1 राजा अश्वेरोशोअ वाडोमेर्‍यीइ गोठ होये. तो राजा भारतोम रोत ते कूश देसोअहीं जाआं आखाज एक होव ना सात्तावीस देसोपोअ राज कोअतुतो. 2 तिया दिहोमेहें अश्वेरोश राजा राजगादीपोअ बोहीत जो शूशन नावोअ राजधानीम रोतुतो.

3 तियाआ राजकारणोअ तिसरा वोरह्योम तिये आखा मोंत्र्योहों आन आधिकार्‍योहों पांगात आप्यी. फारस आन मादी राज्याआ सेयनिकोअ मुख्य आधिकारी आन राज्यपाल बी हजर ओता. 4 पुरा सोव मोयना जाआं तो तियाआ राज्याआ वेयभवोअ मालधन आन तियाआ वोडी ताकतेए हाजाम हाजी वस्तू देखाड़्यी.

5 ते दिही सेकीत गोया, तिहींइं फासाड़ी तिये राजे आखा हाना वोडाहा, जे तिहीं शूशन नावोअ राजधानीमेहें टोलू वोलीत रोयाते, तियांहां राजवाड़ाआ बोगिसामेहें हांत दिही जाआं पांगात आप्यी. 6 तिहींइं ते पोड़दा पांडा आन निल्ला हुतोअ ओता, आन हाजा हुतोअ आन जामण्या रंगोअ खोड़ा वाअहीं सांदीइ आकड़ामेहें, मारबलोअ खांबोअरी ते पोड़दा बांद्याते; आन तिहींइं ते कोड़ीमेहें होना-सांदीइ ओती; आन लाल, पांडा, पिवला आन काल्ला मारबलोअ बोणल्यी फरशीपोअ मिकल्ये ओते. 7 तियी पांगातीमेहें होनाआ रासोमेहें राजाआ लायकीइ बातीवानीइ दाराक्शाआ रोहो पोइत कोइत राजाआ ओलवायी वाअहीं पोटे तेतुहू पिवाड़तेते. 8 पीइलाआ ते नियमोअ पुरमाणे रोतोतो, कोडाहा रावणी कोइत ने पिवाड़तेते, काहाके राजा राजवाड़ा मेर्‍याआ आखा वाटीणक्याहा आदेश आप्युतो, के हारेक पावणो तियाहा पोटे तेतोहो पीत सेके.

9 वशती राणी बी अश्वेरोश राजाआ राजवाड़ामेहें बोईंहीं पांगात आप्यी.

10 सांतवा दिही, जेहेलाम राजा दाराक्शाआ रोहो पिइलाआ धुंदेम ओतु, ताहां अश्वेरोशे महूमान, बिजता, हार्बोना, बिकता, अबगता, जेतेर आन कर्कस नावोअ हाँतू तियाआ खाजगी सिपायड़ाहा* हादे तेहें काजे तियाआ साकर्‍याहां आदेश आप्यू, 11 के वशती राणीही राजमुकुट पोवतीज कोइत राजाआ सामने लेत आवुहूं जोवे; जिहीं वाअहीं देसो देसोअ माअहें आन आधिकार्‍योअ आगाड़ी ते तियीइ रुप देखाड़े; काहाके ते देखाइलाम जाअखी भारी ओती. 12 पोन सेवकोवाअहीं राजाअ ओ आदेश होंबलीत कोइत वशती राणी आविइलोअ नाकार आप्यु. यी गोठी वाअहीं राजाहा जास्ती खोत लागी.

13 ताहां राजा जाणकारोहों आन सल्लाकारोहों हादाड़ीत फुशो— राजा ते निती आन न्यायोअ आखा जाणकारोअरी एहेलोज कोअया कोअतुतो. 14 तियाअरी कर्शना, शेतार, अदमाता, तार्शीश, मेरेस, मर्सना, आन ममूकान नावोअ फारस आन मादी मेर्‍याआ हांत आधिकारी ओता, जे राजाहा आमने-सामने मिलताते, आन राज्यामेहें मुख्य मुख्य पदोपोअ निवड़ीत मिक्याते. 15 राजा तियांहां फुशो, "वशती राणी राजा अश्वेरोशे सेवकोवाअहीं आपल्यू आदेश नाहां मान्यी, ताहां कायदाआ पुरमाणे तियीइरी की वेवारो कोअहूं जोवे?"

16 ताहां राजाहा आन आखा मंत्र्योअ सामने ममूकाने उत्तर आप्यो, "वशती राणी जो अपमान कोअयुहू, तो निस्तु राजाआ एतुज नाहां, पोन आखा मंत्र्योअ आन आखा देसोअ माहुंउं बी जें राजा अश्वेरोशोअ आखा प्रान्तामेहें रोतेहे. 17 काहाके अश्वेरोश राजा वशती राणीही तियाआ सामने लेत आवीइलोअ आदेश आप्यू, पोन ते ने मान्यी, ए गोठ आखी बोईं उनाइत लेय, ताहां ते बी जिवज्योअ माट्योहो कमी समजी वोले. 18 आज्याआ दिही फारसी आन मादीवाला देसोअ मंत्र्योअ बोईं बी राणीइ ए गोठ उनाअयीही, ते बी जिवज्योअ माट्योअरी एंहेंज कोइ वोले: एहें कोइत माट्योहो तियीं बोईं पोअ जास्ती खोत लागी वोले. 19 जर अश्वेरोश राजाहा ए गोठ स्विकार ओय, ताहां वशती राणी राजाआ सामने फाश्यीइ जोलोम ने आवुहूं जोवे, एहेलोहो मादीइ देसोम आन फारसीइ कायदामेहें लेखाअहूं जोवे, आन ओं केदिहीं ने बोदलाअहूं जोवे, आन राणीइ पद एखी बिहीरी राणीहीं आपुहूं जोवे, जे तियीइ रोत बाहरी ओय. 20 जेहेलाम राजाआ ओ आदेश पुरा राज्याम पुकारु ओत जाय, तेहेलाम आखी बोईं जिवज्योअ माट्योअ तियाआ मानपान कोअती रोय, तो गरीब रोय नेत मालदार रोय."

21 ए गोठ राजाहा आन मोंत्र्योहों गोम्यी आन राजा ममूकानोअ गोठीपोअ राजी ओवू आन तियाआ आखा राज्यामेहें, 22 मोन्ज्ये आखा प्रांताआ आक्शरोमेहें आन आखी जातीइ बाशामेहें सिट्टी मोकल्यी, के आखा माटी जिवज्योअ कोअमेहें आधिकार सालाड़ुहूं जोवे, आन सोताआ बाशा गोग्या कोअहूं जोवे.