2 Samuel 2

Davuduke paççah ha’a

1 Sabara gah ılğevç’uyle qiyğa, Davudee Rəbbike qiyghanan:

– Zı Yahudayne nenemecar şahareeqa hak’nene?

Rəbbee eyhen:

– Hak’ne.

Davudee qiyghanan:

– Nyaqane hak’ne?

Rəbbee eyhen:

– Xevroneeqa.

2 Davudur maqa cune q’öyursana xhunaşşeyka hayk’anna: İzre’elyğançena Axinoamır, Karmelyğançena Navalna sip’ıriy Avigailer. 3 Davudee cukan insanarıb cone xizanbışika Xevronqa qabı, mançine hiqiy-allane şaharbışee manbışis aaxvasın cigabı hele. 4 Yahudayeençen insanar abı, Davudulqa q’ış qadğu, maa’ar mang’uke Yahudayne nasılına paççah ha’a.

Maa’ad Davuduk’le uvhumee, Şaul Gileadeene Yaveşne milletın k’eyxhıva, 5 Davudee maqa cun insanar g’uxoole. Mang’vee cune insanaaşik’le eyhen:

– Maane milletılqa in yizın cuvab hixhar he’e: «Rəbbee şos xayir-düə hevlecen, vuşda xərna eyxhene Şaulus, şu yugvalla hav’u, mana k’eyxhıva. 6 Hasre mane vuşde işil-alla Rəbbee Cuna badaldyooxhena yugvalla şos haagvecen. Zınad mane vuşde işil-alla şos yugun ha’as. 7 Vuşda xərna eyxhena Şaul qik’uva şu həşde xıleppı avqa qıma’a, it’umba ulyoozre. Yahudayne nasılen, cosda paççah zake hı’ı».

Şaulna dix İşboşet İzrailyna paççah ıxha

8 Şaulne g’oşunbışde q’oma ulyorzulyung’vee Nerne dixee Avneree, Şaulna dix İşboşet cukasana Maxanayimeeqa qıkkı ıxha. 9 Maa’ar Avneree mana Gileadne, Aşuriyne, İzre’elyne, Efrayimne, Benyaminne cigabışee vooxhene insanaaşde – gırgıne İzrailyna paççah ha’a.

10 Şaulne dixeqa, İşboşetıqa, İzrailyna paççah ıxhayng’a yoq’ts’al (40) senniy vod. Mang’una paççahiyvalla q’ölle senna ts’ıts’avxha. Yahudayne nasılınmee, Davudun sura aqqı ıxha. 11 Davudee Xevronee, Yahudayne nasıles paççahiyvalla yighılle sennayiy yixhıble vazna hav’u.

İzrailnayiy Yahudayna dəv’ə

12 Yiğbışde sa yiğıl Nerna dix Avner, Şaulne dixene İşboşetne insanaaşika Maxanayimğançe Giveoneeqa hayk’an. 13 Tseruya donane zəiyfayna*2:13 Tseruya donana zəiyfa: mana Davudna xını yeexhe. dix Yoavmee, Davudne insanaaşika Giveonusneene xhyan sadıyne cigaysqa, manbışde ögilqa qığeç’e. Yoav cune insanaaşika xhyan sadıyne cigayne sa aq’val, Avnerır cune insanaaşika – manisa aq’val giy’ar. 14 Avneree Yoavık’le eyhen:

– Havaasre mek’vunbı suğootsu, yişde ögil saç’ivkvecen.

Yoaveeyid eyhen:

– Havaasre saç’ivkvecen.

15 Şaulne dixene İşboşetne sural sıç’ookvan Benyaminaaşin mek’vunbı qəpqı’mee, yits’ıq’vəyre (12) insan eyxhe. Davudne suraler yits’ıq’vəyre eyxhe. 16 Manbışe sana-sananbı vuk’ulbışike avqu, gılıncbı hiyxə. Manbışin gırgınbı habat’anbı. Mançil-allad Giveoneene mane cigayk’le Xelqat-Hatsurimva (Gılıncbışin çol) eyhe.

17 Mane yiğıl ma’ad geed it’umın saç’ikkvuy ıxha. Avneriy İzrailybı, Davudne insanaaşis maa’ab avub avxu.

18 Tseruya donane zəiyfayna xhebırsana dix: Yoav, Avişay, Asahelib maa’ab vooxhe. Asahel, çolana ceyran xhinne, g’elike ek’ra ıxha. 19 Mana neng’uqacar ilydyakkı, Avnerıqa qihna girxhu. Mang’uqar qihna g’adayxhvanmee, 20 Avner yı’q’əlqa ilyakkı, eyhen:

– Asahel, ğune vor?

Mang’vee eyhen:

– Ho’o, zı vorna.

21 Avneree mang’uk’le eyhen:

– Yiğne sağıqa, soluqa sa ilekke. Mane mek’vunbışda sa aqqı, manbışin silahbı g’ayşe.

Asaheleemee Avnerıke xıl ts’ıts’a’a vuxha deş.

22 Avneree, Asahelik’le meed eyhen:

– Zaqar qihna gimexha, zake xıl ts’ıts’ee’e! Nişil-allane zı ğu gik’as? Qiyğa zı yiğne çoçune Yoavne aq’veeqa nəxürna ilyakkas?

23 Asahelee meeb mang’uke xıl ts’ıts’aa’a deş. Manke Avneree cun nize alyat’u, cık’rıhiyna mang’une vuxhnelek’ena məxüd ı’xiyxə, cık’rı*2:23 Cık’rı: man cık’rı yı’q’əled ek’ı’ı ıxha. mang’une yı’q’ək ciga hı’ı qığeç’e. Asahel qukkyorkul cigeecar qek’ana. Mançile qiyğa Asahel qik’uyne cigaysse ı’lğən gırgınbı, maa’ab ulydyobzur ılğeebaç’e vuxha deş. 24 Yoaviy Avişay Avnerıqa qihna g’adaaxhvan. Verığ k’yooçemee, manbı qabı hiviyxharanbı Giveonne sahrayne yəqqı’lyne Giahne ögilyne Ammava eyhene tepalqa. 25 Benyaminaaşinbı Avnerne hiqiy-alla savayle. Qiyğab apk’ın, sa tepayne q’omaqa ılqeepç’ı, maayib ulyoozaranbı. 26 Avneree ts’irıka Yoavık’le eyhen:

– Şi mısılqameene gılıncıke hapt’as? Nya’a, vak’le ats’a dişdiy, nekke qiyğa yugdacad ixhes deş? Ğu yiğne insanaaşik’le mısane eyhes, cone çocaaşiqab qihna gimabak’va?

27 Yoavee eyhen:

– Vorne Allahılqa k’ın ixhen, ğu manva ittevhuynxhiy, yizın insanar cone çocaaşiqa qihna miç’eebilqamee gyapk’asınbıniy.

28 Qiyğa Yoavee şeypur əlüvxümee, manbışin gırgınbı ulyoozaranbı. İzrailybışiqa qihna gyapk’iy ç’əvə’ən, manbışika sayib sıç’ookka deş. 29 Avneriy cun insanar xəmvolle Arava eyhene q’adaalilek’ena avayk’an. Manbı İordanne damayle ılğeepç’ı, Bitronulek’ena qabı, Maxanayimeeqa hiviyxhar. 30 Yoavee, Avnerıqa qihna girxhuy ç’əv hı’ı sark’ılymee, cuna g’oşun sa’a. Asahelıle ğayrı Davudne insanaaşike yits’ıyüç’ər (19) insan hiyxhar deşiy.

31 Davudne insanaaşemee, Benyaminaaşina, Avnerne insanaaşina, xhebıd vəşşe yixhts’al (360) insan gek’a. 32 Asahel Bet-Lexemqa qıkkı, cune dekkına nyaq’vanane mağaree k’eyxha. Yoaveeyiy cune insanaaşe xəmvolle yəq avayk’an, miç’eebiys manbı qabı Xevronqa hiviyxhar.