Arca de noé
A arca de Noé é história de salvação e fidelidade. Deus instruiu Noé a construir a arca para salvar sua família e os animais do dilúvio — exemplo supremo de obediência e fé.
तेखअ बोलअ बिधाता नूहा लै इहअ, "मंऐं हेरअ ऐबै सोठी कि मुंह करनै संसारे सोभै पठी मारी हक्क, किल्हैकि संसारै भर्हुअ पाप अर सोभ लोग आसा कदुष्ट कामां दी लागै दै।
"ऐबै कर तूह इहअ, सरुए बूटे बधिया काठा करै बणाऐं एक ज़हाज़, भितरी बणाऐं तेथ पांडा संघा लेस्सै तेता बागा-भितरा संघी केल़ुईए सेल्हरै करै। तेता बणाऐं तूह एक शौ तेत्ती हाथ लाम्मअ, बाई हाथ बिरलअ अर तेर्हा हाथ उछ़टअ।
"ज़हाज़ा दी बणाऐं एक ताक्की, अर तेता का एक हाथ उझै का पाऐ छ़ाप्पर, अर एकी बाखा डाहै तेथ दुआर, भितरी बणाऐं तेथ चअन पांडा।
बिधाता बोलअ नूहा लै, "आपणैं सोभी टबरा संघी डेऊ ज़हाज़ा भितरा लै, किल्हैकि मुखा शुझुअ सारै संसारै तूह एक्कै मणछ धर्मीं।
ज़धू पाणींए प्रल़या का बच़णा लै नूह ज़हाज़ा भितरा लै डेऊअ, तधू थिई तेऊए अमर छ़ह शौआ साले। ज़िहअ बिधाता तेऊ लै बोलअ त, तेऊ किअ तिहअ ई। तेऊ निंयैं आपणीं लाल़ी, शोहरू अर नुशा बी आप्पू संघै ज़हाज़ा भितरा लै।
तेखअ ज़िहअ बिधाता बोलअ त, तेते ई साबै निंयैं नूहै शुचै अर छ़ोतलै सोभै पशू, धरतीए होर ज़ीब अर च़ेल्लू-पखीरू नर-मादे साबै आप्पू संघै ज़हाज़ा दी।
साता धैल़ै बाद लागअ ज़ल-प्रल़यो पाणीं धरती प्रैंदै बर्शदअ।
ज़िहअ बिधाता बोलअ त, ज़ांऊं तेऊ साबै सोभ ज़हाज़ा भितरी पुजै, तेखअ बुदरअ बिधाता ज़हाज़ो दुआर।
च़ाल़्ही धैल़ै रहअ धरती दी सरग कबल्लअ धैल़ी-राची हंदअ लागी। सारी धरती रही पाणीं करै भर्हदी लागी, ज़हाज़ रहअ उझै-उझै उझ़दअ लागी, खिरी लागअ ज़हाज़ धरती का पाणीं प्रैंदै तरदअ।
धरती दी ज़ेतरै बी ज़ीब ज़िऊंदै थिऐ, तिंयां हुऐ सोभ मरी खतम! बच़ै सिधै तिंयां हांढणै-फिरनैं आल़ै ज़ीब, च़ेल्लू-पखीरू अर मणछ ज़ुंण नूहा संघै ज़हाज़ा भितरी थिऐ बेठै दै।
एकी शौआ पज़ाह धैल़ी बाद लागअ पाणीं धरती दी कबल्लअ घटदअ।
तैहा साले कातीए भिन्नैं सातुई धैल़ी टेक्कअ ज़हाज़ अरारात धारा प्रैंदै।
च़ाल़्ही धैल़ै बाद खोल्हअ नूहै ज़हाज़ो तीरू संघा छ़ाडअ एक काअ बागा लै, पर सह रहअ डैऊंदअ लागी ज़ेभै तैणीं धरती दी पाणीं शुक्कअ निं।
तेखअ छ़ाडी नूहै एक पालल़ी ताकि थोघ लागे कि धरती दी पाणीं शुक्कअ कि नांईं।
पाणीं थिअ अज़ी बी सारै दी, ज़ांऊं तैहा पालल़ी बेशणा लै किधी ज़ैगा निं भेटी, सह पुजी ज़हाज़ा दी बापस फिरी, नूहै किअ आपणअ हाथ तीरू बागै संघा ढाकी पालल़ी ज़हाज़ा भितरा लै।
साता धैल़ै बाद छ़ाडी नूहै पालल़ी भिई बागा लै।
सान्हां पुजी पालल़ी बापस ज़हाज़ा दी फिरी, च़ुंज़ी आणअ जैतूने बूटा का हरअ पाच। तेखअ हेरअ नूहै ज़ाणीं कि धरती दी गअ पाणीं घटी।
तेखअ न्हैल़ै तेऊ सात धैल़ै होर बितदै, संघा छ़ाडी सह पालल़ी अर ऐहा बारी निं सह बापस फिरी।
नूहे अमर गई ती ऐबै छ़ह शौ एकी साले हई। तैहा साले पैहली धैल़ी मुक्कअ धरती दी पाणीं घटी। नूहै भाल़अ ज़हाज़ो धुंघर घुआल़ी करै कि धरती लागी ऐबै शुक्कदी।
तेखअ बोलअ बिधाता नूहा लै, "ऐबै निखल़ तूह आपणीं लाल़ी अर नुशा-शोहरू संघी ज़हाज़ा का बागा लै।
"इना च़ेल्लू-पखीरू अर सोभी धरतीए सोभी ज़ीबा बी काढ ज़हाज़ा का बागै ताकि ईंयां आप्पू मांझ़ै आपणीं-आपणीं ज़ातीए साबै फल़े-फूले अर सारी धरती दी भर्हिए।"
तेखअ बोलअ बिधाता नूह अर तेऊए शोहरू का, "मेरी आसा तम्हां अर तिन्नां सोभी संघै करार ज़ुंण तम्हां बाद थारी आद-लुआद पृथूई दी ज़िऊंदै रहणैं
"अह करार आसा तिन्नां च़ेल्लू-पखीरू अर सोभी ज़ीबा संघी ज़ुंण ताह संघै ज़हाज़ा का निखल़ै।
"अह करार आसा तम्हां सोभी लै ऐबै एही कि ज़ेतरै बी ज़िऊंदै ज़ीब पृथूई दी ज़िऊंदै आसा लागै दै, तिंयां निं मुंह ऐबै ज़ल-प्रल़या करै खतम करनै।"
तेखअ बोलअ बिधाता, "हुंह करूं तम्हां अर तम्हां संघै सोभी ज़िऊंदै ज़ीबा संघै एक करार, सह रहणीं तम्हां सोभी संघै जुगै-जुगै। सरगे फणैरी ज़ुंण मेरअ मेघ धणश आसा सह हणअ तेतो नछ़ैण।
नूहै किअ परमेशरै खोज़ी दी तिन्नां गल्ला दी विश्वास कि आजू हणीं पाणीं करै प्रल़या ज़ुंण तेऊ ज़मानैं भाल़ी नां हेरी ती। तिन्नां गल्ला दी विश्वास करी बणाअं तेऊ परमेशरे डरा हेठै रही एक बडअ ज़हाज़ ज़ेता करै सह अर तेऊए सारै टबर बच़ै। इहअ करै संसारे होर लोग ज़ुंणी विश्वास निं किअ तिंयां मूंऐं सोभ अर नूह बणअ विश्वासा करै धर्मीं।
ईंयां आसा तिंयां आत्मां ज़ुंणी पैहलै ज़मानैं परमेशरो हुकम नांईं मनअ। ज़धू नूह ज़हाज़ा बणाऊंदअ त लागअ द, परमेशरै किअ सबर अर सह रहअ न्हैल़अ लागी कि तिंयां लोग बदल़े। पर ज़ांऊं पाणींए प्रल़या करै सारअ संसार खतम हुअ, सिधै आठ लोग तै डेऊऐ दै ज़हाज़ा भितरी अर तिंयां ई बच़ै बी।
पराणैं ज़मानैं तिन्नों उद्धार आसा म्हारै उद्धारा लै ऐबै सीख; ज़ेभै हाम्हैं डुबकी लआ। ज़ेऊ पाणीं दी हाम्हैं डुबकी लआ सह निं म्हारी देही का मैल दूर करदअ, सह आसा ऐहा गल्लो नछ़ैण कि हाम्हैं किई सोर समझ़ डाही करै परमेशरा का म्हारै पाप माफ करने अरज़। हाम्हां लै सका माफी भेटी किल्हैकि ईशू मसीहा आसा मरी करै भिई ज़िऊंदअ हुअ द,
अर सह डेऊअ स्वर्गा लै। तिधी आसा सह ऐबै परमेशरे दैहणीं बाखा सोभी का बडी पदबी दी बेठअ द अर सह करा स्वर्ग दूत, प्रधान अर शगती प्रैंदै राज़।
"ज़िहअ म्हारै दाद-बाब नूहे ज़मानैं हुअ, तिहअ ई हणअ मुंह मणछे पूतो फिरी एछणअ बी। किल्हैकि ज़िहै पाणीं करै हुई दी प्रल़या का आजी ज़ेभै तैणीं नूह ज़हाज़ा भितरी नांईं बेठअ, तेभै तैणीं रहै लोग खांदै-पिंदै अर तिन्नां मांझ़ै रहा ती बैह शादी हंदी। ज़ांऊं तैणीं तिंयां पाणींए प्रल़या दी डुबी मूंऐं निं आथी, तेभै तैणीं निं तिन्नां का किछ़ बी थोघ लागअ। ठीक तिहअ ई हणअ तेभै बी ज़ेभै हुंह मणछो पूत फिरी एछणअ। तैहा घल़ी हणअ इहअ कि ज़ुंण दूई ज़ण्हैं खेचै होए, तिन्नां मांझ़ै च़कणअ एक ज़ण्हअ उझै अर एक छ़ाडणअ तिधी। दूई बेटल़ी हणीं थरेटा दी नाज़ा पिशदी, एक च़कणी उझै अर दुजी छ़ाडणीं तिधी।