1 तेदिहींज राजा अश्वेरोशे यहुदीइ विरोदी हामानोअ कोअबाआ एस्तेर राणीहीं आपी देदो. मोर्देखाय राजाहा सामने आयु, काहाके तियाअरी एस्तेरोअ कि नातो होय तों तियी राजाहा कोयोतो. 2 ताहां राजा तियाआ ते मुंदी जे तिये हामानोपोअ रोत मागित लेदीते. ते काडीत कोइत मोर्देखायोहो आपी देदी. एस्तेर मोर्देखायोहो हामानोअ कोओपोअ आधिकारी कोत नेमी देदू.

3 फाशीइ एस्तेर दुसरा वारी राजाअरी गोग्यी; आन तियाआ पागे पोडीत कोइत, रोडी रोडीइ तियाहा विनंती कोअयी के अगागोअ पारवाड़ी हामाने कोअल्यी यहुद्याहां आरवीइलोअ खाराब योजना राजा रद्द ओवुहूं जोवे. 4 ताहां राजा एस्तेरोअ वोल होनाआ राजडांडू कोअयू. तेहेलाम एस्तेर उठीत कोइत राजाआ हुंबर उबी रोयी; 5 आन कोनी वोल्यी, "जर राजाहा स्विकार ओय आन तियाआ मेरवानी मापोअ ओय आन ए गोठ तियाहा ठिक हासवाय, आन आंय बी तियाहा पसन आवती ओय, ताहां जे सिट्टी हम्मदाता अगागोअ पोर्‍यु हामाने राजाआ आखा प्रांताआ यहुदीही आरवीइलोअ कदर कोइत लेखाड़्यीते, तियांहां रद्द कोइला काजे लेख्याम आवे. 6 काहाके आंय माआ माअहोंपोअ आवनारी ओड़सनीही केहें कोइत पालीत सेकिहीं? माआ कुटूंबो आरवाअत्लो आंय केहें कोइत देखीत सेकिहीं?"

7 ताहां राजा अश्वेरोशे एस्तेर राणीहीं आन मोर्देखाय यहुदीही कोयो, "हामाने यहुद्यांपोअ आथ उठाड़्यु कोत आंय तियाआ कोअ एस्तेरोहो आपी देदो, आन तियाहा फासीपोअ टांगी देदू. 8 ओमे तुमुहूं पोटे तेहें कोइत यहुद्याआं बाप्तिम राजाआ नावसे लेखा; तियी सिट्टीपोअ राजाआ मुंदीइ साप बी लागाड़ा; काहाके जे सिट्टी राजाआ नावसे लेखाअली सिट्टी आन तिहींपोऱ्युउ तियाआ मुंदीइ साप कोडाहाज रद्द कोअता ने आवे."

9 तियी गालाहा सिवान नावोअ तिसरा मोयनाआ तेविसवा दिहोम राजाआ लेखार्‍याहां हादाड़्या आन जियी मोर्देखाय जेहें कोइत कोय तेहें कोइत इस्राएलवालाहां आन आधिकाऱ्योहों आन भारतोहो लागाड़ीत ते कूश* देसोअ जागे जाआं, आखाज एक होव सात्तावीस प्रान्ताआ आधिकारी आन सिपायड़ाहां जियांतियांआं प्रांताआ अक्शरोमेहें आन जियांतियांआं देसोअ बाशामेहें आन यहुदीही तियांआं आक्शरोमेहें आन बाशामेहें लेख्यो लेत मोकल्यो. 10 मोर्देखाये राजा अश्वेरोशोअ नाव से सिट्टी लेखाड़ीत कोइत तियापोअ राजाआ मुंदीइ साप लागाड़ीत कोइत, जोरे गुगदीइनारा सारकाऱ्या कोड़ापोअ बातमी वेरनाराआ आथोम लेत मोकली देदी.

11 तियी सिट्टीमेहें राजाआ तरफ से आखा होयरोअ यहुद्याहां एहें कोइत परवानगी जोड़्यीते के तें सोताआ जिव वासाड़ीइलोअ काजे सोताहाज उबे रोअहूं जोवे आन जिया जियाआ प्रांताआ माअहें उदाबादीज तुमुहूं तुमाआ बोईं-पोऱ्याहां तारास देने आवे तियांहां माइत आरवीत टाकीइलोअ आन तियांआं मालधन लुटीत लेअलो. 12 ओं आखो अदार नावोअ बारावा मोयनाआ तेरावे दिही राजा अश्वेरोशोअ आखा प्रान्तामेहें एकेज दिही कोअहूं जोवे. 13 यां आदेशपत्राआ नकल आखा प्रान्तामेहें, आखा देसोअ माअहोंअ जागे मोकली देजा; तेदिहीं आखे यहुदी तियांआं दुस्मोनोअरी बोदलू लेअलोअ काजे तियारीम रोअहूं जोवे. 14 बातमी पोताड़नारा जोरे गुगदीइनारा कोड़ापोअ बोहीत कोइत राजाआ आदेशो वाअहीं वेगा जाता रोअहूं जोवे; शूशन राजधानीमेहें रोत ओ आदेश सोड़्यू.

15 ताहां मोर्देखाय निला आन पांडा रंगोअ हाजा हुतोअ आंगड़े पोवीत आन मुन्कापोअ होनाआ वोडू टोपू मिकीत आन जामण्या रंगोअ आंगड़ो पोवीत राजाआ आगाड़ी निहीयु, आन शूशन होयरोमेर्‍येए माअहें खुसीइ तिवारोअ पुकारु कोअयू. 16 ताहां यहुद्याहां खुसी ओवी, हाजो लागो आन तियांहां वोडू मानपान जोड़्यू. 17 आन जिया जिया प्रान्तामेहें आन जिया जिया होयरोमेहें, जिहीं काबी राजाआ आदेश पोतू तिहींइं यहुद्याहां जास्ती खुसी ओवी आन तेदिहीं पांगाती मिकीत कोइत तिवार कोअयू. आन तिया देसोमेर्‍येए वारुज माअहें यहुदी बोणित गोये, काहाके तियांहां यहुद्या माअहोंअ जास्ती बिक लागी.