1 एक दिही लिआआ बेटिह्ही दीना, जे याकोबोप रोत उबज्यीते, तिया देसोअ पोर्‍यीइरी मिलीइलोअ काजे निहींयी. 2 ताहरुउ तिया देसोअ पुडारी हिव्वी हमोरोअ पोर्‍यू शकेमे तियीही देख्यी, आन तियीही तोइत लेत जात कोइत तियीइरी हुवयू, आन तियीही एठी कोइ देदी. 3 ताहां तियाआ मोन याकोबोअ पोर्‍यी दीनाअरी लागीत गोयो, आन तिये तियी पोर्‍यीइरी मेराली गोठ्यी कोअयी, आन तियीपोअ मेर कोउ वोल्यू. 4 ताहरुउ शकेम तियाआ आब्हा हमोरोहो कोयो, "माहूं यी पोर्‍यीइरी वेहेवाल कोइत आपे."

5 शकेमे माआ पोर्‍यी दीनाहा एठी कोइ देदीही एहलोहो याकोब उनाअयू तेहलाम तियाआ पोर्‍या वासड़ाअरी रानोम ओता, तियाहा काजे तो ते आवे ताअहूं ठावकुज रोयू. 6 ताहरुउ शकेमोअ आब्हू हमोर याकोबोअरी गोठ्यी कोइलाआ काजे तियाआ जागे गोयु. 7 जेहेलाम याकोबोअ पोर्‍या ओं उनाइत कोइत खुब नाराज ओवा, तियांहां खोत लागी; काहाके शकेम याकोबोअ पोर्‍यीइरी हुवीत कोइत इस्राएलोअ कुटूंबाआ आब्रु ने मिक्युतो, एहेलोहो काम कोइलोअ जास् सोगदाय ओती. 8 हमोरे तियां आखाहा कोयो, "माआ पोर्‍यू शकेम तुमाआ पोर्‍यीही मेर कोउ वोल्युहू, तियाहा काजे तुमाआ पोर्‍यीही तियाहा वेहेवाल कोइत आपी द्या. 9 आन आमाअरी वेहेवालोअ वेवारो मिकजा; तुमाआ पोर्‍यी आमाअहीं आन आमाआ पोर्‍यीही तुमाअहीं वेहवाल कोइत लेत जाजा. 10 ताहां तुमू या देसोमेहें रोत सेकहा; आन ओ मुलख तुमाआ सामने होय, इंहीं रोत कोइत वापारो कोअजा आन तुमाआ काजे जागु कोइत लेजा."

11 शकेमे बी दीनाआ आब्हाहा आन पायहोहों कोयो, "जर मापोअ मेरवानीइ नजर ओय, ताहां जो किबी तुमू माहूं कोहा, तो आंय आपिहीं. 12 तुमू मापोअ केतोहो बी देजो नेते भेट मागहा, तेबी आंय आपिहीं; पोन यी पोर्‍यीइरी माहूं वेहेवाल कोइत आपा."

13 ताहराआ ओ विसार कोइत के शकेमे आपाअ बोअह्हीं दीनाहा एठी कोअयीही, याकोबोअ पोर्‍या शकेम आन तियाआ आब्हा हमोरोहो डांबराल्लाहा गोग्या, 14 "कोडा विणखतनावाला माट्योहो आमाआं बोअह्हीं आपो एहेलोह काम आमू नाहां कोइत सेकता, काहाके यावाअहीं आमाआं आब्रु जानारु. 15 यी गोठीवाअहीं आमू तुमाआ मानताहा पोन आमाआ होस तुमामेर्‍याअ हरेक माट्योअ खतना कोअहूं पोड़े. 16 ताहां आमू आमाआ पोर्‍यी तुमुहूं वेहेवाल कोइत आपुहूं, आन तुमाआ आरी वोहती कोइत बी रोहूं, आन आपू बेनू एकीज जातीइ माअहें ओत जाहूं. 17 पोन जर तुमू आमाआं गोठ ने मान्या, आन तुमाआ खतना ने कोआड़्यो, ताहां आमू आमाआं पोर्‍यीही लेत कोइत इंहीं रोत जाता रोनारा."

18 तियांआं यी गोठीपोअ हमोर आन तियाआ पोर्‍यू शकेम खुश ओवा. 19 आन तो जुवान जो याकोबोअ पोर्‍यीही जाअखीलुहू मेर कोअतुतो, या कामोहों कोइलाम वाआ ने लागाड़्यी. शकेमोअ नाव तियाआ कुटुंबामेहें आखाम रोत वोडो ओतो. 20 तियाहा काजे हमोर आन तियाआ पोर्‍यू शकेम तियाआ होयरोअ गेटोअहीं जात कोइत गावल्या माअहुंहूं ओं सोमजाड़ा वोल्या, 21 "तें माअहें आपाअरी सान्बाइत रोनारे कोतेहे, ताहां तियांहां या देसोम रोत कोइत वापारो कोअहूं द्या; पाला, ओ देस तियांआं काजे बी भारपुर होय; ताहराआ आपू तियांआं पोर्‍यी राखुहूं, आन आपाआ पोर्‍यी तियांहां बी आपुहूं. 22 ते माहें निस्ते यी गोठीपोअ मान्य ओवेहे के तियांआं होस आपाआ आखा माट्योअ बी खतना ओवुहूं जोवे. 23 ताहरेए यांआं मेडेन बोकड़े, आन वासड़े आन यांआं आखे जनवारे आन मालमिलकत आपाआ ने ओत जाय के? एतोज कोअहूं के आपू यांआं गोठ मानित लेहूं, ताहां ते आपाअरी रोये." 24 ताहरेए जेत्ते माअहें तिया होयरोअ गेटोम रोत निहीतेते, तियां आखा हमोरोअ आन तियाआ पोर्‍या शकेमोअ गोठ मानित लेदी; आन तियां आखाआ खतना कोअयो.

25 तिसरे दिही, जाहां ते माअहें दुखाइत पिड़ाम ओते, ताहां दीनाआ पाही, मोन्ज्ये याकोबोअ बेन पोर्‍या शिमोन आन लेवी, तारवाआ लेत कोइत होयरोम ठावकाज फोहीत गोयान तिहींइं आखा माट्योहो तियां माइत टाक्या. 26 हमोर आन तियाआ पोर्‍या शकेमोहो तियां तारवाइ वाअहीं माइत टाक्या, आन दीनाहा शकेमोअ कोअमेहें रोत काडीत लेत गोया. 27 फासाड़ी याकोबोअ बिहीरा पोर्‍या होयरोमेहें गोया आन आखु वस्तु लुटीत लेदू; याअकाजे के तियांआं बोअह्हींइ इजोत जावाड़्यीते. 28 तियां मेडे, डोगरेन बोकड़े, आन गोदड़े, होयरोमेर्‍यीइ आन खेतोमेर्‍यीइ मालमिलकत ओतीते लुटीत लेदी. 29 तियांआं मालमिलकत, आन तियांआं पोर्‍ये, आन बोईंहीं बी आन तियांआं कोअमेहें जों किबी ओतो तों आखो लुटीत कोइत तियांआं ताबाम कोइत लेदो.

30 ताहां याकोबे शिमोन आन लेवीही कोयो, "तुमू या देसोम रोनारा कनानीइ आन परिज्जीइ मोनोम माआ बाप्तिम खोत लागाड़्यीही, यावाअहीं माहूं ओड़सेनेम टाक्युहू, काहाके माअरी तोम थोडेज माअहें होय; तियाहा काजे ओमे ते टोलू वोलीत कोइत मापोअ ताड़ आवेमे, ताहरेए माहूं माइत टाके, ताहां आंय माआ कुटुंबाअरीज आरवाइत जाहीं."

31 तियां कोयो, "शकेम आमाआ बोअह्हींइरी रांडीइ होस वेवारो कोअहूं जोवे के?"