1 जाहां माअहें धरतीपोअ जाअखे वादे वोल्ये, आन तियांआं पोर्‍यी उबज्यी, 2 ताहां देवोअ पोर्‍या माअहुंउं पोर्‍यीही पाल्यो, के ते बाहरी एतीज होय, आन तियां जे जे गोम्यी तियींइरी वेहेवाल कोइत लेदो. 3 ताहां यहोवा देवे कोयो, "माआ आत्मा माअहूं मेहें सादा रोनारु कायने; काहाके माअहुंउं निस्त डील होय; तियाआ जिवनोअ दोरी एक होव विही वोरह्योअ रोय." 4 तियां दिहोमेहें धरतीपोअ राक्सेस*6:4 राक्सेस मोन्ज्ये, नपीली माअहें रोताते; आन याअ फासाड़ी जाहां देवोअ पोर्‍या माअहुंउं पोर्‍यीइरी गोया, ताहां तियां वाअहीं जे पोर्‍या उबज्या ते बाहादीर ओवताते, जियांआं कामे जुना वाडोम रोत गाजीत रोयेहे.✝6:4 गणती 13:33

5 यहोवा देवे पाल्यो के माअहुंउं पाप धरती पोअ वादीत गोयुहू, आन तियांआं मोनोअ जे बी विसार रोताहा, ते कायम खाराबुज रोताहा.✝6:5 लुक 17:23; मत्तय 24:37; लुक 17:20; 1 पेत्र 3:20 6 आन यहोवा देवे धरती पोअ माअहुंहूं बोणावीत कोइत फासताअयू, आन तियाआ मोनोम खुब खाराब हासवाअयो. 7 ताहां यहोवा देवे कोयो, "आंय बोणावल्या या मोनवीही धरतीपोअ रोत आरवीत टाकीहीं; माअहें, जनवारे, होरतींडनारे जिवतोर, आन जुगोमेएं सिड़े, यां आखाहा आरवीत टाकीहीं, काहाके आंय यांहां बोणावीत फासताअहो." 8 पोन यहोवाअ मेरवानीइं नजर नोहापोअ टिकीत रोयी.✝6:8 मत्तय 24:37; लुक 17:26; 1 पेत्र 3:20

9 नोहाआ पारवाड़ ए होय. नोहू धर्मी माटी आन तियाआ वेलेए माअहूंमेहें खोरु ओतू; आन नोहू देवोअरीज आरी आरी सालतु रोयू.✝6:9 2 पेत्र 2:5 10 आन नोहापरोत शेम, आन हाम, आन येपेत नावोअ तिन पोर्‍या उबज्या. 11 तियी होमसे धरती देवोअ नजरेम बिगडीत गोयीते, आन तारासो वाअहीं पोआइत गोयीते. 12 आन देवे धरतीपोअ नजर टाक्यी ताहां की देख्यो के ते बिगडीत गोयीही; काहाके आखे जनवारे धरतीपोअ तियां तियांआं वेवारो बिगाड़ीत लेदोतो.

13 ताहां देवे नोहाहा कोयो, "आखा जनवारोहो आरवीइलोअ प्रश्न माआ सामने आयोहो; काहाके तियांआं वाखरी धरती तारासो वाअहीं पोआइत गोयीही, तियाहा काजे आंय तियांहां धरतीइ आरीज आरवीत टाकनारु. 14 तियाहा काजे तू गोफेर साड़ोअ लाकड़ाआ एक जाहाज बोणावीत ले, तियामेहें खुल्यी बोणावजी, आन मायते-बारथे तियीपोअ डांबर्‍यो लागाड़जी. 15 एहें कोइत तू तियाहा बोणावजी: जाहाज तिन होव आथ नांबी, पोन्नास आथ पोली, आन तीस आथोअ उसी लेजी. 16 जाहाजेम एक खिड़की बोणावजी, आन तियीइ मोब एक आथ उसे रोत बोणावजी, आन जाहाजीइ एकी वोग एक बाआ मिकजी; आन जाहाजीम पेहली, दुसरी, तिसरी माली बोणावजी. 17 आन उनाआ, आंय सोताहा धरतीपोअ पाईं पाडीत कोइत आखा जनवारोहो, जियांमेहें जिवनोअ जिव होय, जुगोअ निसे रोत आरवुहूं कोअहो; आन आखे जे धरतीपोअ होय ते मोइत जानारे. 18 पोन ताअरी आंय शप्पत लेहो; तियाहा काजे तू ताआ पोर्‍या, बोईं, आन वोवड़ीह्हीइ आरी जाहाजेम फोहजा. 19 आन आखा जिवता जनवारोमेर्‍येए तू एकेक जातीइ नर-मादा जाहाजीमेहें लेत जात कोइत तुमाअरी जिवते मिकजा.✝6:19 इब्री 11:7 20 एकिकी जातीइ सिड़े, आन एकिकी जातीइ जनवारे, आन एकिकी जातीइ पुंयीपोअ होरतींडनारे जिवतोर, तू तियांहां जिवते मिकीत सेके तेहें काजे आखामेर्‍येए बेन बेन ताआ जागे आवे. 21 आन राज्या राज्यामेहें ओन जों खातेहे, तियांहां तू लेत कोइत ताआ जागे टोलू मिकजी; जो ताआ आन तियांआं खाअलोअ काजे रोय." 22 देवोअ या आदेशोअ पुरमाणे नोहे कोअयो.✝6:22 इब्री 11:7