1 ताहरुउ योसेफ तियां आखाअ जागे जे तियाआ आहने उबा रोत रोयाते, सोताहा रुकीत नाहां सेकू; आन आअड़ीत कोइत कोयो, "माआ जागर्‍याअ आखा माअहुंहूं बारथे काडी द्या." पायहोंअ सामने सोताआ बाप्तिम कोइलाआ वेले योसेफोअ आरी बिहीरो कोडोज ने रोयो.✝ 2 ताहां तो आअडी आअडीइ रोड़ू वोल्यू; मिसरी माअहें तियाआ रोडीइलाअ आवाज उनाअये, आन फारो राजाअ कोअ बी याअ खबर पोती. 3 ताहरुउ योसेफ तियाआ पायहोंहों कोनु वोल्यू, "आंय योसेफ होये, माआ आब्हू ओमे जाआं जिवतुज होय के?" याअ उत्तर तियाआ पाही नाहां आपीत सेक्या; काहाके ते तियाआ सामने बित गोयाते. 4 योसेफ तियाआ पायहोंहों कोयो, "माआ आहने आवा." ते आहने गोया. फाश्यो तिये कोयो, "आंय योसेफ होये, जियाहा तुमू मिसर देसोम आवनाराहा वेसी देदुतो. 5 ओमे तुमू फास्ताअहा मा; आन तुमू जो माहूं वेसी देदू, यावाअहीं नाराज मा ओवहा; काहाके देवे तुमाआ जिव वासाड़ीइलोअ काजे माहूं तुमाआ आगाड़ी मोकल्युहू. 6 काहाके ओमे बेन वोरह्ये ओत गोये या देसोमेहें काल होये; आन पास वोरह्ये फाशुउ एहेलुहूज काल रोये के तेहलामेहें ने ओले साले आन ने ओन वाडे. 7 तियाहा काजे देवे माहूं तुमाआ आगाड़ी याआज कोअते मोकल्यू के तुमू धरतीपोअ जिवते रोअहूं जोवे, आन तुमाआ जिव वासाइला वाअहीं तुमाआ पारवाड़ी वादे. 8 तियाहा काजे तुमू नाहां पोन देवुज माहूं इंहीं मोकल्युहू; तियेज माहूं फारोअ आब्हाआ होस आन तियाआ पुरा कोओअ मालिख आन पुरा मिसर देसोअ आधिकारी ठरवी देदुहू.

9 "ताहराआ मामार माआ आब्हाआ जागे जात कोइत कोवा, ‘ताआ पोर्‍यू योसेफ एहें कोहे के देवे माहूं पुरा मिसर देसोअ मालिख बोणावी देदुहू; तियाहा काजे तू वाआ मा लागाड़ही, पोन माआ जागे मामार आव. 10 ताआ रोअलाआ गोशेन मुलखोम रोय, तू आन ताआ पोर्‍या, पोर्‍याआ पोर्‍ये, मेडे, डोगरेन-बोकड़े, ताआ आक्खू वस्तु माआ जागेज रोये. 11 आन कालोअ जे पास वोरह्ये फाश्येए रोनारेहे, तियांमेहें आंय तिहींज ताहूं पोहीहीं; एहेलोहो ने ओवुहूं जोवे के तू आन ताआ कुटूंबो आन ताअरी जेते माअहें होये, तें फुकल्येज मोइत जाय.’"✝

12 "आन तुमू तुमाआ डोआवाअहीं पालताहा आन माआ पाही बिन्यामीन बी तियाआ डोआवाअहीं पालेहे, के जो तुमाअरी गोठी कोअहे तो योसेफ होय. 13 तुमू माआ आखी सालतीही जे मिसर देसोमेहें होय आन जों किबी तुमू पाल्योहो, तियां आखाआ बाप्तिमेहें आब्हाहा कोत आपजा; आन मामार माआं आब्हाहा माआं जागे लेत आवजा."

14 ताहरुउ तो तियाआ पाही बिन्यामीनोअ गोले लागीत कोइत रोड़्यू; आन बिन्यामीन बी तियाआ गोले लागीत कोइत तो बी रोड़्यू. 15 योसेफ तियाआ आखा पायहोंहों बी गुउं देत कोइत रोड़्यू, आन तिहींइं फासाड़ी तियाआ पाही तियाअरी गोठ्यी मिका वोल्या.

16 यी गोठीइ खबर, के योसेफोअ पाही आयाहा, फारोअ कोअ जाआं पोतीत गोयी, ताहां फारो आन तियाआ आधिकारी खुस ओवया. 17 फारो योसेफोहो कोयो, "ताआ पायहोहो को के, तुमू एक काम कोआ: पाल्ल्या जनवारोपोअ दाणा मिकीत कोइत कनान देसोम जावा. 18 आन तुमाआ आब्हाहा आन जिवज्योअ कोर्‍याआ माअहुंहूं लेत कोइत माआ जागे आवा; आन मिसर देसोम जो हाजाम हाजो होय तो आंय तुमुहूं आपीहीं, आन तुमुहूं या देसोअ हाजी हाजी वस्तु खाअहूं मिले. 19 आन तियांहां आदेश आप के ‘तुमू एक काम कोआ के मिसर देसोम रोत तुमाआ बोईं पोर्‍याअ काजे गाडे लेत जावा, आन तुमाआ आब्हाहा लेतावा. 20 आन तियांआं सामानोअ सिंता मा कोअहूं जोवे काहाके पुरा मिसर देसोमेहें जो हाजाम हाजो होय तो तुमाआ होय’."

21 याकोबोअ पोर्‍या तेहेंज कोअयो; आन फारोअ आदेशोअ पुरमाणे योसेफे तियांहां गाडे आप्ये, आन वाटेए कोअते खाअलोअ ओन बी आप्यो. 22 योसेफ तियाआ हरेक पायहोंहों एकेक जोड़ी आंगड़े बी आप्ये; पोन बिन्यामीनोहो सांदीइ तिन होव सिक्का आन पास जोड़ी आंगड़े आप्ये. 23 तियाआ आब्हाअ जागे ए वस्तु मोकलीइल्यी: दोह गोदड़ीपोअ मिक्यी मिसर देसोअ हाजी हाजी वस्तु, आन दाणा आन रोटू तियाआ आब्हाअ वाटेए कोअते खाअलाअ वस्तु वाअहीं दोह गोदडापोअ. 24 ताहरोअ तिये तियाआ पायहोंहों मोकल्या, आन ते वाट लागा; आन तिये तियांहां कोयो, "वाटे एखी जागे मा सुलाअहा."

25 मिसरोम रोत कनान देसोमेहें ते तियांआं आब्हाअ जागे पोता. 26 आन तियां आब्हाहा कोताप्य, "योसेफ ओमे बी जिवतुज होय, आन पुरा मिसर देसोपोअ राज तियाआज होये." पोन तिये तियांआं गोठीइ विश्वास नाहां कोअयू आन जिवोम जिव नाहां रोयू. 27 ताहां ते तियांआं आब्हा याकोबोहो योसेफोअ आखी गोठ्यी, जे तिये तियांहां कोयीते कोत देदी. जाहां तिये तियीं गाडीही देख्यी, जे योसेफे तियाहा लेतावे तेहें काजे मोकल्यीते, ताहां तियाआ मोनोहो होक जोड़्यू. 28 आन याकोबे कोयो, "बास, माआ पोर्‍यू योसेफ ओमे जाआं जिवतुज होय; आंय माआं मोतोअ रोत पेल जात कोइत तियाहा पालनारु."