एस्तेर 6

राजा मोर्देखायोअ मानपान कोअत्लू

1 तियी राती अश्वेरोश राजाहा निंद ने आयी, तियाहा कोत तियाआ आदेशोअ पुरमाणे इतिहासोअ पुस्तक लेत आवित कोइत राजाहा वासीत देखाड़्यो. 2 तिहींमेहें ओ माग लेखल्यू जोड़्यू, के अश्वेरोश राजाआ राजवाड़ाआ बाओपोअ देखबाल कोअनारा सिपायड़ा ओता, तियांमेर्‍याआ बिकतान आन तेरेश नावोअ बेन जोआं तियाहा माईंत टाकीइलोअ कदर कोअयीते, पोन मोर्देखाये तियीही खोबर कोई देदीते. 3 ताहां राजे फुशो के, "याआ बाप्तिम मोर्देखायोअ वाजिहीं मानपान के इलाम आपल्यू के नाहां?"

राजाअ सेवक जे तियाआ सेवा कोअनारा ओता, तियां कोयो, "तियाआ कोअते किज नाहां कोअयो."

4 राजे फुशो, "खोलीम कोडो होय?" तियीज वेले हामान राजाआ राजवाड़ाआ बाअथे खोलीमेहें तिये मोर्देखायोअ काजे जो खांब तियार कोआड़्युतो तियापोअ तियाहा टांगी देअलोअ गोठ राजाअरी कोअहीं, या विसारो वाअहीं तो आयुतो. 5 ताहां राजाआ सेवके राजाहा कोयो, "खोलीमेहें ते हामान उबु होय."

राजा कोयो, "तियाहा मायते हादीत लेत आवा."

6 जेहेलाम हामान मायते आयु, ताहां राजा तियाहा फुशो, "जिया माअहोंअ वोडाय राजा कोअहूं जोवे, तियाहा तियाअरी कि कोए ताहां हाजो रोय?" हामाने ओ विसार कोअयू, के मारोत जाअखु राजा कोडाआ वोडाय कोइत सेकेहे.

7 हामाने राजाहा उत्तर आप्यो, "जिया माअहोंअ काजे राजा मानपान कोअहूं जोवे, 8 तियाआ कोअते जें राजा पोवतुय तें आंगड़े लेतावा आन जियापोअ राजा बोहेहे तो एक कोड़ू बी लेतावा, आन तियाआ मुन्कापोअ जो राजमुकुट रोहे तो बी लेतावा. 9 फाशेए ते आंगड़े, आन तो कोड़ू राजा एखा वोडा अधिकाऱ्योअ आथोम आपीत राजा जियाआ मानपान कोअहूं होदे तियाहा तो आंगड़ो पोवाड़े, आन तियाहा कोड़ापोअ बोहाड़ीत कोइत होयरोअ सोवकड़ीइहें फिरावुहूं जोवे; आन तियाआ आगाड़ी ओ परसार कोअहूं जोवे, जियाआ मानपान राजा कोअहूं होदे, तियाअरी एहलोहोज ओवे."

10 राजा हामानोहो कोयो, "जेहें कोइत तुमे कोयो तियाआ पुरमाणे, तें आंगड़े आन ते कोड़ा लेत कोइत, तिया राजवाडाआ बाओपोअ बोहीत रोनारा यहुदी मोर्देखायोअरी तेहेंज कोअ, तुमे कोयीही ए एक बी गोठ ने सुकुहूं जोवे."

11 ताहां हामान तें आंगड़े, तियां कोड़ाहा लेत कोइत, मोर्देखायोहो पोवाड़्ये, आन तियाहा कोड़ापोअ बोहाड़ीत होयरोअ वाटे वाटे पुकारु कोअतु फिरव्यो, "जियाआ वोडाय राजा कोअहूं होदे तियाअरी एहलोहोज ओवे."

12 ताहां मोर्देखाय ते राजवाड़ाआ बाओअ जागे जातु रोयु, पोन हामान नाराज ओत कोइत आन मुन्को टापित ताबुड़तुड़ तियाआ कोअ जातु रोयु. 13 हामाने तियाआ लाडी आन तियाआ दोस्त्योहों तियाअरी जों ओवो तों आखो बादो उखरीत कोत आप्यो, ताहां तियाआ हुशार दोस्ती आन तियाआ लाडी जेरेश तियाहा कोयो, "मोर्देखाय जियाहा तु निसो देखाड़ीलोअ कोअहे, पोन जर तो यहुदी पारवाड़ीमेर्‍युउ ओय, ताहां तु तियाहा नाहां जिकीत सेकतू, तियाआ आगाड़ी तु नक्की हारवाअनारु होय."

हामोनोअ मोत

14 ते तियाअरी गोठीज कोअते ते राजाआ सेवक आवित कोइत हामानोहो एस्तेरे तोअल्यी पावणायीम हादीत लेत गोया.