1 थोड़ाक दिहोअ फासाड़ी जेहेलाम अश्वेरोश राजाआ खोत उलाअयी, तेहलाम तियाहा वशती राणीइ ओर आयी, आन तियाहा ओर आवयी के वशती राणी की काम कोअयोतो, आन तियीइ विरुद्दाम कोड्लू राजआदेश परसार कोअयुतो. 2 ताहां राजाआ सेवा कोअनारा खाजगी सेवकहों तियाहा कोयो, "राजाआ काजे देख्याम बाहरी एतीज कुवारी पोर्‍यी होदुहूं जोवे. 3 आन राजा तियाआ राज्याआ आखा देसोम रोत एकेक आधिकारी ठरवी द्या, मोन्ज्ये ते आखी बाहरी बाहरी जुवान्यीहीं शूशन राजधानीमेहें लेत आवीत सेके, आन बोईंइ आधिकारी हेगेहे जो राजाआ सेवक ओतु, तियाहा होपी देय; आन सोकी कोइलाआ लायक वस्तु तियींहीं आपुहूं जोवे. 4 ताहां तियींम रोत जे जुवान्यी राजाहा पसन आवे, तियीही वशती राणीइ जागापोअ उप-राणी बोणावुहूं जोवे."

ए गोठ राजाहा गोम्यी आन तिये एहेलोज कोअयो.

5 शूशन राजधानी मेहें मोर्देखाय नावोअ एक यहुदी रोतुतो, जो कीश नावोअ एक बिन्यामीनोअ जातीइ शिमीइ पोर्‍याआ पोर्‍यु, आन याईरोअ पोर्‍यु ओतू. 6 जेहेलाम बाबेलोअ राजा नबुकदनेस्सर यहुदाअ राजा यकोन्याहां येरुसालेमोम रोत गुलाम बोणावीत कोइत लेत गोयुतो, ताहां मोर्देखाय बी तियांमेर्‍युउ ओतु. 7 तिये हादस्सा नावोअ तियाआ सुलत पायहोअ पोऱ्यी, जियीही एस्तेर बी कोतेहे तियीही पोहयीते; काहाके तियीइ आयहीन आब्हू कायने ओते, आन ते पोर्‍यी बाहरी आन होबात्लीही ओती, आन जेहेलाम तियीइ आयहीन आब्हू मोइत गोये, तेहेलाम मोर्देखाय तियीही तियाआ पोर्‍यी कोत पोहयी.

8 जेहेलाम राजाआ आदेश आन कायदा उनाड़्या, आन जाअखीलीही जुवान्यी शूशन राजधानीमेहें हेगेए आधिकारोअ निसे टोलू कोअयी, ताहां एस्तेर बी राजवाड़ामेहें बोईंइ आधिकारी हेगेए आथोम होपाअयी. 9 ते कुवारी तियाआ नजरेमेहें हाजी देखाअयी; आन तो तियीही पालित खुस ओवू; ताहां तिये जाअखी वाआ ने लागाड़्यी, तियीही राजवाड़ाम रोत सोको कोइलाआ वस्तु, आन तियीइ रोटू, आन तियीइ काजे हांत निवड़ीइल्यी सेविकाहा बी आप्यी, एस्तेर आन तियीइ सेविकाहा रोय तेहें काजे आखाम रोत हाजु जागू आप्यू.

10 एस्तेर तियीइ कुटूंबो आन तियीइ पारवाड़ीइ बाप्तिमेहें किज नाहां कोयो, काहाके मोर्देखाये तियीही आदेश आप्युतो, के तियाहा किज मा कोत आपीही. 11 एस्तेरोअ की ओवे कोत तियीइ हालसाल जाईंलोअ काजे मोर्देखाय दाड़ीइज खोलीइ आगाड़ी एहें तेहें फिर्‍या कोअतुतो.

12 जेहेलाम एकी पोर्‍यीइ पाडी आयी, के ते अश्वेरोशे राजाआ जागे जाय आन ओं तियी वेले ओवो, जेहेलाम तियीइरी बोईंइ काजे ठरवीइल्या नियमोअ पुरमाणे बारा मोयना जाआं वेवारो कोअयोतो; मोन्ज्ये तियींइं सोको ओवीइलाआ दिही एहें कोइत सेकीत गोया, के सोव मोयना जाआं हाजो गोंदाण्यो तेल, आन सोव जाआं बोईंहीं सोको कोइलाआ बिहीरो सामान बी लागाड़तेते. 13 एहें कोइत ते कुवारी जेहेलाम राजाआ जागे जातीते, तेहेलाम जों किबी तियींहीं जोवतोय, तों तियींहीं आपाअतोतो; काहाके रोअलाअ खुलीम रोत राजवाड़ामेहें आरी लेत जात सेके. 14 पोर्‍यी राजाआ राजवाड़ामेहें हांस्तीइ वेले जातीते आन वेगीइ तिहीं रोत निहीत कोइत बिहीरी जागे रोवाख ओती तिया कोअमेहें जाती रोतीते, ओं बिहीरो रोअलाआ कोअ राजाआ सिपाय शाशगजोअ आधिकारोम ओतो. शाशगज राजाआ लाडीइ नोवकर देखबाल कोअतुतो. जाहां पोर्‍यी राजाहा पसन आवतीते, आन राजा तियीही नाव तोइत हादतुतो, ताहां ते बिहीरी वारी तियाआ राजवाड़ामेहें जातीते. नेते उदड़ीज ने जातीते.

15 जेहेलाम मोर्देखायोअ काकुह्हू आबीहेलोअ बेट्टीही एस्तेर, जियीही मोर्देखाये बेट्टीही मानित कोइत मिक्यीते, तियीइ राजाआ जागे जाअलाआ वेल आयीते, तेहेलाम जों किबी बोईंइ सांबालनारे राजाआ सिपाय हेगे तियीइ काजे ठरव्योतो, तिया रोत जाअखो तियी फाशोअ किज ने माग्यो. जेता जोओं एस्तेरोहो पाल्यो ते आखा खुस ओवा. 16 ताहां एस्तेर राजवाड़ा मेहें राजा अश्वेरोशोअ जागे तियाआ राज्याआ हांतवा वोरह्योम तेबेत नावोअ दाहवा मोयनामेहें पोताड़्यी. 17 राजा एस्तेरोहो आखी बोईंइ रोत जाअखी मेर कोअयी, आन बिहीरी आखी जुवान्यी रोत जाअखी माया आन मेरवानी तियीपोअ ओवी. तियीइ मुन्कापोअ राजमुकुट मिक्यू आन वशतीइ जागापोअ राणी बोणायी. 18 ताहां राजा तियाआ आखा मोंत्र्योहों आन आधिकार्‍योहों एक वोडी पांगात आप्यी, आन तियाहा एस्तेरोअ पांगात कोयो; आन आखा प्रान्तामेहें कर माफ कोआड़्यू, खुल्ला मोनो वाअहीं माअहोंहों बक्शिसे आप्ये.

19 तिया गालाहा राजे मोर्देखायोहो राजवाड़ाआ बाअणा पोअ सारकाऱ्यी नोवकरीपोअ नेम्युतो. 20 एस्तेर सोताआ माअहोंअ आन कुटूंबाआ गोठ ने कोयीते, काहाके मोर्देखाये तियीही ने कोअला आदेश आप्युतो; आन एस्तेर मोर्देखायोअ गोठ जेहें कोइत तियाआ जागे तियीइ पालन पोशण कोइला वेले मानतीते तेहेंज कोइत मान्यी.

21 तियां दिहोमेहें मोर्देखाय राजाआ राजवाड़ाआ बाओपोअ बोहीत रोतुतो, ताहां राजाआ सिपाय बी बाओपोअ देखरेख बी कोअताते, तियांमेहें बिकतान आन तेरेश नावोअ बेन जोओं राजा अश्वेरोशोअरी खोताइत कोइत माइलोअ काजे हेंहींत बोठाते. 22 ए गोठ मोर्देखायोहो मुंदू पोड़्यू, आन तिये ए गोठ एस्तेर राणीहीं कोयी, आन एस्तेर राणी मोर्देखायोअ नाव लेत कोइत राजाहा सेतावणी आप्यी. 23 तापास काड्यू ताहां ते गोठ खोरी निहींयी आन तियां बेनुहूं साड़ोअ उसे टांगी देदा, आन ए गोठ राजाआ सामने इतिहासोअ पुस्तकोमेहें लेखाअयी.