कोयो, "आंय सर्वसेक्तिमान देव होय. तू फुलही-फोलही आन वादही; आन तापोअ रोत एक टोलू कि पोन जाअखी टोली उब्जे, आन ताआ पारवाड़ीम राजा उब्जे. 12 आन जो देस आंय अब्राहाम आन इसाहाकोहो आप्योहो, तोज देस ताहूं आपोहो, आन ताआ फासाड़ी ताआ पारवाड़ीही बी आपीहीं."✝ 13 ताहरुउ देव तिया जागाम रोत, जिहीं तिये याकोबोअरी गोठी कोअयी, तियाआ जागे रोत उसे जातु रोयू. 14 आन जिया जागाम देवे याकोबोअरी गोठी कोअयी, तिहीं तिये डोण उबू कोअयू, आन तियापोअ दाराक्शाआ रोहो आन जेयतुनोअ तेल टाक्यो. 15 जिहीं देवे याकोबोअरी गोठी कोअयी, तिया जागाअ नाव तिये बेथेल मिक्यो.✝

16 ताहरेए याकोब आन तियाआ कोर्‍येए माअहें बेथेलोम रोत निहींये, आन एप्राता गांव आहनेज रोयोतो, ताहां राहेलोहो ठाल्ली पोडीइलाअ वेल आयी, तियीही जास्ती दुखो वोल्यो. 17 जाहां तियीही जाअखो-जाअखो दुखतोतो ताहरीइ हुंवारकी तियीही कोहे, "मा बिही; ओमे बी ताआ सोऊज रोये." 18 ताहां एहेलोह ओवो के तियीइ जिव निहीता-निहीता तियी तियाआ पोर्‍याअ नाव बेनोनी* मिक्यो; आन मोइत गोयी. पोन तियाआ आब्हे तियाआ नाव बिन्यामीन* मिक्यो.

19 राहेल मोइत गोयी, आन एप्राता मोन्ज्ये बेथलेहेमोअ वाटेपोअ तियीही डाटी देदी. 20 याकोब तियीइ माहणोपोअ एक डोण उबू राख्यू: राहेलोअ माहणोअ तो डोण आज बी तिहीं उबू होय. 21 इस्राएल आगाड़ी वाट लागू, आन एदेर नावोअ गोडोअ आगाड़ी तियाआ तोंबू उबू राख्यू.

22 जाहां इस्राएल तिया देसोम वोहती कोइत रोतुतो, ताहां एक दिही एहेलोहो ओवो के रूबेन जात कोइत तियाआ आब्हाअ उप-लाडी बिल्हाअरी हुतू; आन ए गोठ इस्राएलोह मुंदू गोयू.✝ इस्राएलोअ बारा पोर्‍या ओता. 23 तियां बारा पोर्‍यामेहें लिआअ पोर्‍या ए ओता; याकोबोअ डायु पोर्‍यू रूबेन, आन शिमोन, लेवी, यहुदा, इस्साखार, आन जबुलून. 24 आन राहेलोअ पोर्‍या ए ओता; योसेफ आन बिन्यामीन. 25 आन राहेलोअ पावरी बिल्हाअ पोर्‍या ए ओता; दान आन नफ्ताली. 26 आन लिआअ पावरी जिल्पाअ पोर्‍या ए ओता: गाद, आन आशेर. इस्राएलोअ एज पोर्‍या ओवा, जे तियाप रोत पद्दन-अरामोमेहें उबज्याते.

27 याकोब तियाआ आब्हाअ जागे मम्रे गावोंम, जो किर्यात-आर्बा मोन्ज्ये हेब्रोनोम आवयू, जिहीं अब्राहाम आन इसाहाक पारका ओतकोइत रोयाते.✝ 28 इसाहाकोअ वय एक होवेन हांयशी वोरह्ये ओवी. 29 आन इसाहाकोअ जिव निहीत गोयु आन तो मोइत गोयु, आन तो डायु आन पुरी वोयेए ओत कोइत तियाआ माअहूंमेहें जात मिल्यू; आन तियाआ पोर्‍या एसाव आन याकोबे तियाहा ओजी देदू.