1 ताहरुउ याकोबे तियाआ आखा बेटाह्हाहा एहें कोत कोइत हाद्या, "टोलू वोला, आंय तुमुहूं कोहीं के आखरीइ दिहोमेहें तुमापोअ कि कि ओवे.

2 ओ याकोबोअ पोर्‍या, टोलू वोलीत कोइत उनाआ,

तुमाआ आब्हा याकोबोअहें कान लागाड़ा."

3 "रूबेन, तू माआ डायु पोर्‍यू , माआ सेक्ती आन माट्योअ नाता वाअहीं

पेल्लोअ फलवो होय; मानपानोअ हाजू भाग आन सेक्तीइ बी हाजू

भाग तुज होय.

4 तू जो पाअयोंअ होस उकलीइनारु होय,

तिहीं वाअहीं बिहीराप रोत वादार कामोअ ने ठरीही;

काहाके तू माआं बोईंइरी हुतू,

तू तियीही एठी कोई देदी; तू माआं आथरुपोअ हुतू.

5 शिमोन आन लेवी तोम पाही पाही होय,

यांअ तारवाअ नुकसानीइ आथ्यार होय.

6 ओ माआ जीव, यांआं निकाअली गोठीमेहें भाग मा लेही,

ओ माआ महिमा, यांआं पोन्सामेहें मा सान्बाअही;

काहाके तियां खोतेए बाल्लायी माअहुंहूं माअयेहे,

आन सोताआज इश्शाआ परमाणे सालीत कोइत

बोलदोहो लेंगड़ा कोअया.

7 हारापीत ओवे तियांआं खोत, जे जाअखीलीही ओती;

आंय तियांहां याकोबोम आलाग आलाग

आन इस्राएलोमेहें वेरा सेर कोई देहीं.

8 ओ यहुदा, ताआ पाही ताआ आभार माने,

ताआ आथ ताआ दुस्मोनोअ बोसीपोअ पोड़े;

ताआ आब्हाअ पोर्‍या ताआ पागे पोड़े.

9 यहुदा सिहां वागोअ बासू होय. ओ माआ पोर्‍या,

तू हावोज तोइत दोरामेहें गोयुहू:

तो सिहूं नेत सिहींइं होस दोपात कोइत बोहीत गोयुहू;

तियाहा कोडो सेकलावनारु.✝

10 जाअहूं जाआं शिलो ने आवे ताअहूं जाआं

यहुदाआ आथोम रोत राज ने सुटे,

आन ने तियाआ पारवाड़ीम रोत कायदू आपनारु

आलाग ओवे;

आन राज्या राज्यामेहें माअहें तियाआ सेवा कोए.

11 तो तियाआ गोदड़ीइ बासाहा दाराक्शाआ मोलामेहें,

आन तियाआ गोदड़ीइ बासाहा हाज्जाहा दाराक्शाआ वेलाअरी बांदीत मिके;

तो तियाआ आंगड़े दाराक्शाआ रोहोमेहें,

आन तियाआ कोटोहो दाराक्शाआ रोहोमेहें तुवे.

12 तियाआ डोआ दाराक्शाआ रोहोवाअहीं रात्ला,

आन तियाआ दात दुदोवाअहीं आसला ओवे.

13 जबुलून दोर्‍याआ मेरेपोअ वोहती कोए,

तियाआ जागू जाहाजे उबे रोअलाआ जागू बोणे.

तियाआ राज्याआ हाद्दी सिदोन देसोअ जागे जाआं रोय.

14 इस्साखार एक मजबुत गोदड़ू होय,

तो मेडवाड़ाआ जागेहे तिहीं दोपात बोहत्लू.

15 तिये एक आरामोअ हाजू जागु पालीत लेदू,

आन तो जागू गोमे-रोमे एहलुहू होय.

तियाआ खांद वोजू उसलीइलोअ कोअते निसे कोअयो,

आन बोलेज पावरोअ होस काम कोउ वोल्यू.

16 दान इस्राएलोअ एक कुटूंबो ओत कोइत

तियांआं माअहुंउं न्याय कोए.

17 दान सड़केपोर्‍युउ एक हाप,

आन वाटेपोर्‍युउ एक नागीन होय,

जो कोड़ाआ खुर्‍यीही टोसेहे,

जियावाअहीं कोडापोअ बोहनारु

फासाड़ी ओदरीत पोडेहे.

18 ए यहोवा देव, आंय ताजपोअ रोत तारण मिलवीइलोअ वाट जोवतु आयुहू.

19 गादोपोअ एक टोली ताड़ ते आवे;

पोन तो वोलीत तियांहां गुगदाड़े.

20 आशेरोअ देसोम रोत जो जागु ओन भारपुर उब्जाड़े;

आन तो राजाअ लायकीइ हाजो हाजोज रोटू खाअहूं आपे.

21 नफ्ताली एक सुटली कुटारी होय,

तो हाजू गोगेहे.

22 योसेफ फोल्ल्यी लोगीइ एक डाल होय,

तो फोल्ल्यी लोगीइ एक डाल होय;

तियाआ डाल्यी पितड़ापोअ सोड़ीत कोइत पसरीत जातीही.

23 तोद्लीवाला, तियाहा तारास देदू,

आन तियापोअ बिलखे देदे,

आन तियाआ फाट पोड़्ये.

24 पोन तियाआ तोंद्ली मजबुत रोय,

आन तियाआ खांदे आन आथ याकोबोअ तियाज

सेक्तिमान देवोअ आथोवाअहीं उतवाल्ये ओवे,

जियाआ जागे रोत तो सारवाली आवे,

जो इस्राएल देसोअ खोड़को बी ठरे.

25 ओं ताआ आब्हाआ तिया देवोअ काम होय,

जो ताआ मदत कोए,

तिया सर्वसेक्तिमान देवोअ जो ताहूं

उसे रोत जुगोमेर्‍युउ आशिर्वाद,

आन निसे रोत उंडा पाअयोंमेर्‍युउ आशिर्वाद,

आन बुजी खानाराआ आन पेटोअ फलोअ आशिर्वाद आपे.

26 ताआ आब्हाअ आशिर्वाद,

माआं वेगाआ डायहांआं आशिर्वादोप रोत जाअखा वादीत गोयाहा

आन हादाजल्म्याआं डोगोअ गोमनारी वस्तुउ होस टिकीत रोये:

ते योसेफोअ मुन्कापोअ,

जो तियाआ पायहोप रोत आलाग कोआयू तो,

तियाआज मुन्काआ टोपापोअ फुलनारेन फोलनारे.

27 बिन्यामीन फाडीत टाकनारु कोल्वु होय,

वेगीइ ते तो हावोज माए,

आन हांजेपोअ वाटीत लेय."

28 इस्राएलोअ बारा पारवाड़ी एज होय: आन तियांआं आब्हे जिया जिया वसनोवाअहीं तियांहां आशिर्वाद आप्यू, तो ओज होय; एकेकाहा तियाआ लायक आशिर्वादोअ पुरमाणे तिये आशिर्वाद आप्यू.

29 ताहरोअ तिये तियांहां ओ हुकुम आप्यू, "आंय माआ मांअहुंहूं आरी मिलीइलोअ काजे जानारु होय: तियाहा काजे माहूं हित्ती एफ्रोनोअ खेतोमेर्‍याआ माहणोमेहें माआ वेगाआ डायहांअरी ओज्जा, 30 मोन्ज्ये तियाज माहणोमेहें जो कनान देसोमेहें मम्रेए सामनेवाली मकपेलाअ खेतोमेहें होय; तिया खेतोहो अब्राहामे हित्ती एफ्रोनोअ आथे याआज कोअते वेसातो लेदोतो के तो माहणोअ काजे तियाआ खाजगी खेत ओत जाय.✝ 31 तिहीं अब्राहाम आन तियाआ लाडी साराहा ओज्येते, आन तिहींज इसाहाक आन तियाआ लाडी रिबीकाहा बी ओज्ये; आन तिहींज आंय लिआहा बी ओज्यी.✝ 32 तो खेत आन तियामेर्‍येए माहणे हित्तीइ आथे वेसाते लेदेहे." 33 याकोब जाहां तियाआ बेटाह्हांहां ओ हुकुम आपी देदू, ताहां तियाआ गुडा खाट्लापोअ मिकीत जिव सोड़्यू, आन तियाआ मोल्या डायहांआं जागे जातु रोयू.✝