Axitofelinniy Xuşayn mısləhətbı
1 Axitofelee Avşalomuk’le eyhen:
– Hasre zı yits’ıq’vəd aazır (12 000) insan g’əyxı', xəmde Davuduqa qihna gixhas. 2 Mana orzul, rı’hı’le g’a’arxhung’a, şi manbışilqa k’yophur mang’una ul qəvəəq’ənaa’as. Manke mang’une k’anebın gırgınbı heepxasınbı. Zınar manke saccu paççah Davud gik’as. 3 Qiyğale gırgın millet zı vasqa sak’al ha’as, istağ tsumaysqa seek’al hee’en xhinne. Gırgınbı valqa savk’lecenva, ğu mana t’abal ha’ana insan gidek’u g’alerçes ıkkan deş. Manke milletıkıd vuççud ixhes deş.
4 Man cuvab Avşalomusud gırgıne İzrailyne ağsaqqalaaşisıd yugda qadayle. 5 Avşalomee eyhen:
– Qudoora, həşde Arkibışda Xuşayır qot’alas, sa mang’vee eyhenıçilid k’ırı alixhxhes.
6 Xuşay Avşalomusqa arımee, Avşalomee mang’uk’le eyhen:
– Axitofelee şas inəxübna mısləhət g’avcu. Şi mang’vee eyhəxüd ha’asee? De’eş, hidya’asxhee, ğu hucoo he’evane eyhe?
7 Xuşayee eyhen:
– Axitofelee həşde huvuna mısləhət yugna deşub. 8 Vak’lecad ats’an, yiğna dekkiy mang’ukan insanar igider vob. Manbı həşde balabı g’ayşu axuyn syobı xhinne vob. Yiğna dek ək’elika siç’ekkvana insan vor, mana mısacar g’oşunne yı’q’nee g’alixhas deş. 9 Mana həşde mağarabışde sançeeye, deşxhee, menne cigeeye dyugulyxha vor. Mang’una g’oşun yiğne eskeraaşilqa ts’eppa k’yophur, ğamuvxhee, man g’ayxhiynbışe eyhesın: «Avşalomuqa qihna apk’ıniynbı avub avxu». 10 Manke aslanaaşin xhinnen yik’bınan igiderıb qəvəəq’ənasınbı. Gırgıne İzrailybışik’lecad ats’an, yiğna dek nəxruna g’oçax ıxhay, cukanbıb nəxbın igider vuxhay.
11 Zı vas inəxübna mısləhət g’ooce: Danile Beer-Şevalqamee17:11 Danile Beer-Şevalqamee: Dan eyhena şahar mane gahıl İzrailyna nekke şimalılna şaharniy vob. Beer-Şeva eyhena şaharmee cühüt’yaaşine sahree, İzrailyna nekke canubulyna vuxha. «Danile Beer-Şevalqamee» İzrailyne k’anençe-qomaqqameeva eyhen ıxha. gırgın İzrailybı deryahne mıglena g’um xhinne vasqa savaalecen. Ğunab yiğne xılen manbı dəv’eeqa vukkee. 12 Mana axvane cigabışde sançee şi mang’ulqa xəənçe ç’iyelqa g’e’exhxhan şeh xhinne k’yooharas. Manar, cukane insanaaşina sacarır üç’ürra g’ılydyaraççe. 13 Mana menne şahareeqa ark’ın ixheene, gırgıne İzrailybışe mane şaharısqa t’ü’ər adı, mana şahar habğı, dameeqa g’a’apçes. Mane şaharıke sa k’ınna g’ayeb g’alepçes deş.
14 Avşalomeeyiy cukane gırgıne İzrailybışe eyhen:
– Arkibışda Xuşayna mısləhət, Axitofelyne mısləhətıle yugba vob.
Məxüd Rəbbee Avşalomne vuk’lelqa ver ablyaa’asdemee, Axitofelyna yugna mısləhət havaakal haa’a.
Xuşayee Davudus xabar hoole
15 Xuşayee kaahinaaşik’le Tsadokık’leyiy Evyatarık’le eyhen:
– Axitofelee Avşalomusiy İzrailyne ağsaqqalaaşis inəxübna mısləhət g’avcu. Zımee manbışik’le inva uvhu. 16 Həşde şu ina xabar ana Davudusqa zaara insan g’axıle. Şu mang’uk’le eyhe: «G’iyna xəm İordanne damayne ine aqval sahree hımaa’a. Damayne şene aq’valqa ılğeepç’e. Deşxheene, paççahır cukan gırgın insanarıb hapt’asınbı».
17 Yonataniy Axima’ats En-Rogelee aaxva vuxha. Sa nukar içee manbışis xabar abayle vuxha, manbışeb mana xabar paççah Davudus hivxhar haa’a vuxha. Manbı şaharee neng’uk’lecab g’avces vukkan deşdiy. 18 Sa gadeyk’le manbı g’ooce, mang’veeyid man hark’ın Avşalomulqa hixhar ha’a. Mançil-allab manbı mançe zaraba qığeepç’ı Baxurimee eyxhene sa adamiyne xaaqa qavayle. Mane adamiyne məhlee kahrız vooxhe. Manbı maqa k’eebaç’e. 19 Mang’une xhunaşşee örtyug alyaat’u kahrızılqa aççu, çilqab xhıt’a gyooka, şavuk’lecad vuççud g’ımececenva. 20 Avşalomun insanar mane xaaqa abı, zəiyfayke qiyghanan:
– Axima’atsiy Yonatan nyaane vob?
Zəiyfee manbışik’le eyhen:
– Damayke ılğeepç’ı.
Mane insanaaşe manbı t’abal haa’a. Vuşucar ivdeykımee, sapk’ıl İyerusalimqa avayk’an. 21 Avşalomun insanar apk’ıniyle qiyğa, Yonataniy Axima’ats kahrızeençe qığeepç’ı, paççah Davudus xabar hevlesva avayk’an. Manbışe mang’uk’le eyhen:
– Oza qeepxhe, damayke zaraba ılğeepç’e.
Manke manbışe Axitofelee uvhiynçina gaf ha’a.
22 Davudıy cun insanar İordanne damayle ılğeebaç’enbı. Miç’eerilqasse damayle ılğıdeç’una sa insan axva deş.
23 Axitofelik’le iş cune mısləhətıka hidyav’u g’avcumee, mang’vee cune əməleys palan ı’xı' cune şahareeqa, xaaqa siyk’al. Mang’vee cune karak hucooyiy ha’as ıkkanvad uvhu, ark’ın vuceecar vuc givayxanna. Mana, cuna dek k’eyxiyne mağaree k’eyxha.
24 Davud Maxanayimeeqa qarayle. Avşalomur cune k’anene gırgıne İzrailybışika İordanne damayle ılğeç’e. 25 Avşalomee, Amasa Yoavne cigeeqa g’oşunbışda xərna giyxhe. Amasa, Yitra donane İzrailyğançeng’una dix ıxha. Mang’una yed Naxaşna yiş Avigailiy yixha. Yoavna yed Tseruya Avigailiynar yiçu yeexhe. 26 Avşalomee İzrailybışika Gilead eyhene cigee çadırbı giyxə.
27 Davud Maxanayimeeqa arayle. Maqa mang’usqa Ammonne Rabba eyhene şahareençene Naxaşna dix Şovi, Lo-Devareençe Ammielyne dix Makir, Rogelim eyhene şahareençe Gileadğançena Barzilay abayle. 28 Manbışe Davudusiy cune g’oşunus doşagbı, k’olabı, nyuq’vneke hı’iyn g’abbı, ooxhanas suk, xhıt’a, urva, qoots’una suk, hüvə, 29 itv, şor, zerane nikneke hı’iyn nisse, vəq’əbı adayle. Manbışisqa məxüd qayle, g’oşun çolee mıssıbaniyxan, obzur, xhyan denamee avxu.