1 यी गोठीइ फासाड़ी अश्वेरोश राजे अगागोअ कुटूंबाआ हम्मदाताआ पोर्‍यु हामानोहो उसा पदोपोअ नेमी देदू. 2 राजवाड़ाआ बाओपोअ रोनारा राजाआ आखा सेवक हामानोहो नमस्कार कोअताते, काहाके राजा तियाआ बाप्तिम तेहेलुज आदेश आप्युतो; पोन मोर्देखाय नमस्कार ने कोअतुतो आन पागे बी ने पोड़तुतो. 3 ताहां राजाआ सेवक जे राजवाड़ाआ बाओपोअ रोताते, तियां मोर्देखायोहो फुशो, "तु राजाआ आदेश काहा नाहां मानतु?" 4 ते तियाहा दाड़ीइज एहेंज कोता रोया, पोन तो तियांआं ने होंबल्यू, ताहां मोर्देखायोअ ए गोठ हामानोहो साले के ने कोत पालीइलोअ विसारो वाअहीं तियां हामानोहो कोत देदो; काहाके तिये तियांहां आंय यहुदी होय एहें कोत देदोतो. 5 मोर्देखाय तियाहा टुंगू पोड़ीत पागे नाहां पोड़तू एहलोहो हामाने पाल्यो, ताहां तियाहा जाअखीलिही खोत लागी. 6 तिये निस्त मोर्देखायोपोअ एतोज आथ टाकीइलोअ ठिक ने समज्यो. काहाके मोर्देखाय काअली जातीइ होय तों तियां हामानोहो कोत देदोतो; तिहीं वाअहीं हामाने अश्वेरोशोअ राज्याम रोनारा आखा मोर्देखायोअ माअहुंहूं आन आखा यहुदीही आरवीत टाकीइलोअ कदर काड्यी.

7 राजा अश्वेरोशोअ बारावा वोरहोअ निसान नावोअ पेहला मोयनाम रोत तियां हामानोअ सामने सिट्टी* टाकुहूं लागाड़्यी. एहें कोइलोअ तियां मोयना डिठ अदार नावोअ बारावू मोयनू सेलाय ताअहूं जाआं सालुज मिक्यो.

8 ताहां हामाने राजा अश्वेरोशोहो कोयो, "ताआ राज्याआ आखा प्रान्तामेहें रोनारे देसो देसोअ माअहोंअ विसमेहें वेरासेर ओत कोइत रोनारे एकी जातीइ माअहें होय, तियांआं कायदा बाकी माअहोंअ कायदा रोत जुदाज होय; आन तें राजाआ कायदाआ पुरमाणे नाहां सालते, तियाहा कोत तियांहां रोअहूं देअलो राजाआ कोअते फायदाआ कायनाहा. 9 जर राजाआ मोर्जी ओय ताहां तियांहां आरवीइलोअ आदेश काडुहूं जोवे, आन आंय राजभांडारोम दोह हाजार किक्कार सांदी राजाआ कारभार्‍योअ आथोम आपीहीं."

10 ताहां राजा तियाआ मुंदी तियाआ आथोम रोत काडीत कोइत, अगागी हम्मदाताआ पोर्‍यु हामानोहो, जो यहुदीइ दुस्मोन ओतु तियाहा आपी देदी; 11 आन राजा हामानोहो कोयो, "सांदी ताहूं आप्यीही, एं माअहें बी ताआ आथोम होय, तियांअरी ताहूं पोटे तेहें कोअ."

12 तिया पेहला मोयनाआ तेरावा दिहोहो राजाआ लेखार्‍या हाद्या, आन हामानोअ आदेशोअ पुरमाणे राजाआ आखा कारभारी, आन आखा प्रान्ताआ मुख्यू, आन देसो देसोअ माअहोंअ मोंत्र्योंअ कोअते सिट्टी एकेकाआ राज्याआ बाशामेहें, आन एकेक देसोअ माअहोंअ बाशामेहें राजा अश्वेरोशोअ नावो वाअहीं लेखाअयी; आन तियामेहें राजाआ मुंदीइ सिक्कु लागाड़्यु. 13 राज्याआ आखा प्रान्तामेहें तिरवाश्या वाअहीं सिट्टी मोकल्यी एकेज दिही मोन्जे अदार नावोअ बारावा मोयनाआ तेरावे दिही जुवान, डाया, बोईंन पोर्‍ये एहला आखा यहुदी माहुंहूं माइत टाकुहूं जोवे, आरवुहूं जोवे आन तियांआं मालधन लुटीत लेअहूं जोवे. 14 तिया आदेशोअ लेखल्या पत्राआ नकल आखा प्रान्तामेहें कायदु कोत आप्यी, आखा देसोअ माअहें तेदिहीं काजे तियार रोअहूं जोवे.

15 तिया आदेशपत्राआ एकेक नकल शूशन राजधानीम आप्यी, आन तिरवाश्या राजाआ आदेशो वाअहीं ताबुड़ निहींत गोया. राजा आन हामान पिअहूं बोहीत गोया; पोन शूशन होयरोमेहें बिक पसरीत गोयी.