2 Samuel 1

Davuduk’le Şaul qik’uva g’iyxhe

1 Şaul qik’uyle qiyğa, Davud Amalekbışile ğamxha siyk’almee, mana Tsiklageeqa qarayle. Ma’ar mana q’ölle yiğna axva. 2 Xhebıd’esde yiğıl Şaulne zastaveençe sa insan arayle. Mang’vee culqa abına ver haagvasva, tanalinbı qıt’axxa’a, vuk’lelqa nyaq’v k’yaa’a. Mana insan Davudusqana qarı, mang’une ögil ç’iyelqamee k’yoyzarna. 3 Davudee mang’uke qiyghanan:

– Nençene qöö?

Mane insanee eyhen:

– İzrailyne zastaveençe hixu, zıcar zı g’attixhan hı’ı.

4 Davudee mang’uk’le eyhen:

– Maa’ad hucoona ıxha? Hucoona ixhes, zak’le eyhe.

Mane insanee eyhen:

– Eskerar dəv’ə əlyhəəne cigeençe heepxıynbı, con g’ellesınbıb hapt’ıynbı. Şaulıy cuna dix Yonatanıb hapt’ıynbı.

5 Davudee cus xabar abıyne insanıke qiyghanan:

– Şaulıy Yonatan hapt’ıva vak’le nençene ats’a?

6 Mang’vee Davuduk’le eyhen:

– Mane gahıl nəxüdme ıxha, zı Gilboayne suvaliy. Zak’le maa’ar cune nizeyk qirzıl Şaul g’acu. Balkanaaşil aleepxıynbıyiy dəv’əyn daşk’abıd mang’usqayiy hiyxhar. 7 Şaul yı’q’əlqa sak’ı ilyakkımee, zı g’acu mang’vee onı’ıyn. Zı mang’uk’le «Hooyva» uvhu. 8 Mang’vee zake qiyghıniyn: «Ğu vuşune vor?» Zınad mang’uk’le, «Zı Amalekbışda vorva» uvhu. 9 Şaulee zak’le uvhiyn: «Zasqana qıxha, zı gik’e. Zı sakaratee vorna, zas ine ık’arbışike g’attixhanas ıkkan». 10 Zı mançil-alla mang’usqa qıxha, mana g’ik’una. Zak’le ats’anniy, mang’usse avur axuyle qiyğa, ı’mı’r haa’as vəəxəs deş. Qiyğa zı mang’une vuk’lelin taciy xılelin lexa g’ayşu, inyaqa yizde xərıng’unemee, vasqa adı.

11 Man g’ayxhımee, Davudeeyiy cune k’anenbışe ts’ıts’ı’ı colyun tanalinbı qıt’axxa’a. 12 Manbışe Şaulnemee, mang’une dixene Yonatannemee, gırgıne Rəbbine milletnemee exhalilqamee ak' avqu. Manbışe gyaaşe-gyaaşe sivar aqqaqqa, geebınbı gılıncıke alğav’u gyapt’ıva. 13 Davudee, cus mana xabar abıyne mek’vung’uk’le eyhen:

– Ğu nençenane vor?

Mang’vee alidghıniy qele:

– Zı menne cigeençena vor, zı Amalekbışde sang’una dix vor.

14 Davudee mang’uk’le eyhen:

– Nəxürne ğu qı’dərq’ı’n Rəbbee g’əyxı’ng’ulqa gik’asva xıl g’ott’ul? 15,16 Ğu gik’uyna bınah val vob! Ğucad, yiğne ghalika, gardanaqa alyaat’u, «Zı Rəbbee g’əyxı’na paççah gik’uva».

Davudee cune insanaaşina sa qort’ul eyhen:

– Hoora, mana gik’e.

Mang’veeyir ı’xı' mana gek’ana.

Davud Şaulıqayiy Yonatanıqa geşşe

17 Davudee, Şaulneyiy cune dixene Yonatanee ak’ee ina mə’niy qəpqı'. 18 Qiyğab mana «Vukuna mə’niy» Yahudabışik’le xəp quvxheva əmr haa’a (mana mə’niy «Qorkung’une kitabee» opk’un vobna):

19 İzrail, yiğna xəbvalla,

yiğnecab axtıne cigabışee güvk’una.

Nəxbın cehilyar hapt’ıynbı!

20 Filiştinaaşin içer şadmeebaxhecenva,

Sunnat hıdyav’uynbışde içeeşe bayrambı hıma’acenva.

İn Gatee ats’axhxhıma’a,

Aşkelonne şahrabışee mançina hımaa’a.

21 Gilboayn suvabı,

Şolqa çiyiy gyoğıy hasre mexhecen,

Vuşde q’adaalybışee hasre şagavıd ılymaylecen.

Maa’ad cehilyaaşiniy Şaulun g’alxan g’eliqqa huvu,

maa’ad çilqa q’ış qıdyadğu*1:21 Q’ış qıdyadğu: Duşmanın gılınc hitighnecenva, avaala g’alxanbı dəv’əysınbı xhinne qa’ang’a, mançilqa q’ış qadağva ıxha. .

22 Gyapt’ıynbışde ebake,

gucnanbışde tanıke,

Yonatanın vuk yı’q’əlqa siyk’alan deşdiy,

Şaulunıd gılınc idyats’ı qadaylen deşdiy.

23 Şaulıy Yonatan,

şu üç’übnang’a manimee vukkananbı,

yugunbı vuxha. Habat’ameeyib cureepxha deş.

Şu q’aacirıleb ek’ınbı,

Aslanaaşileb gucukanbı vuxha.

24 İzrailin içer, Şaulnemee gyaaşe!

Mang’vee şolqa ç’ərəxən,

gıranın tanalinbıniyxhe alya’anbı.

Tanalinçılqad k’ınəğəyken karbıniyxhe qa’anbı.

25 Siç’ookkane cigee nəxbın cehilyar hapt’ıynbı!

Yonatan şene axtıne tepabışil qik’u.

26 Yizda çoc Yonatan, yiğnemee yizın yik' gyotxhan.

Ğu yizdemee, geer gıranra ıxha.

Yiğın zı ıkkiykıniy,

yedar vukkiykıniyle zı ooqaniy aqqaqqa.

27 Nəxüb cehilyar hapt’ıynbı!

Dəv’əyn silahbıd aguynbı!