2 Samuel 14

Avşalom İyerusalimeeqa siyk’al

1 Tseruyayne dixek’le Yoavık’le ats’anniy, paççahın yik' Avşalomuqa gyotxhan ıxhay. 2 Yoavee Teqoayeeqa insan g’ıxele mançe ats’alynana zəiyfa ayres. Mang’vee arıyne zəiyfayk’le eyhen:

– Hucoona ixhes, ğucar ğu ak' avquyn xhinne heegve. K’aarın tanalinbı ale’e, vuk’lelqa zeytunun q’ış qımadağva, ğucar ğu qik’uyng’unemee geer yiğbına geeşen xhinne heegve. 3 Paççahne k’anyaqa hark’ın, inəxüd eyhe.

Yoavee, paççahık’le hucooyiy eyhesva, xət qa’an.

4 Teqoayeençena zəiyfa paççahısqa ikkeyç’u, mang’une ögee aq’vakk’ena ç’iyelqa gizerçu, eyhen:

– Ay paççah, kumag he’e!

5 Paççahee mang’uk’le eyhen:

– Vak hucoona ıxha?

Zəiyfee eyhen:

– Zalqa yiğ adı, yizda adamiy qik’u. Zı sip’ıriy vorna. 6 Zaqa, yiğne nukarıqa, q’öyre dixniy vor. Sa yiğıl manbışda q’öyre çolee sana-sang’uka aldapxhıninbı. Maa’ar manbı curaa’asda vuşucar ıxha deş. Sang’vee manasa ı’xı' gik’una. 7 Həşde gırgınacab xizan zalqa g’elil quvxha, manbışe eyhen: «Çoc gik’una şasqa qale, şi mana çoc gik’yunçil-alla gik’as. Dekkın kar şavusiy axvas manar gik’as». Manbışe məxüd zaqa vodun-deşin man ts’ünq' q’ətqa’as. Məxüb manbışe ç’iyeyne aqval yizde adamiyke g’abıynbı g’alepçes deş.

8 Paççahee zəiyfayk’le eyhen:

– Xaaqa sayk’le. Zı yiğne hək’ee əmr haa’asda.

9 Teqoayeençene xhunaşşee paççahık’le eyhen:

– Yizda xərna paççah, hasre mançina bınah zalqayiy yizde xizanılqa vuxhecen! Paççahılqayiy cune taxtılqa bınah gyumooxhacen!

10 Paççahee eyhen:

– Şavaayiy vak’le sa cuvab uvhu, mana zasqa ayre. Mançile qiyğa mana vak sayır set’as deş.

11 Zəiyfee eyhen:

– Hucoona ixhes, paççahee, Rəbbilqa, cune Allahılqa k’ın g’aysrecen, şavusqacad yizde dixıke qəl qığaahas havaasaras deşva. Deşxhee, manbışe yizda dix gik’as.

Davudee eyhen:

– Vorne Rəbbilqan k’ın ixhen, yiğne dixene vuk’lele ç’ərıb g’a’avxhas deş.

12 Zəiyfee Davuduk’le eyhen:

– Hucoona ixhes, zasqa sa cuvab eyhes hasre.

Paççahee «Eyheva» eyhe.

13 Zəiyfee eyhen:

– Nya’a manke ğu, Allahne milletne ögil məxbına iş hav’u? Ğu məxüd uvhuyka, valqa bınah qaa’a. Menne cigeeqa hixu ark’ınna yiğna dix ğu vasqa sak’al hı’ı deş. 14 Yişin gırgınbı hapt’asınbı, şi ç’iyelqa ott’ulne yı’q’əlqa sa’as dexhene xhyanık akar. Allaheeyid insanıke ts’ıts’ı’ı can g’eşşe deş, Mang’veeyib Cuke əq’ənaqa girxhuna nəxürne Cus k’ane qa’asva fıkır ooxhan. 15 Zı milletın qı’yeeq’ən hey’ı, çil-allar zı həşde vasqa, yizde xərıng’usqa paççahısqa arı. Yizde fıkreeqa qadıyn: «Hark’ın paççahıka gaf haa’as, sayid mang’vee zı uvhiyn ha’a. 16 Paççahee, zı uvhunçil k’ırı alixhxhı, zınayiy yizda dix, şi gyapt’as vukkanang’une xılençe g’attivxhan haa’a. Məxüb şi Allahne milletne yı’q’neençe hakkal hidyaa’a». 17 Mançil-alla zı məxüd uvhu: «Yizda xərna paççah, sa cuvab eyhe, yizın yik' cigeeqa qoracen». Vasse Allahne malaaikısse xhinne yugun pisınçike cura’as əxən. Hasre Rəbb, yiğna Allah, vas kumagxhecen!

18 Paççahee zəiyfayk’le eyhen:

– Zı vake sa cuvab qiyghanas, mançin alidghıniy zake dyugul hıma’a.

Zəiyfee eyhen:

– Yizda xərna paççah, hucoona ixhes qiyghne.

19 Paççahee qiyghanan:

– İne yiğne işee Yoavna xılyne alivku vob?

Zəiyfee alidghıniy qele:

– Yizda xərna paççah, valqan k’ın ixhen, şavussecad val k’ırı ilydiyxhı t’ub cigeençe ı’ğviykar haa’as vəəxəs deş. Ho’o, yiğne nukaree Yoavee zas əmr hav’u, zı hucooyiy eyhes ıkkanvad, mang’vee xət qı’ı. 20 Məxüd yiğne nukaree Yoavee mana iş qa’asva hı’ı. Yizde xərıng’una paççahna ək’el, Allahne malaaikna ək’elymee geeb vob, mang’uk’le dyunyel eyxhen gırgın ats’an.

21 Paççahee Yoavık’le eyhen:

– Ho’o, zı man kar ha’asın. Hoora, şena mek’vna Avşalom yı’q’əlqa sak’al he’e.

22 Yoav aq’vakkena ç’iyelqa gizerçu, «Ğu paççah geer qa’anava» uvhu. Qiyğa Yoavee meed eyhen:

– G’iyna paççahee, cune nukaree uvhiyn hı’ı. Həşde zak’le, yiğne nukarık’le, ats’axhxhayn, vasqa zı yugra qarı ıxhay.

23 Yoav Geşureeqa hark’ın, Avşalom İyerusalimeeqa sak’al ha’a. 24 Paççaheeme eyhen:

– Hasre mana cune xaaqa sak’lecen, yizde ulesqa qımaylecen.

Avşalom cune xaaqa siyk’al, mana paççahne ulesqa qarayle deş.

Davudee Avşalom cusqa qoyt’al

25 İzrailyvolle Avşalom xhinne micagna adameeşina insan ıxha deş. Gırgıng’us mana ıkkan ıxha. Vuk’lele kıts’alqamee mang’uqa qəlan ciga ıxha deş. 26 Senıs, ç’ərbışe mang’us yı’q’valla haa’ava, mang’vee manbı gyadaxa ıxha. Qiyğad g’apanıl gyoodkumee, q’öd vəş (200) şekel*14:26 Q’öd vəş şekel: 2 kileyle geed ıxha. qadayle ıxha. (Şekel paççahee gixhxhiyn standart ıxha.)

27 Avşalomuqa xhebiyre dixiy Tamar donana sa yiş yixha. Tamar geer micagna içiy yixha.

28 Avşalom q’ölle senna İyerusalim axveeyir, mang’uk’le paççahın aq’va g’ece deş. 29 Avşalomee Yoavıqar qihna insan g’ıxele. Avşalomus ıkkananniy, Yoavee vuc paççahısqa ıkkı. Yoavıs mang’une k’anyaqa ayres ıkkiykan deş. Avşalomee q’ör’es Yoavne k’anyaqa insan g’ıxele. Mang’us meer mang’une k’anyaqa ayres ıkkiykan deş. 30 Avşalomee manke cune nukaraaşik’le eyhen:

– İlyaake, Yoavın xhıt’anan çol yizde çoluk at’itq’ın vod. Hapk’ın, maqa ts’a ı’xe.

Avşalomne nukaraaşed hapk’ın, maqa ts’a ı’xiyxən.

31 Manke Yoav Avşalomne xaaqa arı, qiyghanan:

– Nya’a yiğne nukaraaşe abı, yizde çolus ts’a ı’xı'?

32 Avşalomee Yoavık’le eyhen:

– Zasqa ayreva zı yiğne k’anyaqa insan g’axuvu. Eyhelan zak’le, zı inyaqa Geşureençe nişisniy qarı? Zı şaacar axunaxhiy inçile nimeexheyid yugda eyxheyiy. Hasre zak’le paççah g’aces. Zaqa bınah vobxhee, gik’ecen.

33 Yoavee hark’ın, man gırgın paççahılqa hixhar ha’an. Paççaheeyir Avşalom cusqa qoyt’al. Avşalom paççahısqa arı, mang’une ögil aq’va ç’iyek qet’asmee k’yoyzarna. Paççahee mang’us ubba ha’a.