1 अब्रामोअ लाडी साराआ पोर्‍ये कायने ओते. तियीइ हाजिरा नावोअ एक मिसरवाली पावरीइं ओती. 2 सारे अब्रामोहो कोयो, "पाल, यहोवा देवे तोम माआं पोर्‍ये ओवीइलोअ बोंद कोइत मिक्योहो, तियाहा काजे आंय ताहूं विनंती कोअहो के तू माआं पावरीइरी जात हुवेए; ओत सेकेहे के माआं कुटूंबो तियी वाअहीं वादीत सेके." साराआ ए गोठ अब्रामे मानित लेदी. 3 तियाहा काजे जाहां अब्रामोहो कनान देसोम रोत्लाहा दोहो वोरह्ये पुरे ओवे, ताहां तियाआ लाडी सारे तियीइ मिसरवाली पावरी हाजिराहा लेत कोइत तियीइ माट्यो अब्रामोहो आप्यी, के ते तियाआ लाडी बोणित सेके. 4 तो हाजिराअरी हुतू ताहां ते पोटाअरी ओवी. जाहां तियी जाअयों के ते पोटाअरी होय, ताहां ते तियीइ मालखीही खाराब नजरे वाअहीं पाली वोल्यी.

5 ताहरीइ सारे अब्रामोहो कोयो, "जो मापोअ दाबाव आयू, तो ताआज बोसी रोय. आंय ते माआ पावरीही ताआ लाडी कोइत आप्यी; पोन जाहां तियी फारक्य के ते पोटाअरी होय, ताहां ते माहूं खाराब नजरे वाअहीं पाली वोल्यी; तियाहा काजे यहोवा माआं आन ताआ विसमेहें न्याय कोअहूं जोवे."

6 अब्रामे साराहा कोयो, "देख, ताआ पावरीइं ताआ आथोम होय; जेहेलोहो ताहूं गोमे तेहेलोहो तियीइरी कोओ." ताहरीइ सारे तियीही तारास देनी वोल्यी, आन ताहरीइ हाजिरा तियीइ सामने रोत नाहीत गोयी.

7 ताहराआ यहोवाआ देवदूते तियीही रानोमेहें शूरोअ वाटेम एका उकलाआ जागे देखाअयी ताहां कोयो, 8 "ए साराआ पावरी हाजिरा, तू का रोत आवेहे आन का जाहे?" तियी कोयो, "आंय माआं मालखी साराआ सामने रोत नाहीत आयीही."

9 यहोवा देवोअ देवदूते तियीही कोयो, "ताआ मालखीइहीं वोलीत जा आन तियीइ ताबाम रो." 10 फाशोअ यहोवाआ देवदूते तियीही ओं बी कोयो, "आंय ताआ पारवाड़ जाअखी वादाड़ीहीं, आन गणती ने ओत सेके एतीही जाआं वादाड़ीहीं." 11 यहोवाआ देवदूते तियीही कोयो, "पाल, तू पोटाअरी होय, आन ताआ एक सोऊ ओवे; तू तियाआ नाव इस्माएल* मिकजी, काहाके यहोवा ताआ तारास देख्युहू. 12 आन तो पोर्‍यू रानगोदड़ाआ होस बोणे, तियाआ आथ आखाआ विरुद्दाम उठे आन आखाआ आथ तियाआ विरुद्दाम उठे; आन तो तियाआ आखा पायहोअ विसमेहें वोहती कोइत रोय."

13 ताहां तियीइरी गोठी कोअनारा यहोवा देवोअ नाव तियी अत्ताएलरोई* पाड़्योन कोयो, "केहें आंय हुदाअलीज देवोहो देख्यू आन देखीत बी जिवती रोयी?" 14 तिहीं वाअहीं तियी वेईइ नाव बिरलाहायरोई वेए पोड़्यी; तो ते कादेश आन बेरेदोअ विसमेहें होय.

15 हाजिराहा अब्रामोप रोत एक पोर्‍यू उबज्यु; आन तिये तिया पोर्‍याआ नाव इस्माएल मिक्यो.✝ 16 जाहां हाजिरा अब्रामोप रोत इस्माएलोहो जल्म आप्यो तियी होमसे अब्राम शेहांयशी वोरह्योअ ओतू.