उत्पत्ती 33

याकोबोअ एसावोहो मिलीइलोअ

1 याकोब नजर टाकीत कोइत पाल्य के एसाव शार होव माटी आरी लेत कोइत आवेहे. ताहां तिये पोर्‍याहा आलाग आलाग वाटीत कोइत लिआ आन राहेल आन बेनू पावरीहींइ आथोम होपी देदो. 2 आन तिये आखाअ आगाड़ी पोर्‍याअरी पावरीहीं, तियीइ फासाड़ी पोर्‍याअरी लिआहा आन आखाअ फासाड़ी राहेल आन योसेफोहो मिक्ये, 3 आन सोताहा तियां आखाअ आगाड़ी गोयु आन हांत वारी वोंद्यो, आन तियाआ पायहोअ जागे पोत्यु. 4 ताहां एसाव तियाहा मिलीइलाअ काजे गुगद्यु, आन तियाहा गोले लागाड़्यु, आन तियाहा गुउं देदू; ताहराअ ते बेनू रोड़ा वोल्या. 5 ताहां एसावे नजर टाकीत कोइत बोईंहीं आन पोर्‍याहा देख्ये आन फुश्यो, "एं जे ताअरी आयेहे एं कोडे होय?" तिये कोयो, "एं ताआ सेवकोअ पोर्‍ये होय, जियांहां देवे मेरवानी कोइत माहूं आप्येहे." 6 ताहरीइ पोर्‍याअरी पावरीइं आहने आवीत कोइत पागे पोड़्यी; 7 फाशीइ पोर्‍याअरी लिआ आहने आयी आन ते बी पागे पोड़्यी; सेलवाआ योसेफ आन राहेल बी आहने आवीत कोइत पागे पोड़्ये.

8 ताहां एसावे फुश्यो, "ताआ वोडी सेना जे माहूं मिल्यी, ए किहाअ काजे होय?" तिये कोयो, "याअकाजे के माआ मालिखोअ मेरवानीइ नजर मापोअ ओवुहूं जोवे."

9 एसावे कोयो, "माआ पाही, मापोअ जाअखीलोहो होय; जो किबी ताआ होय तो ताआज रोय."

10 याकोबे कोयो, "नाहां, नाहां, जर ताआ मेरवानी मापोअ ओय, ताहां माआं भेट स्विकार कोअ; काहाके आंय ताआ मुख पालीत कोइत, जेहलोहो के देवोअ मुख पाल्योहो, आन तू माहूं पालीत खुश ओवुहू. 11 तियाहा काजे ए भेट जे आंय ताहूं मोकल्यीही,स्विकार कोअ; काहाके देवे मापोअ मेरवानी कोअयीही, आन मापोअ जाअखीलोहो होय." जाहां याकोबे तियाहा जाअखीलीही रावणी कोअयी, ताहां जात तिये भेट स्विकार कोअयी.

12 एसावे कोयो, "आव, आपू वाटे लागत्ला; आन आंय ताआ आगाड़ी आगाड़ी सालीहीं."

13 याकोबे कोयो, "माआ मालिख, ताहूं मुंदूज होय के माअरी हाजे पोर्‍ये, आन दुध आपनारे मेडे, डोगरेन बोकड़े होय; जर याहां एक दिही बी वादार ओडीत लेत जाय, ताहां आक्खे मोइत जाय. 14 तियाहा काजे मालिख मारोत आगाड़ी निहा; आन आंय यां जनवारोअरी जे माआ आगाड़ी होय, यांआं सालीइलाअ पुरमाणे बागे बागे सालीत आवोहो, आन सेईरोम माआ मालख्योअ जागे पोतीहीं."

15 एसावे कोयो, "ताहरुउ आंय माआं हेंगात्याम रोत एखाहा ताआ आरी सोड़ीत जांव." पोन याकोबे कोयो, "याआ की गरज? एतोज भारपुर होय के माआ मालिखोअ मेरवानीइ नजर मापोअ रोये." 16 ताहरुउ एसाव तेदिहींज सेईर जाअलाअ काजे वाट लागू. 17 पोन याकोब तिहीं रोत निहीत कोइत सुक्कोतोम गोयु, आन तिहीं तियाआ काजे एक कोओ, आन तियाआ जनवारोअ कोअते जुपड़े बांद्ये. तिहींज वाअहीं तिया जागाअ नाव सुक्कोत पोड्यो.

18 याकोब जो पद्दन-अरामोमेहें रोत आयुतो, तो कनान देसोअ शकेम होयरोअ आहने आराम से पोतीत कोइत होयरोअ सामने पोड़ावू टाक्यू. 19 जिया जागाम याकोब तियाआ तोंबु उबू राख्यू, तियाहा तिये शकेमोअ आब्हा हमोरोअ पोर्‍याअ आथे एक होव सांदीइ पोशाआ वेसातु लेदू.✝33:19 यहो 24:32; योहान 4:5 20 तिहीं तिये एक देवान्यो बोणावीत कोइत तियाआ नाव एल-एलोहे-इस्राएल*33:20 एल-एलोहे-इस्राएल मोन्ज्ये, देव इस्राएलोअ देव मिक्यो.