1 ताहरुउ याकोबे तियाआ वाटे लागू, आन उक्तामा वोल्याआ मुलखोम आयू. 2 तिये नजर टाकीत पाल्यो के एक वेए होय, आन तिहीं मेडे आन बोकड़े तिन गोवारा बोहीत रोयेहे; काहाके तियी वेईजमेहें रोत तियांहां पाईं पिवाड़तेते. वेईइ ओटापोअ एक वोडु डोण ओतू. 3 आन जाहां आखा गोवारा तिहीं टोलू वोले, ताहां सारवाली तिया डोणोहों वेईइ ओटापोअ रोत लुड़वीत कोइत मेडाहा आन बोकड़ाहा पाईं पिवाड़ी देत, सेलवाआ तिया डोणोहों वेईइ ओटापोअ जेहें कोइत ओतू तेहेंज कोइत मिकी देतेते.

4 ताहरुउ याकोब तियां सारवाल्योहों फुश्यो, "दोस्ता, तुमू कावाला होय?"

तियां कोयो, "आमू हारानवाला होय."

5 ताहां तिये तियांहां फुश्यो, "तुमू नाहोरोअ पोर्‍याआ पोर्‍या लाबानोहो ओलखीइताहा के?"

तियां कोयो, "होव, आमू तियाहा ओलखीइताहा ना."

6 फाशुउ याकोबे तियांहां फुश्यो, "तो हाजू होय के?"

तियां कोयो, "होव, तो हाजू होय आन फोली पाल, तियाआ पोर्‍यी राहेल मेडेन बोकड़े लेत आवेहे."

7 याकोबे कोयो, "ओमे ते दिही वारुज होय, मेडाहान बोकड़ाहा टोलू ओवीइलाअ वेल कायनाहां; तियाहा काजे मेडाहान बोकड़ाहां पाईं पिवाड़ीत कोइत फाश्याआ सारा लेत जावा."

8 तियां कोयो, "ओमेज आमू एहेलोहो नाहां कोइत सेकता; जाहां आखा मेडाआ गोवारा टोलू वोले, ताहां डोण वेईइ ओटापोअ रोत लुड़वीइताहा, आन ताहां जात आमू मेडाहा पाईं पिवाड़ताहा."

9 तो तियांअरी गोठी मेक्याज कोअतुतो तेताजमेहें राहेल तियीइ आब्हाआ मेडेन बोकड़े लेतीज आवीत लागी. 10 याकोबे तियाआ मामाह्हाआ पोर्‍यी राहेलोहो, आन तियीइ मेडाहा पाल्योन ताहरुउ वेईइ जागे जात कोइत तो ओटापोऱ्युउ डोण होरकावयू आन तियाआ मामाह्हा लाबानोअ मेडाहा आन बोकड़ाहा पाईं पिवाड़्यो. 11 ताहरुउ याकोबे राहेलोहो गुउं देदू, आन जाअखीलुहू रोड़्यू. 12 आन याकोबे राहेलोहो कोयो के, "आंय ताआ आब्हाआ रोत हानीइली बोअह्ही रिबीकाआ पोर्‍यू होंव." ताहरीइ राहेल गुगतीइतीज गोयीन तियीइ आब्हाहा कोत देदो. 13 तियाआ पांअजाह्हा याकोबोअ खोबर उनाअताज लाबान तियाहा मिलीइलाअ कोअते गुगद्यू, आन तियाहा सातीइरी लागाड़ीत कोइत गुउं देदू, ताहरुउ तियाहा कोओ लेत आयू. याकोबे लाबानोहो तियाआ आखी गोठी कोत आप्यी. 14 ताहरुउ लाबाने याकोबोहो कोयो, "तू ते हुदाअलीज माआ माहांन रक्त होय." आन याकोब मोयनु पोइत तियाअरी रोयू.

15 ताहरुउ लाबाने याकोबोहो कोयो, "कोर्‍युउ कोत ताहूं फुकट्यी सेवा कोआड़ीइलो माहूं बोराबर नाहां देखाअतो; तियाहा काजे आंय ताहूं सेवाआ बोदले की आपो तों को?" 16 लाबानोअ बेन बेटिह्ही ओती, जियींमेहें डायी बेटिह्हीइ नाव लिआ आन हानीइली बेटिह्हीइ नाव राहेल ओतो. 17 लिआआ ते सायरा डोआ ओता, पोन राहेल मुखलाती आन हाजी बी ओती.

18 तियाहा काजे याकोबे कोयो, "आंय ताआ हानीइली बेटिह्ही राहेलोअ कोअते हांत वोरह्ये ताआ सेवा कोअहीं." काहाके तो राहेलोपोअ मेर कोअतुतो.

19 लाबाने कोयो, "यीही पारका माट्योहो आपिइलो पेक्शा ताहूं आपल्ये हाजो होय; तियाहा काजे ओमे माआ जागे रो." 20 ताहरुउ याकोबे राहेलोअ कोअते हांत वोरह्ये सेवा कोअयी; आन एं हांत वोरह्ये तियाहा राहेलोअ मेरेवाअहीं थोड़ाज दिहोअ बोराबर हासवाअये.

21 ताहरुउ याकोबे मामाह्हा लाबानोहो कोयो, "माहूं ताआ पोर्‍यीइरी वेहेवाल कोइत आपेए मे, काहाके माआ मुदत पुरी ओत गोयीही." 22 ताहरुउ लाबाने तिहींइं आखा माअहुंहूं हादीत कोइत टोलू कोअये, आन एक वोडी पांगात खावाड़्यी. 23 हांजेए वेले तो तियाआ बेटिह्ही लिआहा याकोबोअ जागे लेत गोयु, आन याकोब तियीइ जागे गोयु. 24 लाबाने तियाआ बेटिह्ही लिआहा तियीइ साकरी कोए तेहें काजे जिल्पाहा आप्यी. 25 वेगीइ मुंदू गोयु के एते लिआ होय, तियाहा काजे तिये लाबानोहो कोयो, "ओं तुमे माअरी की कोअयो? आंय ताअरी रोत कोइत जे ताआ सेवा कोअयी, ते राहेलोअ कोअते ने कोअयीते के? ताहां तुमे माअरी एहेलिही लोबाड़ी काहा कोअयी?"

26 लाबाने कोयो, "आमाअहीं डायी बेटिह्ही रोत पेल हानीइली बेटिह्हीइ वेहेवाल कोइलोअ रित कायनाहां. 27 यीइ आठीवड़ू ते पुरु कोअ; ताहरीइ बिहीरी बी ताहूं जोड़े, पोन तियीइ काजे बी ताहूं हांत वोरह्ये जाआं माआ सेवा कोअहूं पोड़े."

28 याकोबे तेहेंज कोअयो; आन लिआआ आठीवड़ू पुरु कोअयू, तिहींइं फासाड़ी लाबाने तियाहा तियाआ बेटिह्ही राहेल बी लाडी एहें कोत आपी देदी. 29 लाबाने तियाआ पोर्‍यी राहेलोअ साकरी कोए तेहें काजे तिये बिल्हाहा आप्यी. 30 ताहरुउ याकोब राहेलेएरी बी गोयु, आन तियाआ मेर लिआप रोत वादार राहेलोपोअ ओती; आन तिये लाबानोअरी रोत कोइत हांत वोरह्ये फाशीइ सेवा कोअयी.

31 जाहां यहोवा देवे पाल्यो, के याकोब लिआप रोत वादार राहेलोपोअ मेर कोअहे; ताहां तिये लिआआ नाड़ी खुल्ली कोअयी, पोन राहेल वांज्यी रोयी. 32 ताहरीइ लिआ पोटाअरी ओवी आन तियीइ एक पोर्‍यू उबज्यु, आन तियी ओं कोत कोइत तियाआ नाव रूबेन* मिक्यो, "यहोवा देवे माआ दुख पाल्योहो, ओमे माआ माटी मापोअ मेर कोए." 33 फाशीइ ते पोटाअरी ओवी आन तियीइ एक पोर्‍युज उबज्यु; ताहां तियी एहें कोयो, "आंय नाहां गोमती ओं यहोवा देवे उनाइत लेदो, तियाहा काजे तिये माहूं ओमे बी सोऊज आप्यू." तियाहा काजे तियी तियाआ नाव शिमोन* मिक्यो. 34 फाशीइ ते पोटाअरी ओवी आन तियीइ एक सोऊ उबज्यु; आन तियी कोयो, "ओमे ते माहूं माआ माटी माअरी मिलीत रोय, काहाके तियाप रोत माहूं तिन सोआ जोड़्याहा." तियाहा काजे तियी तियाआ नाव लेवी* मिक्यो. 35 आन फाशीइ ते पोटाअरी ओवी आन तियीइ फाशुउ एक सोऊ उबज्यु; आन तियी कोयो, "ओमे ते आंय यहोवा देवोअ आभार मानिहीं;" तियाहा काजे तियी तियाआ नाव यहुदा* मिक्यो; ताहां तिहीं रोत तियीही पोऱ्ये ने जोड़े वोल्ये.