उत्पत्ती 48

याकोबोअ एफ्राइम आन मनश्शेहे आशिर्वाद आपीइलो

1 यीं गोठीइ फासाड़ी कोडे तेबी योसेफोहो कोयो, "ताआ आब्हू बिमार होय." ताहरुउ तो मनश्शे आन एफ्राईम नावोअ तियाआ बेनू पोर्‍याहा आरी लेत कोइत तियाआ जागे वाट लागू. 2 कोडे तेबी याकोबोहो कोयो के, "ताआ पोर्‍यू योसेफ ताआ जागे आवेहे," ताहां याकोब बोलेज खाटलापोअ उठीत बोठू. 3 याकोबे योसेफोहो कोयो, "सर्वसेक्तिमान देवे कनान देसोअ लूज गावोंअ जागे माहूं दर्शन आपीत कोइत आशिर्वाद आप्यु, 4 आन कोयो, ‘पाल, आंय ताहूं पान्गाड़ीहीं आन ताहूं राज्या राज्याआ मोंड्लीइ मुख्य बोणावीहीं आन ताआ फासाड़ी ताआ पारवाड़ीही ओं देस आपीहीं, जियावाअहीं के तो हादाफल्युउ तियांआं खाजगी जागु बोणीत रोये.’"

5 "आन ओमे ताआ बेनू पोर्‍या, जे मिसर देसोमेहें माआ आवीइलोअ पेल उब्ज्याहा, ते बी माआज कोवाअनारा; मोन्ज्ये जेहें कोइत रूबेन आन शिमोन माआ होय, तेहेंज कोइत एफ्राईम आन मनश्शे बी माआज कोवाये. 6 आन जें पोर्‍ये याआ फासाड़ी ताआ उबजे, तें ताआज कोवाये; पोन इसा वाटीइलोअ होमसे तें तियांआं पायहोंओज पारवाड़ीमेहें गोणाअनारे. 7 जेहेलाम आंय पद्दनोम*48:7 मोन्ज्ये पद्दनराम रोत आवतुतो, एप्राता पोतुहूं थोड़ोज बाकी ओतो, तेहेलाम कनान देसोमेहें माआ सामनेज राहेल वाटेज मोइत गोयी. आंय तियीही तिहींज एप्राता गावोंअ जो बेथलेहेम बी कोतेहे, तिहीं वाटेजपोअ डाटी देदी."✝48:7 उत्प 35:16-19

8 ताहां याकोब योसेफोअ पोर्‍याहा देख्या ताहां फुश्यो, "ए कोडा होय?"

9 योसेफ तियाआ आब्हाहा कोयो, "ए माआ पोर्‍या होय, जे देवे माहूं इंहीं आपल्या." तिये कोयो, "याहां माआ आहने लेताव के आंय याहां आशिर्वाद आपो." 10 याकोबोअ डोआ डायीपणी वाअहीं तुंदराअलाहा ओत गोयाते, तिहीं वाअहीं तियाहा कोम हुसतोतो. योसेफ ताहां तियाआ पोर्‍याहा आब्हाआ आहने लेत गोयु; आन तिये तियांहां गुउं देत कोइत गोले लागाड़्या. 11 ताहां याकोबे योसेफोहो कोयो, "माहूं आशा ने ओती के आंय ताआ मुख फाश्योअ पालीत सेकहीं: पोन पाल, देवे माहूं ताआ पारवाड़ बी देखाड़्यीही." 12 ताहां योसेफे तियांहां तियाआ आब्हाअ टोसणोअ विसमेहें हारीत कोइत उबडू लोटीत कोइत पागे पोड़्यु.

13 तिहींइं फासाड़ी योसेफ तियां बेनू पोर्‍याहा लेत कोइत, मोन्ज्ये एफ्राईमोहो तियाआ हाजाड़्या आथोवाअहीं के तो याकोबोअ बांगाड़्या आथोम पोड़े, आन मनश्शेहे तियाआ बांगाड़्या आथोवाअहीं, के तो याकोबोअ हाजाड़्या आथोम पोड़े, तियांहां आब्हाअ आहने लेत गोयु. 14 ताहरुउ याकोब तियाआ हाजाड़्यु आथ आगाड़ी कोइत एफ्राईमोअ मुन्कापोअ जो हानीइलू ओतू, आन तियाआ बांगाड़्यू आथ आगाड़ी कोइत मनश्शेए मुन्कापोअ मिक्या; तिये जाईं जाईंज एहेलोहो कोअयो, नेते डायु पोर्‍यू मनश्शेज ओतू. 15 ताहरोअ तिये योसेफोहो आशिर्वाद आपीत कोयो,

"देवे जियाआ सामने माआ वेगाआ डाया अब्राहाम आन इसाहाक साल्या,

तोज देव माआ जल्म ओवयोहो तोयोंअ रोत आज जाआं माआ सारवाली बोण्युहूं;

16 आन तोज देवदूत माहूं हरेक खाराबीम रोत वासाड़तु आयुहू,

तोज ओमे यां पोर्‍याहा आशिर्वाद आपे;

आन ए माआ आन माआ डाया अब्राहाम आन इसाहाकोअ कोवाये; आन धरतीपोअ जाअखीलाहा वादा!"

17 जाहां योसेफ देख्यो, के आब्हे तियाआ हाजाड़्यु आथ एफ्राईमोअ मुन्कापोअ मिक्युहू, ताहां तियाहा ओं ने हाजो हासवाअयो; तियाहा काजे तिये तियाआ आब्हाअ आथ तोअयु के एफ्राईमोअ मुन्कापोअ रोत फेड़ीत कोइत मनश्शेए मुन्कापोअ मिको. 18 आन योसेफे तियाआ आब्हाहा कोयो, "बा एहेलोहो नाहां; काहाके डायु ओज होय; तियाआ हाजाड़्यू आथ याआ मुन्कापोअ मिके."

19 तियाआ आब्हे कोयो, "नाहां; उनाआ, माआ पोर्‍या, माहूं यी गोठीइ मुंदू होये: मनश्शेप रोत बी माअहुंउं एक टोलू बोणे, आन तो बी महान ओत जाये, तेबी याआ हानीइलु पाही यापरोत वादार महान ओवे, आन तियाआ पारवाड़ीम रोत जाअखीलेहे राज्ये निहे."

20 फाश्योअ तिये तेदिहींज एहें कोत कोइत तियांहां आशिर्वाद आप्यू, "इस्राएली माअहें ताआ नाव लेय-लेय एहेलुहू आशिर्वाद आप्या कोए, ‘देव ताहूं एफ्राईम आन मनश्शेए होस बोणावी देय’," आन मनश्शेए रोत पेल एफ्राईमोअ नाव लेदो.✝48:20 इब्री 11:21

21 ताहां याकोबे योसेफोहो कोयो, "पाल, माआ मोत आहने होय: पोन देव तुमाआ आरी रोये, आन तुमुहूं तुमाआ वेगाअ डायहांअ देसोमेहें फाशुउ पोताडी देय. 22 आन आंय ताहूं ताआ पायहोप रोत वादार खेतोअ एक इसु आपोहो, जियाहा आंय एमोरीइ आथोम रोत माआ तारवाआन बिलखाआ ताकते वाअहीं जिकीत लेदुहू."