1 सारा एक होव सात्तावीस वोरह्ये जाआं जिवयी; एतोज जाआं तियीइ जिवणो ओतो. 2 ते किर्यात-आर्बा यी जागेहे तियीइ मोयात ओत गोयी. ओ जागू कनान देसोमेहें होये, आन याहा हेब्रोन बी कोतेहे. तियाहा काजे अब्राहाम साराआ काजे विखे बोहू आयू.

3 ताहरुउ अब्राहाम तोड़ोअ जागे रोत उठीत कोइत हित्तीहीं कोनु वोल्यू, 4 "आंय तुमाआ विसमेहें पावणू आन पारकू होय; तुमाआ विसमेहें माहूं माहणोअ कोअते एकसोट्युज वेसातू जागू आपा, जो कायम माआंज रोय,✝ ताहां आंय माआं लाडीइ तोड़ ओजीत सेकहीं."

5 ताहां हित्तीवाला माअहूं अब्राहामोहो कोयो, 6 "आमाआ गोठ उनाइत ले दादा; तु ते आमाआ विसमेहें वोडु पुडारी होय. आमाआ माहणोमेहें रोत जों ताहूं गोमतोय तियामेहें ताआ लाडीइ तोड़ डाटेए; आमामेर्‍योअ कोडोज माहुंउं ताहूं माहोंण आपीइलाआ ने नाकारे, आन तोड़ डाटीइलो काजे ओड़सन बी ने लेतावे."

7 ताहरुउ अब्राहाम उठीत कोइत उबू रोयू, आन तिया देसोम रोनारा हित्तीइ हुंबर जारीत कोइत कोनु वोल्यू, 8 "जर तुमाआ ए इश्शा ओय के आंय माआ लाडीइ तोडोहो डाटीत कोइत माआ डोआआ आडोल कोओ, ताहां माआ विनंती होय के सोहारोअ पोर्‍यू एफ्रोन याहा माआ काजे रावणी कोआ, 9 के तो तियाआ मकपेलावालू कुपू, जो तियाआ खेतोअ हेडापोअ होये, तियाआ पुरी किम्मत लेत कोइत माहूं आपी देय, ताहां तो तुमाआ विसमेहें माहणोअ काजे माआ खाजगी जागु ओत जाय."

10 एफ्रोन ते हित्तीहींइ विसमेहें बोहीत रोयुतो, तिये जेत्ते हित्ती होयरोअ बाअणाम रोत मायते आवतेते, तियां आखाआ सामने अब्राहामोहो उत्तर आप्यो, 11 "मालिख, एहेलोहो नाहां, माआ उनाआ; तो जागु आंय ताहूं आपोहो, आन तियामेहें जे कुपा होय, ते बी आंय ताहूं आपोहो; माआ आखा गावला पायहोंअ सामने आंय तियाहा ताहूं आपी देहो; तिहीं तु ताआ लाडीइ तोड़ ओजेए."

12 ताहरुउ अब्राहाम तिया देसोअ रोनाराआ सामने जार्‍यो, 13 आन तियां आखाआ सामने एफ्रोनोहो कोयो, "जर ताआ मोर्जी ओय, ताहां माआ उनाआ: तिया जागाआ जे किम्मत ओय, ते आंय आपोहो ते मापरोत लेत ले; ताहरुउ आंय माआ लाडीइ तोड़ तिहीं ओजीहीं."

14 एफ्रोने अब्राहामोहो उत्तर आप्यो, 15 "मालिख, माआ गोठ उनाआ, तिया जागाआ किम्मत ते शार होव सांदीइ रुप्या होय; पोन माआ आन ताआ विसमेहें ओं की होय? ताआ लाडीइ तोड़ माहणोमेहें ओजेए." 16 अब्राहामे एफ्रोनोअ गोठ मानित कोइत तियाहा जेताहा पोशा तिये आखा हित्तीइ आगाड़ी कोयाते, तेताहा सांदीइ रुप्या मोन्ज्ये शार होव सांदीइ रुप्या जे वापाराम सालताते ते तोलीत आप्या.

17 एहेंकोइत एफ्रोनोअ जागू जो मम्रेए हुंबर मकपेलामेहें ओतू आन ते कुपा आन तियाआ हेडाआ मेरेमेरे ओते तें आखे साड़े बी, 18 आन जेते हित्ती तियाआ होयरोअ बाअणाम रोत मायते जातेते, तियां आखाआ सामने तो जागू अब्राहामोअ ताबाम आवीत लागू.✝

19 तिहींइं फासाड़ी अब्राहामे तियाआ लाडी साराहा तिया मकपेलावाला जागाआ कुपामेहें, जो मम्रेए मोन्ज्ये हेब्रोनोअ सामने कनान देसोम होय तिहीं ओजी देदी. 20 एहेंकोइत तो जागुन तो कुपू नेहें ओतू माहणोअ कोअते हित्तीवालाप रोत अब्राहामोअ ताबाम पाक्कू आवीत लागू.