उत्पत्ती 47

1 ताहरुउ योसेफ फारोअ जागे जात कोइत ए खबर कोयी, "माआ आब्हू आन माआ पाही, आन तियांआं मेडे, डोगरेन बोकड़े आन जो किबी तियांआं होये, आक्खो लेत कोइत कनान देसोम रोत आयाहा; आन ओमे ते गोशेन मुलखोमेहें होये." 2 योसेफे तियाआ पायहोम रोत पास जोअहों लेत कोइत फारोअ सामने उबा राख्या. 3 फारो तियाआ पायहोहों फुश्यो, "तुमाआ काम धंदू की होये?" तियां फारोहो कोयो, "ताआ पावर सारवाली होय, आन आमाआ वेगाअ डायहां बी सारवालीज ओता." 4 तियां फारोहो कोयो, "आमू या देसोमेहें पारकाआ होस जिवण्या आयाहा; काहाके कनान देसोमेहें वोडु काल पोड़्यू तिहीं वाअहीं ताआ पावरोअ मेडान बोकड़ाआ काजे सारु नाहां रोयू; तियाहा काजे ताआ पावरोहो गोशेन मुलखोमेहें रोअलोअ आदेश आपेए." 5 ताहां फारो योसेफोहो कोयो, "ताआ आब्हू आन ताआ पाही ताआ जागे आया, 6 आन पुरो मिसर देस ताआ सामने होय; या देसोअ जो आखाम रोत हाजू भाग ओय, तिहींमेहें ताआ आब्हाहा आन ताआ पायहोहो बोहाड़ी दे, मोन्ज्ये ते गोशेन मुलखोमेहेंज रोये; आन जर ताहूं मुंदू ओय, के तियांमेहें मेहेंनतवालू माटी ओय, ताहां तियाहा माआ वासड़ान बोकड़ाआ आधिकारी ठरवी दे."

7 ताहरुउ योसेफ तियाआ आब्हाहा लेत कोइत फारोअ सामने आयू; आन याकोब फारोहो आशिर्वाद आप्यू 8 ताहरुउ फारो याकोबोहो फुश्यो, "ताआ वय केतिही ओयीही?"

9 याकोबे फारोहो कोयो, "आंय एक होवेन तीस वोरह्ये पारकुज ओत कोइत जिवन जिवीत सुकुहू; माआ जिवनोअ दिही थोड़ा आन ते खाराब रोया. आन माआ वेगाआ डायहां पारका ओत कोइत जेताहा दिही जिवया, तेताहा दिही माहूं ओमे नाहां ओवा." 10 आन याकोब फारोहो आशिर्वाद आपीत कोइत तियाआ सामने रोत जातु रोयू. 11 ताहरुउ योसेफ तियाआ आब्हाहा आन पायहोहों बोहाड़ी देदा, आन फारोअ आदेशोअ पुरमाणे मिसर देसोअ हाजा हाजा भागोमेहें, मोन्ज्ये रामसेस नावोअ मुलखोम जागु पालीत कोइत तियांहां होपी देदू. 12 आन योसेफ तियाआ आब्हाआ आन तियाआ पायहोंअ , आन आब्हाआ पुरा कुटूंबाआ एकेकाआ बाल-बासाआ गणतीइ पुरमाणे दाणा आपी आपीइ तियांहां पोहू वोल्यू.

काल

13 तिया पुरा देसोमेहें खाअलोअ किज ने रोयो; काहाके जुदू वोडु काल पोड़्युतो, आन कालोवाअहीं मिसर देस आन कनान देस बेनू जुदे फोग्जीत गोये. 14 आन जेता पोशा मिसर आन कनान देसोम ओता, आखाहा योसेफ तियाआ ओनोअ बोदले, जो तियां देसोम रोनारे वेसातो लेतेते, टोलू वालीत कोइत फारोअ कोअमेहें पोताड़ी देदा. 15 जाहां मिसर देसोअ आन कनान देसोअ पोशा सेलाइत गोया. ताहां आखे मिसरी माहें योसेफोअ जागे आवीत कोइत कोने वोल्ये, "आमुहूं खाअलोअ दाणा आपे; तू होय ताअहूं आमू काहा मोओ? आमाआ पोशा सेलाइत गोयाहा."

16 योसेफे कोयो, "जर पोशा ने ओय, ताहां तुमाआ वासड़ेन बोकड़े आपा, आन तियांआं बोदले आंय तुमुहूं खाअहूं आपीहीं." 17 ताहरेए ते तियाआ वासड़ेन बोकड़े योसेफोअ जागे लेत आये; आन योसेफ तियांहां कोड़ाआ, मेडा, डोगरान बोकड़ाआ, आन गोदड़ाआ बोदले दाणा आपू वोल्यू: तिया वोरह्योम तो आखी जाती जनवारोअ बोदले दाणा आपीत कोइत पोहतू रोयू.

18 तो वोरीही वितीत गोयो; माहें बिहीरे वोरह्योम योसेफोअ जागे फाश्ये आवये, आन कोयो, "आमू आमाआ मालख्योप रोत ए गोठ नाहां निकाड़ते के आमाआं पोशा सेलाइत गोयाहा, आन आमाआं वासड़ेन बोकड़े बी मालिखोअज ओत गोये. तियाहा काजे ओमे मालिखोअ सामने आमाआं डील आन जागु सोड़ीत बिहीरो किज नाहां रोयो. 19 आमू ताआ देखताइज काहा मोओ, आन आमाआ जागु काहा उजड़ीत जाये? आमुहूं आन आमाआ जागाहा दाणाअ बोदले वेसाते लेत्ले, के आमू आमाआ जागाअरीज फारोअ गुलाम ओत जांव: आमुहूं दाणा आपे के आमू ने मोओ, पोन जिवते रोहूं, आन जागा ने उजड़े."*47:19 मोन्ज्ये, आमू आन जागू काहा सेलाअहूं जोवे.

20 ताहां योसेफे मिसर देसोअ पुरा जागाहा फारोअ कोअते वेसातु लेत लेदू; काहाके तिया वोडा काल पोड़ीइला वाअहीं मिसरीही जिवज्यो जिवज्योअ खेते वेसुहूं पोड़्ये. एहें कोइत पुरु जागु फारोअ ओत गोयु; 21 योसेफ मिसर देसोअ एकी हिवेंएहीं रोत ते बिहीरे हिवेंएं जागे जाआं माअहुंहूं उठाडीत कोइत होयरो मेहें बोहाड़ी देदे. 22 पोन तिये पुंजाराआ खेते वेसाते नाहां लेदे; काहाके फारोअहें रोत पुंजाराहां दाड़ख्याआ दाणा जोड़ताते. आन दाड़ख्याआ जे दाणा फारो तियांहां आपतुतो तेज ते खातेते, तिहींज वाअहीं तियांहां तियांआं जागु ने वेसुहूं पोड़्यु. 23 ताहरुउ योसेफ माअहुंहूं कोयो, "पाला, आज आंय तुमुहूं आन तुमाआ जागाहा फारोअ कोअते वेसाते लेदेहे; आन ए दाणा तुमाआ काजे होय तुमू खेतोमेहें ओआ. 24 आन जो किबी पाके तियाआ पासवू इसु फारोहो आपजा, बाकी शार इसा तुमाआ रोये, तुमू तियाहा तुमाआ खेतोम ओआ, आन जिवज्यो जिवज्योअ बाल-बासाआ आन कुटूंबामेर्‍याआ माअहुंउं आरी खाया कोआ." 25 तियां कोयो, "तुमे आमुहूं वासाड़ीत लेदेहे; जर आमाआ मालख्योअ मेरवानीइं नजर आमापोअ रोये, ताहां आमू फारोअ गुलाम बोणीत रोहूं." 26 एहें कोइत योसेफे मिसर देसोअ खेतोअ बाप्तिमेहें एहेलाहा कायदा ठरव्या, जे आज जाआं सालू होय, के पासवू इसु फारोहो मिल्या कोए; आन निस्ते पुंजाराआज खेते फारोअ नाहां ओवे.

याकोबोअ आखरीइ इश्शा

27 इस्राएल मिसर देसोअ गोशेन मुलखोमेहें रोने वोल्ये; आन तिहींइं जागु तियाआ ताबाम ओतू; आन ते फुल्येन फोल्ये आन जाअखीलेहे वादीत गोये. 28 मिसर देसोम याकोब होत्तर वोरह्ये जिवतू रोयू: एहें कोइत तियाआ पुरी वय एक होवेन सात्तेशाड़ीस वोरह्ये ओवी. 29 जाहां याकोबोअ मोइलाअ दिही आहने आवयू, ताहां तिये तियाआ पोर्‍या योसेफोहो हादी कोइत कोयो, "जर ताआ मेरवानी मापोअ ओय, ताहां ताआ आथ जांगेए निसे मिकीत कोइत शप्पत खा के तू माअरी मेरे वाअहीं आन खोरायी वाअहीं ओं वेवारो कोअही. माहूं मिसर देसोमेहें मा डाटीही. 30 जाहां आंय माआ मोल्या वेगाअ डायाअरी हुवीत जाहीं, ताहां तू माहूं मिसर देसोम रोत लेत जात कोइत तियांआंज माहणोमेहें डाटजी."

ताहां योसेफे कोयो, "आंय ताआ वसनोअ पुरमाणे कोअहीं."

31 याकोब कोयो, "माअरी शप्पत खा." ताहां योसेफ शप्पत खादी. याकोब खाट्लाआ मुंडोअ वोल मुन्को ओंणावीत कोइत प्रार्थना कोअयी.✝47:31 उत्प 49:29-32; 50:6