उत्पत्ती 19

सदोमोअ सोगदाय

1 हांजेपोअ ते बेन देवदूत सदोम गांवोंमेहें आया; आन लोट सदोमोअ गेटोअ आहने बोहीत रोयुतो. तियांहां देखीत कोइत तो तियांहां मिलीइलोअ काजे उठ्यू, आन टुंगू पोड़ीत कोइत वोंद्यो, 2 आन कोयो, "माआ मालिख, तुमाआ सेवकोअ कोअमेहें आवा, आन रात पोइत आराम कोआ, गुडा तुवीत ल्या, फाश्याआ वेगीइ उठीत कोइत तुमू वाट लागजा." तियां कोयो, "नाहां, आमू गेटोअहींज रात काडुहूं."

3 पोन तिये तियांहां जाअखीलीही रावणी कोइत तियांहां मानाड़्या; तिहीं वाअहीं ते तियाअरी तियाआ कोअमेहें आया; आन तिये तियांआं काजे रोटू तियार कोअयू, आन बिगर खमीरोअ रोटू बोणावीत कोइत तियांहां खावाड़्यू.

4 तियांआं हुवो लोटीइलोअ पेल, सदोम होयरोमेर्‍याआ, जुवान आन डाया ते आखा माटी, शारु सोमकीर आवीत कोइत तिया कोओहो केंडीत लेदो; 5 आन लोटोहो आअड़ीत कोइत कोना वोल्या, "आज राती जे माटी ताआ जागे आयाहा ते का गोया? आमाआ तियांअरी हुवीइलो होय तियाहा काजे तियांहां आमाआ जागे बारथे लेताव."

6 ताहरुउ लोट तियांआं जागे बारथे गोयु, आन बारथीइ वोगेहे रोत बाआ बोंद कोई देदो, 7 आन तिये तियांहां कोयो, "आंय तुमाआ आगाड़ी आथ जोड़ोहो, पायहों, एहेलोहो मा कोअहा. 8 उनाआ, माआ बेन बेटीह्ही जुवानुज होय; इश्शा ओय ताहां आंय तियींहीं तुमाआ जागे बारथे लेतावोहो, आन तियींइरी तुमुहूं पोटे तो वेवारो कोआ; पोन यां माट्योअरी किज मा कोअहा; काहाके ए माअहीं पावणा आयाहा."✝19:8 न्यायीं 19:22-24

9 ताहराआ तियां कोयो, "सेटे होरक! तु एक पारकू ओत कोइत इंहीं जिवण्यु आयुहू, आन ओमे इंहीं पुडारी बोणीत गोयुहू; तियाहा काजे ओमे तियांप रोत पेल आमू ताआज विताड़हूं," एहें कोत कोइत ते लोटोहो गोसाटा वोल्या, आन बाअणो फोड़ीइलोअ कोअते आहने आये. 10 ताहां तियां पावणा आथ टाकीत कोइत लोटोहो तियांआं जागे कोअमेहें ओसकीत लेदू, आन बाअणो बोंद कोइत लेदो. 11 आन जे बाअपुरे ओता तियां आखा हाना-वोडा माट्योहो आंद्ला कोई देदा,✝19:11 2 राजां 6:18 आन ते माटी बाओहो सापली-सापलीइ थाकीत गोया.

सदोमोम रोत लोटोअ निहीइलो

12 फाश्याआ तियां पावणा लोटोहो फुश्यो, "इंहीं ताआ फाश्योअ एखु कोऱ्योअ होय जी के? जोवाह्हां, पोर्‍या, पोर्‍यी आन होयरोमेहें ताआ जो कोडो ओय, तियां आखाहा लेत कोइत इंहीं रोत निहीत जातु रो. 13 काहाके याआ खाराब कामे यहोवा देवोअ सामने वादीत गोयेहे तियाहा काजे आमू ओ जागू आरवीइनारा होय; आन यहोवा देवे आमुहूं या होयरोहो आरवीइलोअ काजे मोकल्याहा."

14 ताहरुउ लोट निहीत कोइत जियांअरी तियाआ पोर्‍यीइ पात पिदोतो, तियां जोवांह्हांहां समजाड़ीत कोयो, "यहोवा देव या होयरोहो आरवीइनारु होय, तुमू उठा, आन या इंहीं रोत निहीत कोइत साला." पोन लोट ओंहताय कोअहे एहलोहो तियांहां लागो.

15 वेगीइ हुजो वोल्यो तेहेलाम देवदूतहों लोटोहो उतवाल निहे तेहें कोयो, "उठ, जे इंहीं होय यी ताआ लाडीही आन बेनू पोर्‍यीही लेत जा; नेते तु बी या होयरोअ पापोम आरवात जाही."

16 पोन तो वाआ लागाड़तू रोयू तिहीं वाअहीं तियां माट्यो तियाआ आन तियाआ लाडीइ, आन बेनू पोर्‍यीइ आथ तोइत ओडीत तिया होयरोअ बारथे कोई देदे, काहाके यहोवा देवोअ दया तियापोअ ओती. 17 आन एहेलोहो ओवो के जेहेलाम ते तियांहां बारथे काड्ये, ताहां कोयो, "तुमू मुठीम जिव तोइत गुगदे वोला; फासाड़ी जाआं वोलीत मा पालहा, आन एखी बारीम बी मा उबे रोहा; पोन होल्लेज फोला डोगोपोअ जाते रोजा, नेते तुमू बी आरवात जाहा."

18 लोटे तियांहां कोयो, "प्रभु, एहेलोहो मा कोअही! 19 पाल, ताआ सेवकोपोअ ताआ मेरवानी होय, आन तुमे माआ जिवोहो वासाड़्यू ए ताआ जास्ती वोडी मेरवानी ओवी; पोन या डोगोपोअ माहूं पोताय, आन मापोअ काविंहीं पुनीवती आवीत पोड़े, आन आंय मोइत जाहीं, एहेलोहो ने ओवुहूं जोवे. 20 पाल, फोलो ओं होयर आहने होय, आंय तिहीं पोतीत सेकोहो, आन तों हानो बी होय. आंय तिहीं जातु रोहीं ताहां वासात जाहीं."

21 तिये तियाहा कोयो, "देख, आंय यी बाप्तिमेहें बी ताआ रावणी मानोहो, आन जिया होयरोअ गोठी तु कोअहे तियाहा आंय ने आरवो. 22 उतवाल कोइत तिहीं जातु रो; काहाके जाअहूं जाआं तु तिहीं ने पोतही, ताअहूं जाआं माहूं किज ने कोअता आवे सेकत्लू." तिहींज वाअहीं तिया होयरोअ नाव सोअर*19:22 मोन्ज्ये, हानो पोड़्यो.

सदोम आन गोमोराआ आरवीइलो

23 लोटोहो सोअर गांवोम पोत्ताज वाआ दिही उगीत गोयु. 24 ताहरुउ यहोवा देव सदोम आन गोमोरापोअ जुगोम रोत दारो आन आग पाड़्यी; 25 आन तियां होयरोहो आन तिया आखा खासाड़ोहो, आन गांवोंमेर्‍याआ आखा रोनाराहा, खेतोमेऱ्यीइ पुरी कामाय आरवी देदी.✝19:25 मत्तय 10:15; 11:23,24; लुक 10:12; 17:29; 2 पेत्र 2:6; योहान 7 26 पोन लोटोअ लाडी आखाआ फाटी ओती, तियी फासाड़ी फिरीत पाल्यो, आन पालताज वाआ ते खाराआ खांब बोणीत गोयी.✝19:26 लुक 17:32

27 अब्राहाम वेगऱ्युउ उठीत कोइत जिहीं तो यहोवा देवोअ सामने उबू ओतू तियी जागे गोयु; 28 आन सदोम, गोमोरा, आन तिया खासाड़ोअ पुरा देसोअहें नजर टाक्यी ताहां तिया देसोम रोत दुड़ुदुड़ू पेटाअत्ली बाठीइ होस तुमाणू निहीत्लू देखाअयू.

29 आन एहें कोइत लोट रोत्लू तिया खासड़ोअ होयरोहो देवे एड़फेड़ कोइत आरवी देदो, ताहां तिये अब्राहामोहो ओर कोइत लोटोहो तियी घटनाम रोत वासाड़ीत लेदू.

मोवाब आन आम्मोनवालाआ सुरुवात

30 फाशुउ लोट सोअर गांवोंहों सोड़ी देदो, आन डोगोपोअ तियाआ बेनू पोर्‍यीइरी रोनु वोल्यू; काहाके तो सोअरोमेहें रोअलाआ बितुतो; तियाहा काजे तो आन तियाआ बेनू पोर्‍यी तिहीं एका दोरामेहें रोने वोल्ये. 31 ताहरीइ डायी पोर्‍यी हानीइलीही कोयो, "आपाआ आब्हू डायु होय, आन दुन्यामेहें कोड्लूज एहेलुहू माटी कायनाहां जो आपाअरी आवे आन पोर्‍ये कोए. 32 तियाहा काजे साल, आपू आपाआ आब्हाहा दाराक्शाआ रोहो पिवाड़ीत कोइत तियाअरी हुवहूं, ताहां आपू आपाआ आब्हाआ पारवाड़ीही वासाड़ीत मिकहूं." 33 तियीं तेदिहींज रातीइ वेले तियींइं आब्हाहा दाराक्शाआ रोहो पिवाड़्यु, ताहरीइ डायी पोर्‍यी जात कोइत तियीइ आब्हाआ जागे लोटीत गोयी; पोन तियाहा ते केती वेले लोटीन केती वेले उठ्यी तो मुंदून्ने गोयु.

34 बिहीरे दिही डायी पोर्‍यी हानीइलीही कोयो, "पाल, काल राती आंय आब्हाअरी हुतली; तियाहा काजे आज बी राती आपू तियाहा दाराक्शाआ रोहो पिवाड़हूंन ताहरीइ तु जात कोइत तियाअरी हुवजी, काहाके आपू एहेलोहो कोअहूं ताहां आपाआ आब्हा वाअहीं पारवाड़ उबजाड़हूं." 35 फाशीइ ते तेदिहीं बी रातीइ वेले आब्हाहा दाराक्शाआ रोहो पिवाड़्यु, आन हानीइली पोर्‍यी जात कोइत तियाअरी लोटीत गोयी, पोन तियाहा तियीइ बी हुवीइलान उठीइलाअ मुंदून्ने गोयु. 36 एहें कोइत लोटोअ बेनू पोर्‍यी तियींइं आब्हा वाअहीं पोटाअरी ओवी. 37 डायी पोऱ्यीइ पोर्‍यू उबज्यु, आन तियाआ नाव मोवाब*19:37 मोवाब मोन्ज्ये, माआ आब्हाआ मिक्यो, तो मोवाब नावोअ जातीइ वोडुआब्हू बोण्यु जे आज बी होय. 38 आन हानीइलीइ बी एक पोर्‍यू उबज्यु, आन तियाआ नाव बेनम्मी*19:38 बेनम्मी माआ कोऱ्याआ पोऱ्यु मिक्यो; तो आम्मोन पारवाड़ीइ वोडुआब्हू बोण्यु जे आज बी होय.