एस्तेर 9

यहुदी तियांआं दुस्मोनोहों आरवीइत्ले

1 अदार नावोअ बारावा मोयनाआ तेरावे दिही, जेदिहीं राजाआ आदेश आन पुकारु ओविइलोअ ओतो आन यहुदी माअहोंहों दाबनारे एहलुहू आहरुज ओतू; पोन आखो उलटोज ओवो, यहुदी तियांआं दुस्मोनोहों दाबीत टाक्या; 2 तेदिहीं यहुदी माअहें राजा अश्वेरोशोअ आखा प्रान्तामेहें तियां तियांआं होयरोमेहें तियांआं दुस्मोनोहों देअलोअ काजे टोलू वोल्ये; कोडाहाज तियांआं नुकसान कोइलोअ हिम्मत ने ओवतीते, आखा माअहोंहों तियांआं धाक ओती. 3 आन आखा प्रान्ता मेर्‍याआ मोंत्री, आधिकारी, सिपायड़ा आन राजाआ आधिकार्‍यों यहुदीही मदत कोअयी; काहाके तियांहां मोर्देखायोअ धाक ओती. 4 राजवाड़ामेहें मोर्देखायोअ जास्ती वोडू मानपान ओतू, आन तियाआ नाव आखा प्रान्तामेहें पसरीत गोयोतो; मोर्देखायोअ नाव जाअखो वोडो वोडो ओवतो गोयो. 5 यहुदी तियांआं आखा दुस्मोनोहों तारवाइ वाअहीं माईंत कोइत आरवीत टाक्या, आन मोनोहों पोटे तेहें कोइत तियांआं दुस्मोनोपोअ बोदलू.

6 शूशन या राजधानी होयरोमेहें यहुदी पास होव माअहोंहों माईंत आरवीत टाक्ये. 7 तियां पर्शन्दाता, दाल्पोन, अस्पाता, 8 पोराथा, अदल्या, अरीदाता, 9 पर्मशता, आरीसाय, अरीदे आन वेजाता, 10 यां यहुद्याआं विरोधी हम्मदाताआ हामानोअ दोहू पोर्‍याहा माईंत टाक्या; पोन तियांआं मालधन ने लुट्यो.

11 तेदिहींज शूशन राजधानीमेहें मोल्या माअहोंअ गणती राजाहा कोत आप्यी. 12 ताहां राजा एस्तेर राणीही कोयो, "यहुद्यां शूशन राजवाड़ामेहें पास होव माअहोंहों आन हामानोअ दोहू पोर्‍याहा बी माईंत आरवी देदाहा; फाशोअ राज्याआ बिहीरा प्रान्तामेहें कि कि ओवोय तों कि मुंदू! ओमे ताआ फाशीइ काविहीं मागणी होय जी के? ते बी मान्य ओवे. ताआ काविहीं मागीइलोअ ओय ताहां को, तों बी ताहूं जोड़ीत जाय."

13 एस्तेर कोयो, "जर राजाआ मोर्जी ओय ताहां शूशनोमेर्‍याआ यहुद्याहां आज कोअयो तेहलोहो हांदाआ बी परवानगी रोअहूं जोवे आन हामानोअ दोहू पोर्‍याहा फासीइ खांबोपोअ टांगी देअहूं." 14 ताहां तेहेंज कोए तेहें राजाआ आदेश निहींयू. ओ आदेश शूशनोमेहें रोत निहींयू, आन माअहूं हामानोअ दोहू पोर्‍याहा फासीपोअ सोड़वी देदा. 15 शूशनवाले यहुदी माअहें अदार मोयनाआ शोवदावे दिही बी टोलु वोलीत कोइत शूशनोमेहें तिन होव माअहोंहों माईंत टाक्ये, पोन मालधन ने लुट्यो.

16 राज्याआ आलाग आलाग प्रांताआ यहुदी टोलु वोलीत कोइत तियां तियांआं जिव वासाड़ीलोअ काजे उबे रोये, आन तियांआं दुस्मोनोमेहें रोत पोन्शात्तर हाजार माअहोंहों माईंत उडाड़्ये, ताहां तियांहां दुस्मोनो रोत होक जोड़्यू; पोन तियां मालधन ने लुट्यो. 17 ओं अदार मोयनाआ तेरावा दिहोहो ओवो; आन शोवदावा दिहोहो तियां तिवारोअ दिही ठरव्यू. 18 पोन शूशनवाले यहुदी माअहें अदार मोयनाआ तेरावा आन शोवदावे बेन दिही टोलू वोल्ये आन पोंद्रावा दिहोहो तिवारोअ कोत ठरव्यु. 19 तियाहाज काजे हाना होयरोम रोनारे आन खेड़ागावोम रोनारे यहुदी माअहें अदार मोयनाआ शोवदावा दिहोहो तिवारोअ दिही कोत ठरवीत एकमेकाअहीं रोटू लेत मोकलीइत्ले.

पुरीम तिवार

20 यी गोठीइ माग लेखीत कोइत मोर्देखाय राजा अश्वेरोशोअ आखा प्रान्तामेहें, सेटे आन आहने रोनारा आखा यहुदी जागे सिट्टी मोकल्यी, 21 आन ओ आदेश आप्यू, के अदार मोयनाआ शोवदावा आन पोंद्रावा दिहोहो वोरह्योअ डिठ तिवार मान्या कोअहूं जोवे कोत ठरव्यो. 22 या दिहोअ दिही यहुद्याहां तियांआं दुस्मोनो रोत होक जोड़्यू, आन याज मोयनाम दुख निहीत कोइत होक आयु, रोज्ये जाते रोये आन खुसी आयी; तियाहा कोत ओ मोयनु तिवारोअ मोयनू कोत पालजा. एकमेकाहा आन गरिबोहों पांगात आपजा आन दानधरम कोअजा. 23 तिहीं वाअहीं यहुदी जेहें कोइत सुरुवात कोअयीते, आन जेहेलोहो मोर्देखाये तियांहां लेख्यो, तेहेंज कोइलाआ ठरवीत लेदो.

24 काहाके हम्मदाता अगागोअ पोर्‍यु हामान जो आखा यहुदीइ विरोधी ओतु, तिये यहुदीही माईंलाअ कदर काड्यी, आन तियांहां आरवीत देअलोअ काजे सिट्टी टाक्यीते. 25 पोन जेहेलाम राजा ओं जाईंत लेदो, ताहां तिये आदेश आप्यू आन लेखाड़्यो के जे खाराब योजना हामाने यहुदीइ विरुद्दाम कोअयीते ते तियाआज बोसी आलाअयी, ताहां तियाहा आन तियाआ पोर्‍याहा नेहें फासीपोअ टांगी देदा. 26 तियाहा काजे पुर शब्दा वाअहीं तिया दिहोअ नाव पुरीम कोत पोड़्यो. यी सिट्टीमेऱ्युउ माग आन यीं आखी गोठीइ बाप्तिम जों किबी तियां पाल्यो आन जों किबी तियांअरी ओवो तिहीं वाअहीं बी, 27 यहुदी माअहूं तियांआं काजे आन तियांआं पोर्‍याआ काजे आन जें तियांम सामील ओवेय तियांआं काजे एहलुहू कड़क नियम आन आदेश काडी के, तिया लेखल्याआ पुरमाणे वोरह्योअ डिठ तियाआ ठरवीइल्यी वेलेपोअ एं बेन दिही पालुहूं जोवे; 28 आन पिड़ीन पिड़ीइ, हारेक कुटूंबाम, प्रान्ता प्रान्ताआ, हारेक होयरोम ए दिही ओर कोइत पालन कोअहूं जोवे. यहुदी माअहें या पुरीम तिवारोअ पालन कोइलोअ ने सुकवुहूं जोवे; यां दिहोहो ओर कोइलोअ यहुदी माअहें केदीहींज ने विहीराअहूं जोवे. 29 ताहां आबीहेलोअ पोर्‍यी एस्तेर राणी आन मोर्देखाय यहुदी पुरीमोअ बाप्तिम ए दुसरी सिट्टी वोडा अधिकारो वाअहीं लेख्यी. 30 तियाआ ते सिट्टी मोर्देखाये अश्वेरोशोअ राज्याआ एक होव सात्तावीस प्रांताआ आखा यहुदीइ जागे शांती आन सुभेश्शा मोकल्यी. 31 के पुरीम तिया दिहोहो खास ठरवीइल्या वेलो मेहें मोर्देखाय यहुदी आन एस्तेर राणीइ आदेशोअ अनुसार, आन जे यहुदी तियां आन तियांआं पोर्‍याआ काजे ठरवित लेदोतो, तियाआ पुरमाणे बी उपास आन विखु कोअहूं जोवे. 32 पुरीमोअ बाप्तिम ओ नियम एस्तेरोअ आदेशो पुरमाणे पाक्कू कोई देदू, आन तियांआं सर्सा पुस्तकोमेहें लेखाअयो.