उत्पत्ती 43

बिन्यामीनोअरी मिसर देसोम जाअलो

1 कनान देसोमेहें जुदू काल पोड़तू गोयु. 2 जाहां तो ओन सेलाइत गोयो, जो मिसर देसोम रोत लेत आयाते, ताहरुउ तियांआं आब्हे तियांहां कोयो, "मिसर देसोम फाश्या जावा, आन आपाअ खाअलोअ कोअते थोड़ाक फाशाअ दाणा वेसाता लेतावा."

3 ताहरुउ यहुदे तियाहा कोयो, "मिसर देसोअ मालख्ये आमुहूं धम्की आपीत कोइत कोयोहो, ‘जर तुमाआ पाही तुमाअरी ने आवे, ताहां तुमू माआ सामने ने आवीत सेकहा.’ 4 जर तू आमाआ पायहोहो आमाअरी मोकलिही, ताहां आमू मिसर देसोम जात कोइत ताआ काजे खाअलोअ वस्तु वेसातु लेतावुहूं, 5 पोन जर तू तियाहा ने मोकलिही, ताहां आमू ने जानारा, काहाके तिये माट्ये आमुहूं कोयोहो, ‘जर तुमाआ पाही तुमाअरी ने रोय, ताहां तुमू माआ सामने ने आवीत सेकहा.’"

6 ताहां याकोब कोयो, "तुमू तिया माट्योहो ओं कोत कोइत के आमाआं फाश्युउ एक पाही होये, काहा माअरी खाराब सालत्ला?"

7 तियां कोयो, "जाहां तिये माट्ये आमाआ आन आमाआ कुटूंबाआ हालसालीइ बाप्तिमेहें एहें कोइत फुश्यो, ‘केहें तुमाआ आब्हू ओमे जाआं जिवतु होय? केहें तुमाआ एखु पाही होय जी के?’ ताहरोअ तिये फुशो तेहें कोइत आमू तियाहा कोताप्य; आमुहूं की मुंदू के तो एहें कोये, ‘तुमाआ पायहोहो इंहीं लेतावा’."

8 ताहरुउ यहुदे तियाआ आब्हा याकोबोहो कोयो, "पोर्‍याहा माअरी मोकली दे, ताहराआ आमू जाहूं; इंहीं वाअहीं तुन आमू, आन आपाआ बोईंन पोर्‍ये ने मोअहूं, पोन जिवते रोहूं. 9 आंय याआ जामिन रोहो; माआज आथे तू याहा वापिस लेजी. जर आंय याहा ताआ जागे पोताडीत कोइत ताआ सामने ने मिको, ताहां आंय हादाजलम ताआ गुनेगार ठरिहीं. 10 जर आपू वाआ ने लागाड़ता, ताहां ते ओमे जाआं दुसरी फेरी फिरीत आवता."

11 ताहरोअ तियांआं आब्हे याकोबे तियांहां कोयो, "जर हुदाअलीज एहेलीज गोठ ओय ताहां जी एहें कोआ, तुमाआं पोतामेहें या देसोमेर्‍यीइ हाजी हाजी वस्तु पोइत ल्या: सिक, मोद, मासालो, ओत्तर, पिस्ता, आन बादाम. ओं मिसर देसोअ मालख्योहो भेट आपीइलाअ काजे लेत जावा. 12 फाश्याआ तुमू आरी डोबील्या पोशा लेत जावा; आन जे पोशा तुमाआं पोतामेहें मिकीत कोइत वाली देदाते, तियांहां बी लेत जावा; केहेंनेत ओं विहराइत कोइत ओवयो ओये. 13 तुमाआ पायहोहो बी आरी लेत कोइत तिया देसोअ मालख्योअ जागे फाश्या जावा, 14 सर्वसेक्तिमान देव तिया माट्योहो दयालु कोए, जिया वाअहीं तो तुमाआ बिहीरा पायहोहो आन बिन्यामीनोह बी आवुहूं देये; आन जर आंय बिगर पोर्‍याअ ओवू ते ओवुहूं द्या."

15 ताहराअ योसेफोअ पाही ते भेट, डोबील्या पोशा, आन बिन्यामीनोह बी आरी लेदू, आन वाट लागा, आन मिसरोम पोतीत कोइत योसेफोअ सामने उबा रोया. 16 तियांआं आरी बिन्यामीनोह देखीत कोइत योसेफे तियाआ कोओअ आधिकारीही कोयो, "यां माअहुंहूं कोअमेहें लेत जा, आन कोर्‍येए जनवार माइत कोइत रोटू रांदा; काहाके एं माअहें हिराआपोअ माअरी रोटू खाये." 17 ताहरुउ तो आधिकारी योसेफोअ कोइलाआ पुरमाणे तियां माट्योहो योसेफोअ कोअमेहें लेत गोयु.

18 जाहां तियांहां योसेफोअ कोअमेहें पोताड्या ताहां ते तियां तियांआं बित कोइत कोना वोल्या, "जे पोशा पेल्लीइ फेरे वाली देदाते, तिहींज वाअहीं आपुहूं मायते लेत आयेहे; जियावाअहीं तो माटी आपापोअ गुनू लागाड़ीत कोइत आपुहूं गुलाम बोणावीत सेके, आन आपाअ गोदड़े बुउसीत लेये." 19 ताहराअ ते योसेफोअ कोओअ आधिकारीइ आहने जात कोइत कोओअ बाअणापोअ एहें कोइत कोना वोल्या, 20 "मालिख, जाहां आमू पेल्लीइ फेरे ओन वेसातो आना आयाते, 21 ताहराअ आमू वाटे मुक्कामोअ जागे पोतीत कोइत आमाआ पोता सोड़्या, ताहां की पाल्य के हरेक जोओंअ पुरा पोशा तियाआ पोतामेहें मिकल्या होये; तियाहा काजे आमू तियां पोशाहा फाश्या आरी लेत कोइत आयाहा, 22 खाअलोअ वस्तु लेअलाअ काजे बी आमू बिहीरा पोशा आरी लेताहा; आमुहूं ने मुंदू के आमाआ पोशा आमाआ पोतामेहें कोडे मिक्याते."

23 तिये कोयो, "फिकर मा कोअहा, बिहा मा! तुमाआं देव, जो तुमाआं आब्हाअ बी देव होय, तियेज तुमुहूं तुमाआं पोतामेहें पोशा आप्याये, तुमाआं पोशा माहूं जोड़ीत गोयाते." ताहां तिये शिमोनोहों काडीत कोइत तियांआं जागे लेत आयु.

24 ताहां तिये आधिकार्‍ये तियांहां योसेफोअ कोअमेहें लेत जात कोइत , तियांहां गुडा तुवे तेहें कोइत पाईं आप्यो, तियां गुडा तुव्या; आन तिये तियांआं गोदड़ाआ कोअते सारु आप्यू. 25 तियां योसेफोअ दिहेए वेले आवे तेहेलामेहें भेट तियार मिक्यी; काहाके तियां उनाअयोतो के ते तिहीं योसेफोअरी रोटू खानाराहा. 26 जेहेलाम योसेफ कोअ आयु ताहां ते तियांपोर्‍यीइ भेट लेत कोइत कोअमेहें तियाआ जागे गोया, ते टुंगा पोड़ीत कोइत तियाआ पागे पोड़्या. 27 योसेफ तियांआं हाजा बाक्ताआ बाप्तिमेहें फुश्यो, "तुमाआ तो आब्हू डोहू, जियाआ बाप्तिम तुमू कोताते, तो हाजू होय के? केहें तो ओमे जाआं जिवतु होय के?"

28 तियां कोयो, "होव, ताआ सेवक आमाआ आब्हू हाजू होय आन ओमे बी जिवतुज होय." ताहां तियां टुंगा पोड़ीत कोइत फाश्यो तियाआ पागे पोड़्या.

29 ताहरुउ योसेफे नजर टाकीत कोइत तियाआ खाजगी पाही बिन्यामीनोह देखीत कोइत फुश्यो, "केहें तुमाआ तो हानीइलु पाही ओज होय के, जियाअ बाप्तिम तुमू माआ आगाड़ी कोयोतो?" ताहरोअ तिये बिन्यामीनोह कोयो, "माआ सोआ, देव तापोअ मेरवानी कोए." 30 ताहरुउ तियाआ पायहोहो देखीत तियाआ डोआम रोज्ये आवीत गोया आन ओ विसार कोइते के आंय का जात रोड़ो, योसेफ मामार खोलीम जातु रोयू, आन तिहीं रोड़ू वोल्यू. 31 ताहरुउ तियाआ सोब तुवीत कोइत निहीयु, आन सोताहा ठावकुज ओत कोइत कोयो, "रोटू वाटु कोआ." 32 ताहरोअ तियां योसेफोअ ठाली आंगेज वाटु कोअयी, आन तियाआ पायहोंअ कोअते ठाली आंगेज वाटु कोअयी, आन जें मिसरवाले माअहें तियाअरी बोठेते तियांआं कोअते बी आंगेज रोटू वाटु कोअयू ; काहाके मिसरवालाहां इब्री माअहोंअरी बोहीत रोटू ने खाअलोअ गेतराय हासवाअतीते. 33 आन योसेफोअ पाही तियाआ सामने वयेए पुरमाणे पेल डाया पायहोहो तिहींइं फासाड़ी जेहेंज हाना तेहेंज कोइत बोहाड़ी देदा; ओं देखीत कोइत ते बोगलाइत कोइत एकानेकाअहें पाला वोल्या. 34 ताहरुउ योसेफ तियाआ सामने रोत खाअलोअ वस्तु विसी-विसीइ तियांआं जागे मोकलीइतुतो, आन बिन्यामीनोह तियाआ पायहोम रोत पास पोट वादार खाअलोअ वस्तु मिल्यी. एहें कोइत तियां योसेफोअरी लागेतो खादोन पिदो.