1 Allahee Nühür, Nühüka gameedın gırgın çolun həyvanar, çavra-vəq’ə yik’el qalya’an. Allahee ç’iyeyne aq’valqa ablyav’uyne mıtsıka xhyanbı k’ıl qeedaxhe giyğal. 2 Allahee k’oralybıyiy xəən g’uleppı ut’uma’anbı, gyoğiy ulyoyzaran. 3 Xhyan ç’iyene aq’vayle ts’ıts’exhxhe giyğal. Vəşşe xhots’alyne (150) yiğıle xhyan k’ıl qexhe. 4 Yighıb’esde vuzane yits’ı yighad’esde (17) yiğıl gamı Araratne suvabışil ulyoyzaran.

5 Yits’ıd’esde vuzalqame xhyan k’ıl qexhe. Yits’ıd’esde vuzane ts’ettiyne yiğıl suvabışin vuk’ulybı g’ece giyğal. 6 Nühee yoq’ts’alyne (40) yiğıle vuce hı’iyn gamıyn g’uly aaqı, 7 qən g’avku. Xhyan qeqqvasme, qən ulyooxa, hapk’ın qavayle vuxha. 8 Xhyan ç’iyene aq’vayle ts’ıts’xhay ats’axhxhesdemee, ine yəqqee Nühee qı’nerke* g’uxoole. 9 Qı’nerkeyk’le givxasın ciga iveeke deş, ç’iye xhyanın aqqı eyxhe. Mana Nühüsqa gameeqa siviyk’al. Xıl hotku Nühee qı’nerke avqu, gameeqa abaççe. 10 Yighılle yiğ ılğeç’uyle qiyğa, mang’vee qı’nerke sayib g’ookana. 11 Exhalqana qı’nerke mang’usqa sapk’ılıyng’a, mançe k’uxhee xhınakna zeytunna t’ele avqu vooxhe. Manke Nühük’le ats’axhen, xhyan ç’iyeyne aq’vayle ts’ıts’xha vod. 12 Yighılle yiğ ılğeç’uyle qiyğa, mang’vee sayib qı’nerke g’ookana, mane yəqqee mana mang’usqa siviyk’al deş.

13 Ts’eppiyne vuzane ts’ettiyne yiğıl Nühüne ı’mrene yixhıd vəşşe ts’ettiyne (601) senee ç’iyeylin xhyan qeqqvan. Nühee gamıyn oodun ciga qottulıyng’a, ç’iye qeqqu g’ece.

14 Q’öb’esde vuzane g’ayi yighad’esde (27) yiğıs, ç’iye bıkırda qeqqvan.

15 Allahee Nühük’le uvhiyn:

16 – Ğu yiğne xhunaşşeyka, dixbışika, sossaaşika sacigee gameençe qığeç’e. 17 Vaka sacigeedın gırgın nafas ileşşenbı, şit’yar, həyvanar, ç’iyel hadağvanbı g’aqa qığe’e. Hasre ç’iyeyne aq’valqa aykkecen, g’adı geed qeetxhecen.

18 Nüh cune xhunaşşeyka, dixbışika, sossaaşika sacigee gameençe qığeç’ena. 19 Gırgın həyvanar, hadağvanbı, şit’yar, ç’iyene aq’valin nafas ileşşen gırgın kar çika sacigeedınçika gameençe qığeç’e.

20 Nühee Rəbbis q’urbanbı allya’an ciga alya’a. Mançil mang’vee gırgıne məttıne həyvanaaşike, şit’yaaşike, gyooxhan ha’an q’urbanbı alya’a. 21 Mançin yugun eva Rəbbis ı’xı’mee, Mang’vee cune yik’ee inəxüd uvhu:

– K’ılybanançile otçu insanaaşin fıkırbı yugunbı eyxhe deş. Manbışil-alla sayib ç’iyeys bed-düə haa’as deş. Həşde hı’iyn xhinne, gırgın nafas ileşşenbı hakkal ha’as deş.

22 Dyunye ıxhaylette,

Ezuy-qiyşılıy, g’üməəla-mık’aala,

G’ı’l-q’ı’dı’m, xəm-yiğ

Ç’əvxhes deş.