उत्पत्ती 20

अब्राहाम आन अबीमेलेक

1 ताहरुउ अब्राहाम तिहीं रोत निहीत कोइत देहामा*20:1 देहामा मोन्ज्ये नेगेव देसोअहें आवीत कोइत कादेश आन शूरोअ विसमेहें रुकाअयु, आन गरारोम रोनु वोल्यू. 2 आन अब्राहामे तियाआ लाडी साराआ बाप्तिमेहें कोयो, "ते माआ बोअह्हीं होय," तियाहा काजे गरारोअ राजा अबीमेलेके तियाआ माअहें मोकलीत कोइत साराहा हादीत लेदी.✝20:2 उत्प 12:13; 26:7 3 प्रभु राती होपनामेहें अबीमेलेकोअ जागे आवीत कोयो, "देख, जियी बोईंहीं तुमे मिकीत लेदीही तियीइ वाखरी तु मोइत जाही, काहाके ते वेसाअली होय." 4 पोन अबीमेलेक तियीइ जागे आहने ने गोयुतो, "प्रभु, केहें तु निर्दुस देसोहों बी माइत टाकही के? 5 ‘ए माआ बोअह्हीं होय’ एहें कोत माहूं तिये सोताहाज नाहां कोयो के? आन तियी बोईं बी सोताहा कोयो, ‘ओ माआ पाही होय,’ ताहां आंय तोम माआ हाजा मोनोवाअहीं आन माआ हाजा वेवारा वाअहीं ओं काम कोअयो."

6 देवे तियाहा होपनाम कोयो, "होव, तुमे ओं काम ताआ हाजा मोनोवाअहीं कोअयोहो, ओं माहूं बी मुंदू होय, आन तु माआं विरुद्दाम पाप ने कोअहूं जोवे कोत आंय ताहूं रुकीत बी मिक्यू; तिहींज वाअहीं तोम आंय ताहूं तियीही आथ ने लागाडुहूं देदू. 7 ओमे ए तिया माट्योअ बोईं तु वापिस कोई दे; काहाके तो भविश्यवक्ता होय, आन तो ताआ काजे प्रार्थना कोए, ताहां तु वासात जाही; पोन जर तु तियीही वापिस ने कोअही, ताहां जाइंत लेजी, के तु आन ताआ जेत्ते माअहें होय, एं आक्खे हुदाअलीज मोइत जाय."

8 अबीमेलेक वेगर्‍युउ सिंजीवड़ाअरीही उठ्यू आन तियाआ आखा सेवकोहों हादीत कोइत ए गोठी कोताप्यी; आन तें आखे माअहें जाअखीलेहे बित गोये. 9 ताहरुउ अबीमेलेक अब्राहामोहो हादीत कोइत कोयो, "तुमे आमाअरी एहें काहा कोअयो? आंय ताआ की बिगाड़ल्यो कोत तुमे मापोओन माआ राजोपोअ एतू वोडु पाप टाकी देदुहू? तुमे माअरी हाजोन्ने काम कोअयो." 10 फाशुउ अबीमेलेके अब्राहामोहो फुश्यो, "तु की समजीत कोइत एहेलोहो काम कोअयो?"

11 अब्राहामे कोयो, "आंय एहेलोहो ईतव्योतो के इंहींइं माहें देवोहो वाहीं ने बित सालतेय; ताहां माआ लाडीइ काजे माहूं माइत टाकी देय. 12 आन एहें बी नात्र्यामेहें हुदाअलीज ए माआ बोअह्हीं होय; ए माआ आब्हाआ पोर्‍यी ते होय, पोन माआ आयहीइ पोर्‍यी नाहां; ताहरीइ ए माआ लाडी बोणीत गोयी. 13 आन जाहां देवे माहूं माआ आब्हाआ कोओ सोड़ीत कोइत निहीइलाआ आदेश आप्यू, ताहां आंय यीही कोयोतो के आपू बेनू जिहीं-जिहीं जाहूं तिहीं-तिहीं ओ माआ पाही होय कोत तु माआ बाप्तिम कोजी, एतीही तेंव ताहूं मापोअ मेरवानी कोइली आवे."

14 ताहरुउ अबीमेलेके मेडे, डोगरेन बोकड़े, आन पावर-पावरीइं अब्राहामोहो आप्ये, आन तियाआ लाडी साराहा बी तियाहा वापिस कोई देदी. 15 आन अबीमेलेके कोयो, "देख, माआ देस ताआ सामने होय, जिहीं ताहूं पोटे तिहीं रो." 16 आन अबीमेलेके साराहा कोयो, "पाल, आंय ताआ पायहोहो होनाआ एक हाजार रुप्या आप्याहा. पाल, तियां आखा माअहोंअ सामने ताआ भरपाई ओवीही आन इंहीं वाअहीं तु निर्दुस होय कोत आखाहा मुंदू जाय."

17 ताहां अब्राहामे यहोवा देवोहो प्रार्थना कोअयी, आन यहोवा देवे अबीमेलेक आन तियाआ लाडी आन पावरीहीं हुदारी देदे आन तियांहां जोड़े वोल्ये. 18 काहाके यहोवा देवे अब्राहामोअ लाडी साराआ वाखरी अबीमेलेकोअ कोअमेर्‍यीइ आखी बोईंहीं एकसोट्यीज वांज्यी कोई देदीते.