Gênesis 20

İbrıhımiy Avimelek

1 İbrıhım mançe Negevne cigabışeeqa ayk’an. Mana Qadeşneyiy Şurune yı’q’nee axva. Qiyğa mana sabara gahna Gerar eyhene şaharee axva. 2 İbrıhımee maa’ad cune xhunaşşeyne Sarrayne hək’ee «İna yizda yiçu vorva» uvhu. Gerarne paççahee, Avimelekee, insan g’axuvu, Sarra qiykekkana.

3 Xəmde Allah Avimelekıs gyagu, uvhiyn:

– Qiykiyne xhunaşşeyl-alla ğu qik’asda, mana merıng’una xhunaşşe yixhal-alla.

4 Avimelek məng’ı’k qet’u ıxha deş. Mang’vee eyhen:

– Xudaavanda, nya’a Vasse bınah deşin millet gik’as əxəyee? 5 Mane insanee «İna yizda yiçu vorva» dişde uvhu? Zəiyfee yiceeyid «Mana yizda çoc vorva» uvhu. Zı man kar yik’eene qəlıke deş hı’ı, yizde xıleppışilib bınah deşda.

6 Allahee mang’uk’le nik’ek eyhen:

– Zak’le ats’an, ğu man yik’eene qəlıke deş hı’ı. Mançil-allar Zı vas məng’ı’k xıl set’as hassır deş, Zı ğu bınahıke aqqı. 7 Həşdeme, zəiyfa adamiysqa sayk’al hee’e, mana peyğambar vorna. Mang’vee yiğnemee düə haa’as, ğunar üç’ürra axvas. Ğu mana zəiyfa sayk’al hidey’eene, ğunar, yiğın milletıd aaxvas deş, hapt’asınbı.

8 Avimelek miç’eer çakra oza qıxha, cun gırgın insanar sav’u, man gırgın manbışis yuşan ha’a. İnsanar mançile geeb qəvəyq’ənanbı. 9 Avimelekee İbrıhım qort’ul, eyhen:

– Ğu şak hı’iyn hucoona? Zı yiğne ögil nena bınahne hav’u, ğu zalqayiy yizde paççahiyvalilqa ina xəbna bınah qav’u? Ğu zak hidya’asın kar hı’ı.

10 Avimelekee meed İbrıhımık’le eyhen:

– Ğu man kar ha’amee, hucooniy yiğne fıkreençe ı’lğəə?

11 İbrıhımee eyhen:

– Yizde ək’leençe «İnyaa’ab Allahıle qəpq’ı’niy deşud, xhunaşşeyl-alla manbışe zı gik’asdava» ılğeç’u. 12 Mana hək’erar yizda yiçu vor: yişda dek sa vorna, yedyarme curaynbı. Zı mana hey’ı. 13 Allahee zı dekkıne xaançe menne cigabışeeqa g’ıxelemee, zı məng’ı’k’le uvhiyn: «Zas inəxübna yugvalla hee’e: şi vüqqəsde cigabışee yizde hək’ee, „İna yizda çocva" eyhe».

14 Avimelekee İbrıhımıs çavra-vəq’ə, həmbal adameriy həmbal yadar huvu. Xhunaşşer Sarrar yı’q’əlqa seek’al hee’e. 15 Avimelekee eyhen:

– Yizda ölka yiğne ulene ögil vob, vas nyaqayiy ıkkan maayir vasse axvas əxə.

16 Qiyğa Sarrayk’le eyhen:

– İleeke zı yiğne çocus aazır (1000) nuk’rayn şekel*20:16 aazır (1000) nuk’rayn şekel: 11,5 kilolqa ələən nuk’ra eyxhe. hele. Hasre mane nuk’rayn gırgınbışik’le val bınah devxhay hagvecen.

17 İbrıhımee Allahıs düə haa’a, Allaheeyib Avimelekır, mang’una xhunaşşer, mang’un həmbal zəiyfabıb yug qaa’anbı: manbışisse meeb vuxhne aaxvas vəəxənbı. 18 Rəbbee, İbrıhımne xhunaşşeyl, Sarral-allaniy, Avimelekne xaan gırgın zəiyfabı vuxhne aaxvas dəəxəsınbı xhinne qav’u.