एस्तेर 5

एस्तेर राजाहान हामानोहो पावणा तोअत्ली

1 तिसरे दिही एस्तेर तियीइ राजआंगड़े पोवीत कोइत राजमोंदिरोअ मायते जात कोइत, राजमोंदिरोअ आगाड़ी उबी रोयी; राजा राजमोंदिरोमेहें राजगादीपोअ राजवाड़ाआ बाओअ सामने बोठुतो; 2 आन जेहेलाम राजा एस्तेर राणीही खोलीमेहें उबी रोल्यी देख्यी, ताहां तिये तियीपोअ मेरवानी देखाड़्यी आन तिये तियाआ आथोमेऱ्युउ होनाआ राजडांडू तियीइ वोल आगू कोअयू. ताहां एस्तेरे आहने जागे जात कोइत राजडांडाआ सेंडीही आथ लागाड़्यू. 3 ताहां राजा तियीही फुशो, "ए एस्तेर राणी, ताहूं कि जोवे? तु कि मागेहे? माग आंय ताहूं आरदो राज्यो जाआं आपिहीं."

4 एस्तेर कोयो, "जर राजा सायबोअ मोर्जी ओय, ताहां राजाआ पावणायीइ काजे आज मी जो रोटू तियार कोअयुहू तिहीं हामानोहो आरी लेत कोइत आवुहूं जोवे."

5 ताहां राजा ताबुड़ आदेश मोकलीत हामानोहो मामार हादाड़्यू, काहाके एस्तेरोअ कोल्याआ पुरमाणे पावणायीमेहें जात सेकाय. ताहराआ राजा आन हामान एस्तेर तियार कोअल्या रोटाआ पावणायीमेहें गोया. 6 रोटू खाअलोअ वेले दाराक्शाआ रोहो पितामेहें राजा एस्तेरोहो फुशो, "ताआ कि इश्शा होय? ते मान्य ओत जाय. तु कि मागेहे? माग, आरदो राज जाआं ताहूं जोड़ीत जाय."

7 एस्तेर उत्तर आप्यो, "माआ विनंती आन मागणी ए होय: 8 जर राजाआ मेरवानी मापोअ ओय आन माआ रावणी मान्य कोए एहलोहो राजाहा लागो ताहां आंय पावणे तोअहीं, तेहलाम राजा आन हामान हांदाआ पावणायीमेहें आवुहूं जोवे, तेहलाम आंय राजा साहीब कोयोहो तेहें कोइत माआ कि मागीइलो होय तों मागीहीं."

मोर्देखायोहो माइलोअ कदर

9 तेदिहीं हामान खुस आन खुसी मोनेज बाअथे निहींयू, पोन जेहेलाम राजवाड़ाआ बाओपोअ मोर्देखाय तियाहा देखीत वाहीं उठ्यू ने के बियू ने, तों देखीत तिया हामानोहों जास्ती खोत लागी. 10 ताहां हामान तियाआ खोतेहे आवरीत कोइत तियाआ कोअ गोयु; आन तियाआ दोस्ती आन तियाआ लाडी जेरेशोहो हादे मोकल्ये. 11 ताहां हामान तियांआं आगाड़ी तियाआ मालधन आन तियाआ पोर्‍याआ पोर्‍ये वाद्येहे आन राजा तियाहा केहें कोइत बिहीरा आखा मंत्र्यो आन आखा आधिकार्‍यों रोत उसेए जागू आप्युहू, तों आखो कोत आप्यो. 12 हामाने ओं बी कोयो, "एस्तेर राणी बी माहूं सोड़ीत बिहीरा कोडाहा राजाअरी, पांगातीमेहें नाहां हादती; आन हांदाआ राजाअरी तियी माहूं नेवतो आप्योहो. 13 एतो आखो होय तेबी जाअहूं जाआं तो राजवाड़ाआ बाओपोअ बोहीत रोनारु यहुदी मोर्देखाय माहूं देखाय, ताअहूं जाआं ओं आखो माहूं फालतू हासवाअहे."

14 तियाआ लाडी जेरेश आन तियाआ आखा दोस्ती तियाहा कोयो, "पोन्नास आथोअ*5:14 पोन्नास आथोअ विही मिटर उसू खांब कोअहूं जोवे आन हांदाआ वेगीइ राजाहा कोजी के, तिया मोर्देखायोहो तिया खांबोपोअ टांगी द्या; आन खुसी खुसी राजाअरी पावणायीमेहें जाजी." ए गोठ हामानोहो पोटीत गोयी आन तिये तेहेलुज एक फासीइ काजे खांब तियार कोआड़ीत लेदू.