13 Allahee Nühük’le uvhiyn:

– Yizde ək’elee gırgınçin q’omıd hitxhır. Dyunye manbışde pisvalika gyatsts’ı. Mançil-allab Zı manbı ç’iyeyne aq’vayka sacigee havaakal haa’as. 14 Vas goferne yiveke sa gamı he’e. Ad gozeer hı’ı, adğançed, g’adğançed yivena mızla qabğvee. 15 Gamı inəxüd he’e: mançina xıliyvalla xhebıd vəş (300) xılekkum, əq’valla xhots’al (50) xılekkum, axtıvallab xhebts’al (30) xılekkum vuxhecen*. 16 Gamıyne ooğançe sa xılekkum avud g’uly he’e. Mıgleked akka gixhxhe. Gamıyka avubna, yı’q’nekna, oona mərtaba vuxhecen.

1 Rəbbee Nühük’le uvhiyn:

– Xizanıka sacigee gameeqa ılqeç’e. Yizde ögee, vale qorkuna ine nasılee deşor.

7 Nüh, cuna xhunaşşe, dixbı, sossar sacigee xhyanıke g’attivxhanasdemee gameeqa ılqeebaç’enbı. 8,9 Allahee Nühük’le uvhiyn xhinne, məttın, xhalin həyvanar, şit’yar, gırgın ç’iyeyl hadağvanbı q’öble-q’öblena, vughulynayiy xhuvulyna, Nühüka gameeqa ılqeedaç’enbı. 10 Ç’iye yighne yiğıle q’ıfrımıka qadıyne xhinen alyaat’an.

16 Allahee Nühük’le uvhiyn xhinne, gırgıne həyvanaaşina vughulynayiy xhuvulyna qabı. Manbışiqad qihna Rəbbee gamıyn akka qa’an.

17 Q’ıfrım gibğılıyn yoq’ts’al (40) yiğ ıxhamee, xhyan geed qıxha gamı ç’iyeyle haly’etçuyn. 18 Xhyan geed ooqa ılqeç’e, gamıd xhinene aq’val ı’ğiykar giyğal.

23 Rəbbee ç’iyeyne aq’valin nafas ileşşen gırgın kar hakkal ha’an: insanaaşile otçu, çavra-vəq’ə, hadağvanbı, xəəne şit’yaaşilqamee nafas ileşşen gırgın kar gek’an. Saccu Nühiy mang’uka gameebınbı üç’übba axva.

3 Xhyan ç’iyene aq’vayle ts’ıts’exhxhe giyğal. Vəşşe xhots’alyne (150) yiğıle xhyan k’ıl qexhe. 4 Yighıb’esde vuzane yits’ı yighad’esde (17) yiğıl gamı Araratne suvabışil ulyoyzaran.

6 Nühee yoq’ts’alyne (40) yiğıle vuce hı’iyn gamıyn g’uly aaqı, 7 qən g’avku. Xhyan qeqqvasme, qən ulyooxa, hapk’ın qavayle vuxha. 8 Xhyan ç’iyene aq’vayle ts’ıts’xhay ats’axhxhesdemee, ine yəqqee Nühee qı’nerke* g’uxoole. 9 Qı’nerkeyk’le givxasın ciga iveeke deş, ç’iye xhyanın aqqı eyxhe. Mana Nühüsqa gameeqa siviyk’al. Xıl hotku Nühee qı’nerke avqu, gameeqa abaççe. 10 Yighılle yiğ ılğeç’uyle qiyğa, mang’vee qı’nerke sayib g’ookana. 11 Exhalqana qı’nerke mang’usqa sapk’ılıyng’a, mançe k’uxhee xhınakna zeytunna t’ele avqu vooxhe. Manke Nühük’le ats’axhen, xhyan ç’iyeyne aq’vayle ts’ıts’xha vod. 12 Yighılle yiğ ılğeç’uyle qiyğa, mang’vee sayib qı’nerke g’ookana, mane yəqqee mana mang’usqa siviyk’al deş.

13 Ts’eppiyne vuzane ts’ettiyne yiğıl Nühüne ı’mrene yixhıd vəşşe ts’ettiyne (601) senee ç’iyeylin xhyan qeqqvan. Nühee gamıyn oodun ciga qottulıyng’a, ç’iye qeqqu g’ece.

15 Allahee Nühük’le uvhiyn:

16 – Ğu yiğne xhunaşşeyka, dixbışika, sossaaşika sacigee gameençe qığeç’e. 17 Vaka sacigeedın gırgın nafas ileşşenbı, şit’yar, həyvanar, ç’iyel hadağvanbı g’aqa qığe’e. Hasre ç’iyeyne aq’valqa aykkecen, g’adı geed qeetxhecen.

8 Qiyğa Allahee Nühük’leyiy cune dixbışik’le uvhiyn:

9,10 – Şoqab, şole qihniyne vuşde nasılıqab, gameençe qığeç’uyne gırgıne nafas ileşşençika: şit’yaaşika, çavra-vəq’əyka, çolune həyvanaaşika Zı mugaavile haa’a. 11 Zı şoka inəxübna mugaavile haa’a: sayid inçile qiyğa q’ıfrımıka qadıyne xhyanın ç’iyeyne aq’vayka sacigee nafas ileşşenbı hakkal ha’as deş.

12,13 Allahee uvhiyn:

– Yizda şokana, şoka ıxhayne gırgıne nafas helençika hav’uyne gırgıne gahbışisde mugaavileyn işaara in ixhes: xəybışeeqa gyuvxhuna Yizda xənevur*.

37 Nüh peyğambarne gahıl nəxüdiy ıxha, həməxüdıd İnsanna Dix siyk’almeeyid ixhes. 38 Q’ıfrımıle ögil, Nüh gameeqa ikkeç’esde yiğılqamee, insanaaşe otxhan-ulyoğa, adameeşe xhunaşşer haa’a, yedarıb adameeşis əlyhəə vuxha. 39 Q’ıfrım qabı manbışin gırgınbı vukkeesmee, manbışik’le vuççud ats’a deşdiy. Həməxüdıd İnsanna Dix sak’alasnang’a ixhes. 40 Mane gahıl çolee iş haa’anbışda sa alyart’u, sa g’alerçesda. 41 Yöxxee suk g’iviyxərne q’öne zəiyfayna sa alyart’u, sa g’alerçesda.