1 जाहां आदाम तियाआ लाडी हव्वाअरी हुतू, ताहां ते पोटाअरी ओत कोइत काइनोहो जल्म आप्यो आन कोयो, "यहोवा देवोअ मदते वाअहीं माहूं एक सोऊ जोड़्युहू." 2 फाशीइ तियी तियाआ पाही हाबेलोहो बी जल्म आप्यो. हाबेल मेडान बोकड़ाआ सारवाली बोण्यु, पोन काइन धरतीपोअ खेते कोअनारु बोण्यु. 3 थोड़ाक दिहोअ फासाड़ी काइन यहोवाआ जागे खेतोमेर्‍यीइ कामायीम रोत थोड़ीक देवोहो भेट आपीइलोअ काजे लेत आयू. 4 आन हाबेल बी तियाआ मेडाआ एक पेल्ली वेतेए बासो गाराहा आपीइलोअ काजे लेत आयू, आन तियाआ सरबी गाराहा कोअयी; ताहां यहोवा हाबेल आन तियाआ भेट ते स्विकार ओवी,✝ 5 पोन काइन आन तियाआ भेट तिये स्विकार ने कोअयी. ताहां काइनोहों जुदी खोत लागी, आन तो जास्ती नाराज ओवू. 6 ताहां यहोवा देव काइनोहो कोयो, "ताहूं काहा खोत लागी? आन ताआ सोबी पोअ नाराजी काहा होय? 7 जर तू हाजो कोए, ताहां केहें ताआ भेट स्विकार ने ओवे के? आन जर तू हाजो ने कोए, ताहां पाप बाओपोअ निकाइत रोहे; आन तियाआ लालस ताआज वोल रोय, आन ताहूं तियापोअ राज सालाड़ीइलो होय."

8 ताहरुउ काइन तियाआ पाही हाबेलोहो किवानीइ तेबी कोयो;* आन जाहां ते खेतोमेहें ओता, ताहां काइने तियाआ पाही हाबेलोहो देत कोइत तियाहा माइत टाक्यू;✝

9 ताहां यहोवा देवे काइनोहो फुश्यो, "ताआ पाही हाबेल का होय?" तिये कोयो, "ने मुंदू; केहें आंय माआ पायहोअ राखवाल्यू होय के?"

10 तिये कोयो, "तुमे की कोअयो? ताआ पायहोअ रक्त धरतीप रोत माअहें आअड़ीत कोइत माहूं हाद कोअहे!✝ 11 तियाहा काजे ओमे धरती जियी ताआ पायहोअ रक्त ताआ आथोवाअहीं पीइलाअ कोअते तियीइ सोब उगाड़्यीही तियीइहें रोत तू हारापीत होय. 12 तू धरतीपोअ पुरी सेक्ती वाअहीं खेती कोअही, तेबी तियीइ पुरी कामाय ताहूं ने मिले*; आन तू धरतीपोअ भटकीइनारु आन ऊगार रोही."

13 काइने यहोवाहा कोयो, "ओ माआ डोंड माहूं ने वेठाय एतुहू होय. 14 पाल, तुमे आजेए दिहे माहूं पुंयींपोअ रोत काड्युहू, आन आंय ताआ नजरेए आडोल रोहीं, आन धरतीपोअ भटकीइनारु आन ऊगार रोहीं; आन जो कोडो बी माहूं देखे, तो माहूं माइत टाके."

15 यहोवा देवे तियाहा कोयो, "जो कोडो काइनोहो माए तियापोअ हांत गुना बोदलू लेवाय." आन यहोवा काइनोअ काजे एक निशाणी ठरव्यी एहेलोहो ने ओवुहूं जोवे के एखु तियाहा सापड़ावीत माइत टाके. 16 ताहरुउ काइन यहोवाअ हुंबर रोत निहीत गोयु, आन नोद* नावोअ देसोम जो एदेनोअ उक्तामाअहें होय, रोनु वोल्यू.

17 जाहां काइन तियाआ लाडीइ आरी गोयु ताहां ते पोटाअरी ओवी, आन तियी हानोकोहो जल्म आप्यो; काइने एक होयर बोहाड़्यो आन तिया गांवोअ नाव तियाआ पोर्‍याआ नावसे हनोक मेक्यो.* 18 हानोकोप रोत ईराद उबज्यु, आन ईरादोप रोत महूयाएल उबज्यु, आन महूयाएलोप रोत मतूशाएल, आन मतूशाएलोप रोत लेमेक उबज्यु. 19 लेमेके बेन बोईंइरी वेहेवाल कोअयो: जियींमेहें एकीइ नाव आदा, आन दुसरीइ सिल्ला ओतो. 20 आदा याबालोहो जल्म आप्यो. तो तोंबाम रोअलो आन डोगरे पालीइलो यीं बेनू रितीइ वेगुउ डायु बोण्यु. 21 आन तियाआ पायहोअ नाव यूबाल ओतो: तो विणा आन पावी वाजाड़नाराआ वेगुउ डायु ओवू. 22 आन सिल्ला बी तूबल-काइन नावोअ एका पोर्‍याअ जल्म आप्यो: तो इसत्लेए आन लोखींडाआ आखे तारेवाले आथ्यार कोड़नारु बोण्यु. तूबल-काइनोअ बोअह्हीं नामा ओती.

23 आन लेमेके तियाआ लाड्यीहीं कोयो,

"ए आदा आन सिल्ला, माआ उनाआ; ए लेमेकोअ लाड्यीहीं, माआ गोठीपोअ कान लागाड़ा:

आंय एका माट्योहो जो माहूं जखम देतुतो, मोन्ज्ये एका जुवानोहों जो माहूं दुखाड़तुतो, माइत टाक्युहू.

24 जाहां काइनोअ बोदलू हांत पोट लेवाय,

ताहां लेमेकोअ सात्यात्तर पोट लेवाय.✝"

25 आदाम तियाआ लाडीइरी फाशुउ गोयु, आन तियी एका पोर्‍याहा जल्म आप्यो आन तियाआ नाव ओं कोत कोइत सेत मिक्यो के, "देवे माआ काजे हाबेलोअ बोदले जियाहा काइने माइत टाक्यु, एक फाशुउ बिहीरु पोर्‍यू आप्युहू." 26 सेतोअ बी एक पोर्‍यू उबज्यु, आन तिये तियाआ नाव एनोश मिक्यो; तेहलाजमेहें रोत माअहें यहोवाअ नावोवाअहीं आराधना कोए वोल्ये.