1 यीं गोठीइ फासाड़ी एहेलोहो ओवो के देवे अब्राहामोअ एहें कोत कोइत पारजाणो लेदो, "अब्राहाम!" तिये कोयो, "ओय, आंय इंहीं होंव*?"

2 देवे कोयो, "ताआ पोर्‍याहा, मोन्ज्ये तु मेर कोअहे तिया एकाआ एकुज पोर्‍या इसाहाकोहो आरी लेत कोइत मोरीया✝ देसोम जा; आन आंय ताहूं कोहीं तिया डोगोपोअ आगीम गाराहा कोअ."

3 ताहरुउ अब्राहाम वेगर्‍युउ सिंजीवड़ाअरीही उठ्यू आन तियाआ गोदड़ापोअ जीण बांद्यी आन तियाआ बेन सेवक, आन तियाआ पोर्‍यू इसाहाकोहो आरी लेदू, आन आगीइ गाराहा कोअते लाकड़े फोड़ीत लेदे; ताहरुउ निहीत कोइत जिया जागाआ सर्सा देवे तियाअरी कोअयीते तो तियाअहें जानु वोल्यू. 4 तिसरे दिही अब्राहामे नजर टाकीत कोइत तिया जागाहा सेटेज रोत पाल्यो; 5 आन अब्राहाम तियाआ सेवकोहों कोयो, "गोदड़ाअरी इहींज उबा रोजा; ओ पोर्‍यू आन आंय तिहीं जाआं जाताहा, आन आराधना कोइत, ताहराआ तुमाआ जागे वोलीत आवुहूं."

6 ताहरुउ अब्राहामे आगीइ गाराहाआ काजे लाकड़े तियाआ पोर्‍या इसाहाकोहो सोड़वी देदे, आन आगेन सुरू तिये आथोम लेदू; आन ते बेनू वाट लागीत पोड़्या. 7 इसाहाके तियाआ आब्हा अब्राहामोहों कोयो, "बा,"

तिये कोयो, "काहा माआ सोआ?"

इसाहाके कोयो, "पाल, आगेन लाकड़े ते होय; पोन आगीम गाराहा आपीइलोअ कोअते मेडो खोतो?"

8 अब्राहामे कोयो, "माआं सोआ, देवुज सोताहा गाराहा कोइलोअ काजे बोराबर मेडो होदीत आपे." आन ते बेनू आरी आरी आगाड़ी गोया.

9 जाहां ते देवे कोयो तियी जागे पोत्या; ताहां अब्राहामे तिहीं देवान्यो बोणावीत कोइत लाकड़े हेशे, आन तियाआ पोर्‍या इसाहाकोहो बांदीत कोइत देवान्यापोर्‍याआ लाकड़ापोअ मिकी देदू.✝ 10 ताहरुउ अब्राहामे तियाआ पोर्‍याआ गाराहा ओवुहूं जोवे कोत आथम सुरू लेत कोइत उमाअयू. 11 तेहेलाम यहोवा देवोअ देवदूते तियाहा आअड़ीत कोइत कोयो, "अब्राहाम, अब्राहाम!" तिये कोयो, "ओय, आंय इंहीं होंव."*

12 देवदूते कोयो, "या पोर्‍यापोअ आथ मा टाकही, आन तियाहा मा की कोअही; काहाके तुमे माआ काजे ताआ पोर्‍याहा, ताआ एखला एका पोर्‍याहा बी ने मिकीत रोयू; इंहीं वाअहीं माहूं ओमे जाआंत गोयोहो के तु देवोअ बित सालेहे."

13 अब्राहामे नजर टाकीत फासाड़ीइ वोल पाल्यो, ताहां एक मेडो तियाआ हिंगे वोणसाम आलाइत रोल्यो देखाअयो; ताहरुउ अब्राहाम जात कोइत तियाहा काड्यो, आन तियाआ पोर्‍याआ जागापोअ तिया मेडाहा आगीम गाराहा कोत आप्यो.✝ 14 अब्राहामे तिया जागाआ नाव "यहोवा यिरे"* मिक्यो. तिहींज वाअहीं आज बी माहें कोतेहे के "यहोवाआ डोगोपोअ तो पुरवे."

15 फाशुउ यहोवाआ देवदूते दुसरीवारी होरगाम रोत अब्राहामोहो हाद कोइत कोयो, 16 "यहोवा एहें कोहे, आंय माआंज ए शप्पत खाहो के तुमे जों ओं काम कोअयोहो के ताआ पोर्‍यू, ताआ एखलु एक पोर्‍यू बी ने मिक्यू; 17 तिहीं वाअहीं आंय नक्की ताहूं आशिर्वाद आपीहीं; आन नक्की ताआ पारवाड़ीही जुगोमेर्‍याआ ताराआ एतीही आन दोर्‍याआ मेरेपोर्‍याआ रेटाआ होस ने गोणाय एतीही कोई देहीं,✝ आन ताआ पारवाड़ तियांआं दुस्मोनोअ गांवोअ आधिकारी बोणे;✝ 18 आन धरतीइ आखा देसोअ माअहुंहूं ताआ पारवाड़ी वाअहीं आशिर्वाद जोड़े;✝ काहाके तुमे माआ गोठ मानित लेदीही." 19 ताहरुउ अब्राहाम तियाआ सेवकोअ जागे वोलीत आयू, आन ते आखा बेर्शेबा जाआं आरी-आरी गोया; आन अब्राहाम बेर्शेबामेहें रोनु वोल्यू.

20 ए गोठी ओवी तिहींइं कोडे तेबी अब्राहामोहो कोयो, "मिल्काहा ताआ पाही नाहोरपरोत पोर्‍ये उबज्येहे." 21 मिल्काआ आँठ पोर्‍या ओवा ते होय: तियीइ डायु पोर्‍यू ऊस, आन ऊसोअ पाही बूस, आन कमूएल, जो अरामोअ आब्हू बोण्यु, 22 फाश्याआ केसेद, हजो, पिल्दाश, यिद्लाप, आन बतूएल ओवा. 23 ए आँठू मिल्काआ पोऱ्या अब्राहामोअ पाही नाहोरपरोत उबज्या आन बतूएलपरोत रिबीका उबज्यी. 24 फाशीइ नाहोरोअ रेउमा नावोअ एक उप-लाडी बी ओती; जियीप रोत तेबह, गाहाम, तहश, आन माका ए उबज्या.